Matched Mismatch Not in MapM
252 words: 235 matched, 17 mismatch, 0 missing
1 הַדָּבָר֙ אֲשֶׁ֣ר חָזָ֔ה יְשַׁעְיָה֖וּ בֶּן אָמ֑וֹץ עַל יְהוּדָ֖ה וִירוּשָׁלִָם 2 וְהָיָ֣ה בְּאַחֲרִ֣ית הַיָּמִ֗ים נָכ֨וֹן יִהְיֶה֜ הַ֤ר בֵּית יַהְוֶה בְּרֹ֣אשׁ הֶהָרִ֔ים וְנִשָּׂ֖א מִגְּבָע֑וֹת וְנָהֲר֥וּ אֵלָ֖יו כָּל הַגּוֹיִם 3 וְהָלְכוּ֞ עַמִּ֣ים רַבִּ֗ים וְאָמְרוּ לְכ֣וּ וְנַעֲלֶ֣ה אֶל הַר יַהְוֶה אֶל בֵּית֙ אֱלֹהֵ֣י יַעֲקֹ֔ב וְיֹרֵ֙נוּ֙ מִדְּרָכָ֔יו וְנֵלְכָ֖ה בְּאֹרְחֹתָ֑יו כִּ֤י מִצִּיּוֹן֙ תֵּצֵ֣א תוֹרָ֔ה וּדְבַר יַהְוֶה מִירוּשָׁלֵם 4 וְשָׁפַט֙ בֵּ֣ין הַגּוֹיִ֔ם וְהוֹכִ֖יחַ לְעַמִּ֣ים רַבִּ֑ים וְכִתְּת֨וּ חַרְבוֹתָ֜ם לְאִתִּ֗ים וַחֲנִיתוֹתֵיהֶם לְמַזְמֵר֔וֹת לֹא יִשָּׂ֨א ג֤וֹי אֶל גּוֹי֙ חֶ֔רֶב וְלֹא יִלְמְדוּן ע֖וֹד מִלְחָמָה 5 בֵּ֖ית יַעֲקֹ֑ב לְכ֥וּ וְנֵלְכָ֖ה בְּא֥וֹר יַהְוֶה 6 כִּ֣י נָטַ֗שְׁתָּה עַמְּךָ֙ בֵּ֣ית יַעֲקֹ֔ב כִּ֤י מָלְאוּ מִקֶּ֔דֶם וְעֹנְנִ֖ים כַּפְּלִשְׁתִּ֑ים וּבְיַלְדֵ֥י נָכְרִ֖ים יַשְׂפִּיקוּ 7 וַתִּמָּלֵ֤א אַרְצוֹ֙ כֶּ֣סֶף וְזָהָ֔ב וְאֵ֥ין קֵ֖צֶה לְאֹצְרֹתָ֑יו וַתִּמָּלֵ֤א אַרְצוֹ֙ סוּסִ֔ים וְאֵ֥ין קֵ֖צֶה לְמַרְכְּבֹתָיו 8 וַתִּמָּלֵ֥א אַרְצ֖וֹ אֱלִילִ֑ים לְמַעֲשֵׂ֤ה יָדָיו֙ יִשְׁתַּחֲווּ֔ לַאֲשֶׁ֥ר עָשׂ֖וּ אֶצְבְּעֹתָיו 9 וַיִּשַּׁ֥ח אָדָ֖ם וַיִּשְׁפַּל אִ֑ישׁ וְלֹא תִּשָּׂ֖א לָהֶם 10 בּ֣וֹא בַצּ֔וּר וְהִטָּמֵ֖ן בֶּעָפָ֑ר מִפְּנֵי֙ פַּ֣חַד יַהְוֶה וּמֵהֲדַ֖ר גְּאֹנוֹ 11 עֵינֵ֞י גַּבְה֤וּת אָדָם֙ שָׁפֵ֔ל וְשַׁ֖ח ר֣וּם אֲנָשִׁ֑ים וְנִשְׂגַּ֧ב יַהְוֶה לְבַדּ֖וֹ בַּיּ֥וֹם הַהוּא 12 כִּ֣י י֞וֹם לְיַהְוֶה צְבָא֛וֹת עַ֥ל כָּל גֵּאֶ֖ה וָרָ֑ם וְעַ֖ל כָּל נִשָּׂ֥א וְשָׁפֵל 13 וְעַל֙ כָּל אַרְזֵ֣י הַלְּבָנ֔וֹן הָרָמִ֖ים וְהַנִּשָּׂאִ֑ים וְעַ֖ל כָּל אַלּוֹנֵ֥י הַבָּשָׁן 14 וְעַ֖ל כָּל הֶהָרִ֣ים הָרָמִ֑ים וְעַ֖ל כָּל הַגְּבָע֥וֹת הַנִּשָּׂאוֹת 15 וְעַ֖ל כָּל מִגְדָּ֣ל גָּבֹ֑הַּ וְעַ֖ל כָּל חוֹמָ֥ה בְצוּרָה 16 וְעַ֖ל כָּל אֳנִיּ֣וֹת תַּרְשִׁ֑ישׁ וְעַ֖ל כָּל שְׂכִיּ֥וֹת הַחֶמְדָּה 17 וְשַׁח֙ גַּבְה֣וּת הָאָדָ֔ם וְשָׁפֵ֖ל ר֣וּם אֲנָשִׁ֑ים וְנִשְׂגַּ֧ב יַהְוֶה לְבַדּ֖וֹ בַּיּ֥וֹם הַהוּא 18 וְהָאֱלִילִ֖ים כָּלִ֥יל יַחֲלֹפוּ 19 וּבָ֙אוּ֙ בִּמְעָר֣וֹת צֻרִ֔ים וּבִמְחִלּ֖וֹת עָפָ֑ר מִפְּנֵ֞י פַּ֤חַד יַהְוֶה וּמֵהֲדַ֣ר גְּאוֹנ֔וֹ בְּקוּמ֖וֹ לַעֲרֹ֥ץ הָאָרֶץ 20 בַּיּ֤וֹם הַהוּא֙ יַשְׁלִ֣יךְ הָאָדָ֔ם אֵ֚ת אֱלִילֵ֣י כַסְפּ֔וֹ וְאֵ֖ת אֱלִילֵ֣י זְהָב֑וֹ אֲשֶׁ֤ר עָשׂוּ לוֹ֙ לְהִשְׁתַּחֲוֺת֔ לַחֲפַרְפָּרוֹת וְלָעֲטַלֵּפִים 21 לָבוֹא֙ בְּנִקְר֣וֹת הַצֻּרִ֔ים וּבִסְעִפֵ֖י הַסְּלָעִ֑ים מִפְּנֵ֞י פַּ֤חַד יַהְוֶה וּמֵהֲדַ֣ר גְּאוֹנ֔וֹ בְּקוּמ֖וֹ לַעֲרֹ֥ץ הָאָרֶץ 22 חִדְל֤וּ לָכֶם֙ מִן הָ֣אָדָ֔ם אֲשֶׁ֥ר נְשָׁמָ֖ה בְּאַפּ֑וֹ כִּי בַמֶּ֥ה נֶחְשָׁ֖ב הוּא