Matched Mismatch Not in MapM
263 words: 227 matched, 34 mismatch, 2 missing
1 וַיְהִי אַחֲרֵי כֵ֔ן וַיַּ֥ךְ דָּוִ֛ד אֶת פְּלִשְׁתִּ֖ים וַיַּכְנִיעֵ֑ם וַיִּקַּ֥ח דָּוִ֛ד אֶת גַּת וּבְנֹתֶיהָ מִיַּ֥ד פְּלִשְׁתִּים 2 וַיַּ֣ךְ אֶת מוֹאָ֗ב וַיְמַדְּדֵם֤ בַּחֶ֙בֶל֙ הַשְׁכֵּ֣ב אוֹתָ֣ם אַ֔רְצָה וַיְמַדֵּ֤ד שְׁנֵי חֲבָלִים֙ לְהָמִ֔ית וּמְלֹ֥א הַחֶ֖בֶל לְהַחֲי֑וֹת וַתְּהִ֤י מוֹאָב֙ לְדָוִ֔ד לַעֲבָדִ֖ים נֹשְׂאֵ֥י מִנְחָה 3 וַיַּ֣ךְ דָּוִ֔ד אֶת הֲדַדְעֶ֥זֶר בֶּן רְחֹ֖ב מֶ֣לֶךְ צוֹבָ֑ה בְּלֶכְתּ֕וֹ לְהָשִׁ֥יב יָד֖וֹ בַּנָּהָר 4 וַיִּלְכֹּ֨ד דָּוִ֜ד מִמֶּ֗נּוּ אֶ֤לֶף רֶכֶב וְשִׁבְעַת אֲלָפִים פָּרָשִׁים וְעֶשְׂרִים אֶלֶף אִישׁ רַגְלִי וַיְעַקֵּר דָּוִד אֶת כָּל הָרֶכֶב וַיּוֹתֵר מִמֶּנּוּ מֵאָה רָכֶב 5 וַתָּבֹא֙ אֲרַ֣ם דַּמֶּ֔שֶׂק לַעְזֹ֕ר לַהֲדַדְעֶ֖זֶר מֶ֣לֶךְ צוֹבָ֑ה וַיַּ֤ךְ דָּוִד֙ בַּאֲרָ֔ם עֶשְׂרִים וּשְׁנַ֥יִם אֶ֖לֶף אִישׁ 6 וַיָּ֨שֶׂם דָּוִ֤ד נְצִבִים֙ בַּאֲרַ֣ם דַּמֶּ֔שֶׂק וַתְּהִ֤י אֲרָם֙ לְדָוִ֔ד לַעֲבָדִ֖ים נוֹשְׂאֵ֣י מִנְחָ֑ה וַיֹּ֤שַׁע יַהְוֶה אֶת דָּוִ֔ד בְּכֹ֖ל אֲשֶׁ֥ר הָלָךְ 7 וַיִּקַּ֣ח דָּוִ֗ד אֵ֚ת שִׁלְטֵ֣י הַזָּהָ֔ב אֲשֶׁ֣ר הָי֔וּ אֶ֖ל עַבְדֵ֣י הֲדַדְעָ֑זֶר וַיְבִיאֵ֖ם יְרוּשָׁלֵם 8 וּמִטֶּבַח וּמִבֵּרֹתַי֖ עָרֵ֣י הֲדַדְעָ֑זֶר לָקַ֞ח הַמֶּ֧לֶךְ דָּוִ֛ד נְחֹ֖שֶׁת הַרְבֵּ֥ה מְאֹד 9 וַיִּשְׁמַ֕ע תֹּעוּ מֶ֣לֶךְ חֲמָ֑ת כִּ֚י הִכָּ֣ה דָוִ֔ד אֵ֖ת כָּל חֵ֥יל הֲדַדְעָזֶר 10 וַיִּשְׁלַ֣ח תֹּ֣עִי אֶת יוֹרָם בְּנ֣וֹ אֶל הַמֶּלֶךְ דָּ֠וִ֠ד לִשְׁאָל ל֨וֹ לְשָׁל֜וֹם וּלְבָרֲכוֹ עַל֩ אֲשֶׁ֨ר נִלְחַ֤ם בַּהֲדַדְעֶ֙זֶר֙ וַיַּכֵּ֔הוּ כִּי אִ֛ישׁ מִלְחֲמ֥וֹת תֹּ֖עִי הָיָ֣ה הֲדַדְעָ֑זֶר וּבְיָד֗וֹ הָי֛וּ כְּלֵי כֶ֥סֶף וּכְלֵי זָהָ֖ב וּכְלֵ֥י נְחֹשֶׁת 11 גַּם אֹתָ֕ם הִקְדִּ֛ישׁ הַמֶּ֥לֶךְ דָּוִ֖ד לְיַהְוֶה עִם הַכֶּ֤סֶף וְהַזָּהָב֙ אֲשֶׁ֣ר הִקְדִּ֔ישׁ מִכָּל הַגּוֹיִ֖ם אֲשֶׁ֥ר כִּבֵּשׁ 12 מֵאֱדֹם וּמִמּוֹאָב֙ וּמִבְּנֵ֣י עַמּ֔וֹן וּמִפְּלִשְׁתִּ֖ים וּמֵעֲמָלֵ֑ק וּמִשְּׁלַ֛ל הֲדַדְעֶ֥זֶר בֶּן רְחֹ֖ב מֶ֥לֶךְ צוֹבָה 13 וַיַּ֤עַשׂ דָּוִד֙ שֵׁ֔ם בְּשֻׁב֕וֹ מֵהַכּוֹת֥וֹ אֶת אֱדֹם בְּגֵיא מֶ֑לַח שְׁמוֹנָ֥ה עָשָׂ֖ר אָלֶף 14 וַיָּ֨שֶׂם בֶּאֱד֜וֹם נְצִבִ֗ים בְּכָל אֱדוֹם֙ שָׂ֣ם נְצִבִ֔ים וַיְהִ֥י כָל אֱד֖וֹם עֲבָדִ֣ים לְדָוִ֑ד וַיּ֤וֹשַׁע יַהְוֶה אֶת דָּוִ֔ד בְּכֹ֖ל אֲשֶׁ֥ר הָלָךְ 15 וַיִּמְלֹ֥ךְ דָּוִ֖ד עַל כָּל יִשְׂרָאֵ֑ל וַיְהִ֣י דָוִ֗ד עֹשֶׂ֛ה מִשְׁפָּ֥ט וּצְדָקָ֖ה לְכָל עַמּוֹ 16 וְיוֹאָ֥ב בֶּן צְרוּיָ֖ה עַל הַצָּבָ֑א וִיהוֹשָׁפָ֥ט בֶּן אֲחִיל֖וּד מַזְכִּיר 17 וְצָד֧וֹק בֶּן אֲחִיט֛וּב וַאֲחִימֶ֥לֶךְ בֶּן אֶבְיָתָ֖ר כֹּהֲנִ֑ים וּשְׂרָיָ֖ה סוֹפֵר 18 וּבְנָיָ֙הוּ֙ בֶּן יְה֣וֹיָדָ֔ע עַל הַכְּרֵתִי וְהַפְּלֵתִי וּבְנֵי דָוִד סֹכְנִים הָיוּ