Matched Mismatch Not in MapM
201 words: 193 matched, 7 mismatch, 1 missing
1 וַיְהִי הַמֶּ֣לֶךְ שְׁלֹמֹ֔ה מֶ֖לֶךְ עַל כָּל יִשְׂרָאֵל 2 וְאֵ֥לֶּה הַשָּׂרִ֖ים אֲשֶׁר ל֑וֹ עֲזַרְיָ֥הוּ בֶן צָד֖וֹק הַכֹּהֵן 3 אֱלִיחֹ֧רֶף וַאֲחִיָּ֛ה בְּנֵ֥י שִׁישָׁ֖א סֹפְרִ֑ים וִיהוֹשָׁפָט בֶּן אֲחִיל֖וּד הַמַּזְכִּיר 4 וּבְנָיָ֥הוּ בֶן יְהוֹיָדָ֖ע עַל הַצָּבָ֑א וְצָד֥וֹק וְאֶבְיָתָ֖ר כֹּהֲנִים 5 וַעֲזַרְיָ֥הוּ בֶן נָתָ֖ן עַל הַנִּצָּבִ֑ים וְזָב֧וּד בֶּן נָתָ֛ן כֹּהֵ֖ן רֵעֶ֥ה הַמֶּלֶךְ 6 וַאֲחִישָׁ֖ר עַל הַבָּ֑יִת וַאֲדֹנִירָ֥ם בֶּן עַבְדָּ֖א עַל הַמַּס 7 וְלִשְׁלֹמֹ֞ה שְׁנֵים עָשָׂ֤ר נִצָּבִים֙ עַל כָּל יִשְׂרָאֵ֔ל וְכִלְכְּל֥וּ אֶת הַמֶּ֖לֶךְ וְאֶת בֵּית֑וֹ חֹ֧דֶשׁ בַּשָּׁנָ֛ה יִהְיֶ֥ה עַל הָאֶחָד לְכַלְכֵּל 8 וְאֵ֣לֶּה שְׁמוֹתָ֔ם בֶּן ח֖וּר בְּהַ֥ר אֶפְרָיִם 9 בֶּן דֶּ֛קֶר בְּמָקַ֥ץ וּבְשַׁעַלְבִ֖ים וּבֵ֣ית שָׁ֑מֶשׁ וְאֵיל֖וֹן עַד בֵּית חָנָן 10 בֶּן חֶ֖סֶד בָּאֲרֻבּ֑וֹת ל֥וֹ שֹׂכֹ֖ה וְכָל אֶ֥רֶץ חֵפֶר 11 בֶּן אֲבִינָדָ֖ב כָּל נָ֣פַת דֹּ֑אר טָפַת֙ בַּת שְׁלֹמֹ֔ה הָ֥יְתָה לּ֖וֹ לְאִשָּׁה 12 בַּעֲנָא בֶּן אֲחִיל֔וּד תַּעְנַ֖ךְ וּמְגִדּ֑וֹ וְכָל בֵּ֣ית שְׁאָ֡ן אֲשֶׁר֩ אֵ֨צֶל צָרְתַ֜נָה מִתַּ֣חַת לְיִזְרְעֶ֗אל מִבֵּ֤ית שְׁאָן֙ עַ֚ד אָבֵ֣ל מְחוֹלָ֔ה עַ֖ד מֵעֵ֥בֶר לְיָקְמֳעָם 13 בֶּן גֶּ֖בֶר בְּרָמֹ֣ת גִּלְעָ֑ד ל֡וֹ חַוֺּת֩ יָאִ֨יר בֶּן מְנַשֶּׁ֜ה אֲשֶׁ֣ר בַּגִּלְעָ֗ד ל֚וֹ חֶ֤בֶל אַרְגֹּב֙ אֲשֶׁ֣ר בַּבָּשָׁ֔ן שִׁשִּׁים֙ עָרִ֣ים גְּדֹל֔וֹת חוֹמָ֖ה וּבְרִ֥יחַ נְחֹשֶׁת 14 אֲחִינָדָ֥ב בֶּן עִדֹּ֖א מַחֲנָיְמָה 15 אֲחִימַ֖עַץ בְּנַפְתָּלִ֑י גַּם ה֗וּא לָקַ֛ח אֶת בָּשְׂמַ֥ת בַּת שְׁלֹמֹ֖ה לְאִשָּׁה 16 בַּעֲנָא בֶּן חוּשָׁ֔י בְּאָשֵׁ֖ר וּבְעָלוֹת 17 יְהוֹשָׁפָ֥ט בֶּן פָּר֖וּחַ בְּיִשְׂשָׂכָר 18 שִׁמְעִ֥י בֶן אֵלָ֖א בְּבִנְיָמִן 19 גֶּ֥בֶר בֶּן אֻרִ֖י בְּאֶ֣רֶץ גִּלְעָ֑ד אֶ֜רֶץ סִיח֣וֹן מֶ֣לֶךְ הָאֱמֹרִ֗י וְעֹג֙ מֶ֣לֶךְ הַבָּשָׁ֔ן וּנְצִ֥יב אֶחָ֖ד אֲשֶׁ֥ר בָּאָרֶץ 20 יְהוּדָ֤ה וְיִשְׂרָאֵל֙ רַבִּ֔ים כַּח֥וֹל אֲשֶׁר עַל הַיָּ֖ם לָרֹ֑ב אֹכְלִ֥ים וְשֹׁתִ֖ים וּשְׂמֵחִים