Matched Mismatch Not in MapM
96 words: 93 matched, 3 mismatch, 0 missing
1 בִּשְׁנַ֨ת בֹּ֤א תַרְתָּן֙ אַשְׁדּ֔וֹדָה בִּשְׁלֹ֣חַ אֹת֔וֹ סַרְגוֹ֖ן מֶ֣לֶךְ אַשּׁ֑וּר וַיִּלָּ֥חֶם בְּאַשְׁדּ֖וֹד וַיִּלְכְּדָהּ 2 בָּעֵ֣ת הַהִ֗יא דִּבֶּ֣ר יַהְוֶה בְּיַ֣ד יְשַׁעְיָה֣וּ בֶן אָמוֹץ֮ לֵאמֹר֒ לֵ֗ךְ וּפִתַּחְתָּ֤ הַשַּׂק֙ מֵעַ֣ל מָתְנֶ֔יךָ וְנַעַלְךָ֥ תַחֲלֹ֖ץ מֵעַ֣ל רַגְלֶ֑ךָ וַיַּ֣עַשׂ כֵּ֔ן הָלֹ֖ךְ עָר֥וֹם וְיָחֵף 3 וַיֹּ֣אמֶר יַהְוֶה כַּאֲשֶׁ֥ר הָלַ֛ךְ עַבְדִּ֥י יְשַׁעְיָה֖וּ עָר֣וֹם וְיָחֵ֑ף שָׁלֹ֤שׁ שָׁנִים֙ א֣וֹת וּמוֹפֵ֔ת עַל מִצְרַ֖יִם וְעַל כּוּשׁ 4 כֵּ֣ן יִנְהַ֣ג מֶלֶךְ אַ֠שּׁ֠וּר אֶת שְׁבִ֨י מִצְרַ֜יִם וְאֶת גָּל֥וּת כּ֛וּשׁ נְעָרִ֥ים וּזְקֵנִ֖ים עָר֣וֹם וְיָחֵ֑ף וַחֲשׂוּפֵי שֵׁ֖ת עֶרְוַ֥ת מִצְרָיִם 5 וְחַתּ֖וּ וָבֹ֑שׁוּ מִכּוּשׁ֙ מַבָּטָ֔ם וּמִן מִצְרַ֖יִם תִּפְאַרְתָּם 6 וְ֠אָמַ֠ר יֹשֵׁ֨ב הָאִ֣י הַזֶּה֮ בַּיּ֣וֹם הַהוּא֒ הִנֵּה כֹ֣ה מַבָּטֵ֗נוּ אֲשֶׁר נַ֤סְנוּ שָׁם֙ לְעֶזְרָ֔ה לְהִ֨נָּצֵ֔ל מִפְּנֵ֖י מֶ֣לֶךְ אַשּׁ֑וּר וְאֵ֖יךְ נִמָּלֵ֥ט אֲנָחְנוּ