Matched Mismatch Not in MapM
146 words: 142 matched, 4 mismatch, 0 missing
1 בָּעֵ֣ת הַהִ֡יא שָׁלַ֡ח מְרֹדַ֣ךְ בַּ֠לְאֲדָ֠ן בֶּן בַּלְאֲדָ֧ן מֶלֶךְ בָּבֶ֛ל סְפָרִ֥ים וּמִנְחָ֖ה אֶל חִזְקִיָּ֑הוּ וַיִּשְׁמַ֕ע כִּ֥י חָלָ֖ה חִזְקִיָּהוּ 2 וַיִּשְׂמַ֣ח עֲלֵיהֶם֮ חִזְקִיָּ֒הוּ֒ וַיַּרְאֵ֣ם אֶת בֵּ֣ית נְכֹתֹ֡ה אֶת הַכֶּסֶף֩ וְאֶת הַזָּהָ֨ב וְאֶת הַבְּשָׂמִ֜ים וְאֵ֣ת הַשֶּׁ֣מֶן הַטּ֗וֹב וְאֵת֙ כָּל בֵּ֣ית כֵּלָ֔יו וְאֵ֛ת כָּל אֲשֶׁ֥ר נִמְצָ֖א בְּאֹצְרֹתָ֑יו לֹא הָיָ֣ה דָבָ֗ר אֲ֠שֶׁ֠ר לֹא הֶרְאָ֧ם חִזְקִיָּ֛הוּ בְּבֵית֖וֹ וּבְכָל מֶמְשַׁלְתּוֹ 3 וַיָּבֹא֙ יְשַׁעְיָה֣וּ הַנָּבִ֔יא אֶל הַמֶּ֖לֶךְ חִזְקִיָּ֑הוּ וַיֹּ֨אמֶר אֵלָ֜יו מָ֥ה אָמְר֣וּ הָאֲנָשִׁ֣ים הָאֵ֗לֶּה וּמֵאַ֙יִן֙ יָבֹ֣אוּ אֵלֶ֔יךָ וַיֹּ֙אמֶר֙ חִזְקִיָּ֔הוּ מֵאֶ֧רֶץ רְחוֹקָ֛ה בָּ֥אוּ אֵלַ֖י מִבָּבֶל 4 וַיֹּ֕אמֶר מָ֥ה רָא֖וּ בְּבֵיתֶ֑ךָ וַיֹּ֣אמֶר חִזְקִיָּ֗הוּ אֵ֣ת כָּל אֲשֶׁ֤ר בְּבֵיתִי֙ רָא֔וּ לֹא הָיָ֥ה דָבָ֛ר אֲשֶׁ֥ר לֹא הִרְאִיתִ֖ים בְּאוֹצְרֹתָי 5 וַיֹּ֥אמֶר יְשַׁעְיָה֖וּ אֶל חִזְקִיָּ֑הוּ שְׁמַ֖ע דְּבַר יַהְוֶה צְבָאוֹת 6 הִנֵּה֮ יָמִ֣ים בָּאִים֒ וְנִשָּׂ֣א כָּל אֲשֶׁ֣ר בְּבֵיתֶ֗ךָ וַאֲשֶׁ֨ר אָצְר֧וּ אֲבֹתֶ֛יךָ עַד הַיּ֥וֹם הַזֶּ֖ה בָּבֶ֑ל לֹא יִוָּתֵ֥ר דָּבָ֖ר אָמַ֥ר יַהְוֶה 7 וּמִבָּנֶ֜יךָ אֲשֶׁ֨ר יֵצְא֧וּ מִמְּךָ֛ אֲשֶׁ֥ר תּוֹלִ֖יד יִקָּ֑חוּ וְהָיוּ֙ סָרִיסִ֔ים בְּהֵיכַ֖ל מֶ֥לֶךְ בָּבֶל 8 וַיֹּ֤אמֶר חִזְקִיָּ֙הוּ֙ אֶל יְשַׁעְיָ֔הוּ ט֥וֹב דְּבַר יַהְוֶה אֲשֶׁ֣ר דִּבַּ֑רְתָּ וַיֹּ֕אמֶר כִּ֥י יִהְיֶ֛ה שָׁל֥וֹם וֶאֱמֶ֖ת בְּיָמָי