Matched Mismatch Not in MapM
215 words: 207 matched, 8 mismatch, 0 missing
1 דִּבְרֵי֙ קֹהֶ֣לֶת בֶּן דָּוִ֔ד מֶ֖לֶךְ בִּירוּשָׁלֵם 2 הֲבֵ֤ל הֲבָלִים֙ אָמַ֣ר הַקֹּהֶלֶת הֲבֵ֥ל הֲבָלִ֖ים הַכֹּ֥ל הָבֶל 3 מַה יִּתְר֖וֹן לָאָדָם֑ בְּכָ֨ל עֲמָל֔וֹ שֶׁיַּעֲמֹל֖ תַּ֥חַת הַשָּׁמָיִם 4 דּ֤וֹר הֹלֵךְ֙ וְד֣וֹר בָּ֔א וְהָאָ֖רֶץ לְעוֹלָ֥ם עֹמָדֶת 5 וְזֹרֵחַ הַשֶּׁ֖מֶשׁ וּבָ֣א הַשָּׁ֑מֶשׁ וְאֶ֨ל מְקוֹמ֔וֹ שׁוֹאֵ֛ף זוֹרֵ֥חַ ה֖וּא שָׁם 6 הוֹלֵךְ֙ אֶל דָּר֔וֹם וְסוֹבֵ֖ב אֶל צָפ֑וֹן סוֹבֵ֤ב סֹבֵב֙ הוֹלֵ֣ךְ הָר֔וּחַ וְעַל סְבִיבֹתָ֖יו שָׁ֥ב הָרוּחַ 7 כָּל הַנְּחָלִים֙ הֹלְכִ֣ים אֶל הַיָּ֔ם וְהַיָּ֖ם אֵינֶ֣נּוּ מָלֵ֑א אֶל מְק֗וֹם שֶׁ֤הַנְּחָלִים֙ הֹלְכִי֔ם שָׁ֛ם הֵ֥ם שָׁבִ֖ים לָלָכֶת 8 כָּל הַדְּבָרִ֣ים יְגֵעִ֔ים לֹא יוּכַ֥ל אִ֖ישׁ לְדַבֵּ֑ר לֹא תִשְׂבַּ֥ע עַ֙יִן֙ לִרְא֔וֹת וְלֹא תִמָּלֵ֥א אֹ֖זֶן מִשְּׁמֹעַ 9 מַה שֶּׁהָיָה ה֣וּא שֶׁיִּהְיֶ֔ה וּמַה שֶׁנַּעֲשָׂה ה֖וּא שֶׁיֵּעָשֶׂ֑ה וְאֵ֥ין כָּל חָדָ֖שׁ תַּ֥חַת הַשָּׁמֶשׁ 10 יֵ֥שׁ דָּבָ֛ר שֶׁיֹּאמַ֥ר רְאֵה זֶ֖ה חָדָ֣שׁ ה֑וּא כְּבָר֙ הָיָ֣ה לְעֹלָמִי֔ם אֲשֶׁ֥ר הָיָ֖ה מִלְּפָנֵנוּ 11 אֵ֥ין זִכְר֖וֹן לָרִאשֹׁנִ֑ים וְגַ֨ם לָאַחֲרֹנִ֜ים שֶׁיִּהְי֗וּ לֹא יִהְיֶ֤ה לָהֶם֙ זִכָּר֔וֹן עִ֥ם שֶׁיִּהְי֖וּ לָאַחֲרֹנָה 12 אֲנִ֣י קֹהֶ֗לֶת הָיִ֥יתִי מֶ֛לֶךְ עַל יִשְׂרָאֵ֖ל בִּירוּשָׁלֵם 13 וְנָתַ֣תִּי אֶת לִבִּ֗י לִדְר֤וֹשׁ וְלָתוּר֙ בַּחָכְמָה֔ עַ֛ל כָּל אֲשֶׁ֥ר נַעֲשָׂ֖ה תַּ֣חַת הַשָּׁמָ֑יִם ה֣וּא עִנְיַ֣ן רָ֗ע נָתַ֧ן אֱלֹהִ֛ים לִבְנֵ֥י הָאָדָ֖ם לַעֲנ֥וֹת בּוֹ 14 רָאִ֙יתִי֙ אֶת כָּל הַמַּעֲשִׂי֔ם שֶׁנַּעֲשׂוּ֖ תַּ֣חַת הַשָּׁ֑מֶשׁ וְהִנֵּ֥ה הַכֹּ֛ל הֶ֖בֶל וּרְע֥וּת רוּחַ 15 מְעֻוָּ֖ת לֹא יוּכַ֣ל לִתְקֹ֑ן וְחֶסְר֖וֹן לֹא יוּכַ֥ל לְהִמָּנוֹת 16 דִּבַּ֨רְתִּי אֲנִ֤י עִם לִבִּי֙ לֵאמֹ֔ר אֲנִ֗י הִנֵּ֨ה הִגְדַּ֤לְתִּי וְהוֹסַ֙פְתִּי֙ חָכְמָ֔ה עַ֛ל כָּל אֲשֶׁר הָיָ֥ה לְפָנַ֖י עַל יְרוּשָׁלֵם וְלִבִּ֛י רָאָ֥ה הַרְבֵּ֖ה חָכְמָ֥ה וָדָעַת 17 וָאֶתְּנָ֤ה לִבִּי֙ לָדַ֣עַת חָכְמָ֔ה וְדַ֥עַת הוֹלֵלוֹת וְשִׂכְל֑וּת יָדַ֕עְתִּי שֶׁגַּם זֶ֥ה ה֖וּא רַעְי֥וֹן רוּחַ 18 כִּ֛י בְּרֹ֥ב חָכְמָ֖ה רָב כָּ֑עַס וְיוֹסִ֥יף דַּ֖עַת יוֹסִ֥יף מַכְאוֹב