Matched Mismatch Not in MapM
406 words: 383 matched, 23 mismatch, 0 missing
1 וַיְהִ֕י כַּאֲשֶׁ֛ר יָשַׁ֥ב דָּוִ֖יד בְּבֵית֑וֹ וַיֹּ֨אמֶר דָּוִ֜יד אֶל נָתָ֣ן הַנָּבִ֗יא הִנֵּ֨ה אָנֹכִ֤י יוֹשֵׁב֙ בְּבֵ֣ית הָאֲרָזִ֔ים וַאֲר֥וֹן בְּרִית יְהֹוַה תַּ֥חַת יְרִיעוֹת 2 וַיֹּ֤אמֶר נָתָן֙ אֶל דָּוִ֔יד כֹּ֛ל אֲשֶׁ֥ר בִּלְבָבְךָ עֲשֵׂ֑ה כִּ֥י הָאֱלֹהִ֖ים עִמָּךְ 3 וַיְהִ֖י בַּלַּ֣יְלָה הַה֑וּא וַיְהִי דְּבַר אֱלֹהִ֔ים אֶל נָתָ֖ן לֵאמֹר 4 לֵ֤ךְ וְאָמַרְתָּ אֶל דָּוִ֣יד עַבְדִּ֔י כֹּ֖ה אָמַ֣ר יְהֹוַה לֹ֥א אַתָּ֛ה תִּבְנֶה לִּ֥י הַבַּ֖יִת לָשָׁבֶת 5 כִּ֣י לֹ֤א יָשַׁ֙בְתִּי֙ בְּבַ֔יִת מִן הַיּ֗וֹם אֲשֶׁ֤ר הֶעֱלֵ֙יתִי֙ אֶת יִשְׂרָאֵ֔ל עַ֖ד הַיּ֣וֹם הַזֶּ֑ה וָאֶהְיֶ֛ה מֵאֹ֥הֶל אֶל אֹ֖הֶל וּמִמִּשְׁכָּן 6 בְּכֹ֥ל אֲשֶׁר הִתְהַלַּ֘כְתִּי֮ בְּכָל יִשְׂרָאֵל֒ הֲדָבָ֣ר דִּבַּ֗רְתִּי אֶת אַחַד֙ שֹׁפְטֵ֣י יִשְׂרָאֵ֔ל אֲשֶׁ֥ר צִוִּ֛יתִי לִרְע֥וֹת אֶת עַמִּ֖י לֵאמֹ֑ר לָ֛מָּה לֹא בְנִיתֶ֥ם לִ֖י בֵּ֥ית אֲרָזִים 7 וְ֠עַתָּ֠ה כֹּה תֹאמַ֞ר לְעַבְדִּ֣י לְדָוִ֗יד כֹּ֤ה אָמַר֙ יְהֹוַה צְבָא֔וֹת אֲנִ֤י לְקַחְתִּ֙יךָ֙ מִן הַנָּוֶ֔ה מִן אַחֲרֵ֖י הַצֹּ֑אן לִהְיוֹ֣ת נָגִ֔יד עַ֖ל עַמִּ֥י יִשְׂרָאֵל 8 וָאֶהְיֶ֣ה עִמְּךָ֗ בְּכֹל֙ אֲשֶׁ֣ר הָלַ֔כְתָּ וָאַכְרִ֥ית אֶת כָּל אוֹיְבֶ֖יךָ מִפָּנֶ֑יךָ וְעָשִׂ֤יתִי לְךָ֙ שֵׁ֔ם כְּשֵׁ֥ם הַגְּדוֹלִ֖ים אֲשֶׁ֥ר בָּאָרֶץ 9 וְשַׂמְתִּ֣י מָ֠ק֠וֹם לְעַמִּ֨י יִשְׂרָאֵ֤ל וּנְטַעְתִּ֙יהוּ֙ וְשָׁכַ֣ן תַּחְתָּ֔יו וְלֹ֥א יִרְגַּ֖ז ע֑וֹד וְלֹא יוֹסִ֤יפוּ בְנֵי עַוְלָה֙ לְבַלֹּת֔וֹ כַּאֲשֶׁ֖ר בָּרִאשׁוֹנָה 10 וּלְמִיָּמִ֗ים אֲשֶׁ֨ר צִוִּ֤יתִי שֹׁפְטִים עַל עַמִּ֣י יִשְׂרָאֵ֔ל וְהִכְנַ֖עְתִּי אֶת כָּל אוֹיְבֶ֑יךָ וָאַגִּ֣ד לָ֔ךְ וּבַ֖יִת יִבְנֶה לְּךָ֥ יְהֹוָה 11 וְהָיָ֗ה כִּי יִמְלְאוּ יָמֶ֙יךָ֙ לָלֶ֣כֶת עִם אֲבֹתֶ֔יךָ וַהֲקִימוֹתִ֤י אֶת זַרְעֲךָ֙ אַחֲרֶ֔יךָ אֲשֶׁ֥ר יִהְיֶ֖ה מִבָּנֶ֑יךָ וַהֲכִינוֹתִ֖י אֶת מַלְכוּתוֹ 12 ה֥וּא יִבְנֶה לִּ֖י בָּ֑יִת וְכֹנַנְתִּ֥י אֶת כִּסְא֖וֹ עַד עוֹלָם 13 אֲנִי֙ אֶהְיֶה לּ֣וֹ לְאָ֔ב וְה֖וּא יִהְיֶה לִּ֣י לְבֵ֑ן וְחַסְדִּי֙ לֹא אָסִ֣יר מֵעִמּ֔וֹ כַּאֲשֶׁ֣ר הֲסִיר֔וֹתִי מֵאֲשֶׁ֥ר הָיָ֖ה לְפָנֶיךָ 14 וְהַעֲמַדְתִּ֛יהוּ בְּבֵיתִ֥י וּבְמַלְכוּתִ֖י עַד הָעוֹלָ֑ם וְכִסְא֕וֹ יִהְיֶ֥ה נָכ֖וֹן עַד עוֹלָם 15 כְּכֹל֙ הַדְּבָרִ֣ים הָאֵ֔לֶּה וּכְכֹ֖ל הֶחָזוֹ֣ן הַזֶּ֑ה כֵּ֛ן דִּבֶּ֥ר נָתָ֖ן אֶל דָּוִיד 16 וַיָּבֹא֙ הַמֶּ֣לֶךְ דָּוִ֔יד וַיֵּ֖שֶׁב לִפְנֵ֣י יְהֹוַה וַיֹּ֗אמֶר מִי אֲנִ֞י יְהֹוַה אֱלֹהִים֙ וּמִ֣י בֵיתִ֔י כִּ֥י הֲבִיאֹתַ֖נִי עַד הֲלֹם 17 וַתִּקְטַ֨ן זֹ֤את בְּעֵינֶ֙יךָ֙ אֱלֹהִ֔ים וַתְּדַבֵּ֥ר עַל בֵּית עַבְדְּךָ֖ לְמֵרָח֑וֹק וּרְאִיתַ֗נִי כְּת֧וֹר הָאָדָ֛ם הַמַּעֲלָ֖ה יְהֹוַה אֱלֹהִים 18 מַה יּוֹסִ֨יף ע֥וֹד דָּוִ֛יד אֵלֶ֖יךָ לְכַבֵּד אֶת עַבְדֶּ֑ךָ וְאַתָּ֖ה אֶת עַבְדְּךָ֥ יָדָעְתָּ 19 יְהֹוַה בַּעֲב֤וּר עַבְדְּךָ֙ וּכְלִבְּךָ עָשִׂ֕יתָ אֵ֥ת כָּל הַגְּדוּלָּ֖ה הַזֹּ֑את לְהֹדִ֖יעַ אֶת כָּל הַגְּדֻלּוֹת 20 יְהֹוַה אֵ֣ין כָּמ֔וֹךָ וְאֵ֥ין אֱלֹהִ֖ים זוּלָתֶ֑ךָ כְּכֹל אֲשֶׁר שָׁמַ֖עְנוּ בְּאָזְנֵינוּ 21 וּמִי֙ כְּעַמְּךָ֣ יִשְׂרָאֵ֔ל גּ֥וֹי אֶחָ֖ד בָּאָ֑רֶץ אֲשֶׁר֩ הָלַ֨ךְ הָאֱלֹהִ֜ים לִפְדּ֧וֹת ל֣וֹ עָ֗ם לָשׂ֤וּם לְךָ֙ שֵׁ֚ם גְּדֻלּ֣וֹת וְנֹרָא֔וֹת לְגָרֵ֗שׁ מִפְּנֵ֧י עַמְּךָ֛ אֲשֶׁר פָּדִ֥יתָ מִמִּצְרַ֖יִם גּוֹיִם 22 וַ֠תִּתֵּ֠ן אֶת עַמְּךָ֨ יִשְׂרָאֵ֧ל לְךָ֛ לְעָ֖ם עַד עוֹלָ֑ם וְאַתָּ֣ה יְהֹוַה הָיִ֥יתָ לָהֶ֖ם לֵאלֹהִים 23 וְעַתָּ֣ה יְהֹוַה הַדָּבָ֗ר אֲשֶׁ֨ר דִּבַּ֤רְתָּ עַל עַבְדְּךָ֙ וְעַל בֵּית֔וֹ יֵאָמֵ֖ן עַד עוֹלָ֑ם וַעֲשֵׂ֖ה כַּאֲשֶׁ֥ר דִּבַּרְתָּ 24 וְ֠יֵאָמֵ֠ן וְיִגְדַּ֨ל שִׁמְךָ֤ עַד עוֹלָם֙ לֵאמֹ֔ר יְהֹוַה צְבָאוֹת֙ אֱלֹהִים לְיִשְׂרָאֵל וּבֵית דָּוִיד עַבְדְּךָ נָכוֹן לְפָנֶיךָ 25 כִּ֣י אַתָּ֣ה אֱלֹהַ֗י גָּלִ֙יתָ֙ אֶת אֹ֣זֶן עַבְדְּךָ֔ לִבְנ֥וֹת ל֖וֹ בָּ֑יִת עַל כֵּן֙ מָצָ֣א עַבְדְּךָ֔ לְהִתְפַּלֵּ֖ל לְפָנֶיךָ 26 וְעַתָּ֣ה יְהֹוַה אַתָּה ה֖וּא הָאֱלֹהִ֑ים וַתְּדַבֵּר֙ עַל עַבְדְּךָ֔ הַטּוֹבָ֖ה הַזֹּאת 27 וְעַתָּ֗ה הוֹאַ֙לְתָּ֙ לְבָרֵךְ֙ אֶת בֵּ֣ית עַבְדְּךָ֔ לִהְיוֹ֥ת לְעוֹלָ֖ם לְפָנֶ֑יךָ כִּי אַתָּ֤ה יְהֹוַה בֵּרַ֔כְתָּ וּמְבֹרָ֖ךְ לְעוֹלָם