Matched Mismatch Not in MapM
232 words: 222 matched, 10 mismatch, 0 missing
1 וַיֵּ֥שֶׁב יִשְׂרָאֵ֖ל בַּשִּׁטִּ֑ים וַיָּ֣חֶל הָעָ֔ם לִזְנ֖וֹת אֶל בְּנ֥וֹת מוֹאָב 2 וַתִּקְרֶ֣אןָ לָעָ֔ם לְזִבְחֵ֖י אֱלֹהֵיהֶ֑ן וַיֹּ֣אכַל הָעָ֔ם וַיִּשְׁתַּחֲווּ֖ לֵאלֹהֵיהֶן 3 וַיִּצָּ֥מֶד יִשְׂרָאֵ֖ל לְבַ֣עַל פְּע֑וֹר וַיִּחַר אַ֥ף יַהְוֶה בְּיִשְׂרָאֵל 4 וַיֹּ֨אמֶר יַהְוֶה אֶל מֹשֶׁ֗ה קַ֚ח אֶת כָּל רָאשֵׁ֣י הָעָ֔ם וְהוֹקַ֥ע אוֹתָ֛ם לְיַהְוֶה נֶ֣גֶד הַשָּׁ֑מֶשׁ וְיָשֹׁ֛ב חֲר֥וֹן אַף יַהְוֶה מִיִּשְׂרָאֵל 5 וַיֹּ֣אמֶר מֹשֶׁ֔ה אֶל שִׁבְטֵי יִשְׂרָאֵ֑ל הִרְגוּ֙ אִ֣ישׁ אֲנָשָׁ֔יו הַנִּצְמָדִ֖ים לְבַ֥עַל פְּעוֹר 6 וְהִנֵּ֡ה אִישׁ֩ מִבְּנֵ֨י יִשְׂרָאֵ֜ל בָּ֗א וַיַּקְרֵ֤ב אֶל אֶחָיו֙ אֶת הַמִּדְיָנִ֔ית לְעֵינֵ֣י מֹשֶׁ֔ה וּלְעֵינֵ֖י כָּל עֲדַ֣ת בְּנֵי יִשְׂרָאֵ֑ל וְהֵ֣מָּה בֹכִ֔ים פֶּ֖תַח אֹ֥הֶל מוֹעֵד 7 וַיַּ֗רְא פִּינְחָס בֶּן אֶלְעָזָ֔ר בֶּן אַהֲרֹ֖ן הַכֹּהֵ֑ן וַיָּ֙קָם֙ מִתּ֣וֹךְ הָעֵדָה֔ וַיִּקַּ֥ח רֹ֖מַח בְּיָדוֹ 8 וַ֠יָּבֹ֠א אַחַ֨ר אִישׁ יִשְׂרָאֵ֜ל אֶל הַקֻּבָּ֗ה וַיִּדְקֹר֙ אֶת שְׁנֵיהֶ֔ם אֵ֚ת אִ֣ישׁ יִשְׂרָאֵ֔ל וְאֶת הָאִשָּׁ֖ה אֶל קֳבָתָ֑הּ וַתֵּעָצַר הַמַּגֵּפָ֔ה מֵעַ֖ל בְּנֵ֥י יִשְׂרָאֵל 9 וַיִּהְי֕וּ הַמֵּתִ֖ים בַּמַּגֵּפָ֑ה שְׁלֹשָׁה וְעֶשְׂרִ֖ים אָלֶף 10 וַיְדַבֵּ֥ר יַהְוֶה אֶל מֹשֶׁ֥ה לֵאמֹר 11 פִּינְחָס֨ בֶּן אֶלְעָזָ֜ר בֶּן אַהֲרֹ֣ן הַכֹּהֵ֗ן הֵשִׁ֤יב אֶת חֲמָתִי֙ מֵעַ֣ל בְּנֵי יִשְׂרָאֵ֔ל בְּקַנְא֥וֹ אֶת קִנְאָתִ֖י בְּתוֹכָ֑ם וְלֹא כִלִּ֥יתִי אֶת בְּנֵי יִשְׂרָאֵ֖ל בְּקִנְאָתִי 12 לָכֵ֖ן אֱמֹ֑ר הִנְנִ֨י נֹתֵ֥ן ל֛וֹ אֶת בְּרִיתִ֖י שָׁלוֹם 13 וְהָ֤יְתָה לּוֹ֙ וּלְזַרְע֣וֹ אַחֲרָ֔יו בְּרִ֖ית כְּהֻנַּ֣ת עוֹלָ֑ם תַּ֗חַת אֲשֶׁ֤ר קִנֵּא֙ לֵאלֹהָי֔ו וַיְכַפֵּ֖ר עַל בְּנֵ֥י יִשְׂרָאֵל 14 וְשֵׁם֩ אִ֨ישׁ יִשְׂרָאֵ֜ל הַמֻּכֶּ֗ה אֲשֶׁ֤ר הֻכָּה֙ אֶת הַמִּדְיָנִ֔ית זִמְרִ֖י בֶּן סָל֑וּא נְשִׂ֥יא בֵית אָ֖ב לַשִּׁמְעֹנִי 15 וְשֵׁ֨ם הָאִשָּׁה֧ הַמֻּכָּ֛ה הַמִּדְיָנִ֖ית כָּזְבִּ֣י בַת צ֑וּר רֹ֣אשׁ אֻמּ֥וֹת בֵּית אָ֛ב בְּמִדְיָ֖ן הוּא 16 וַיְדַבֵּ֥ר יַהְוֶה אֶל מֹשֶׁ֥ה לֵאמֹר 17 צָר֖וֹר אֶת הַמִּדְיָנִ֑ים וְהִכִּיתֶ֖ם אוֹתָם 18 כִּ֣י צֹרְרִ֥ים הֵם֙ לָכֶ֔ם בְּנִכְלֵיהֶ֛ם אֲשֶׁר נִכְּל֥וּ לָכֶ֖ם עַל דְּבַר פְּע֑וֹר וְעַל דְּבַ֞ר כָּזְבִּ֨י בַת נְשִׂ֤יא מִדְיָן֙ אֲחֹתָ֔ם הַמֻּכָּ֥ה בְיוֹם הַמַּגֵּפָ֖ה עַל דְּבַר פְּעוֹר 19 וַיְהִ֖י אַחֲרֵ֣י הַמַּגֵּפָ֑ה