Matched Mismatch Not in MapM
334 words: 312 matched, 21 mismatch, 1 missing
1 וְדָוִ֥יד זָקֵ֖ן וְשָׂבַ֣ע יָמִ֑ים וַיַּמְלֵ֛ךְ אֶת שְׁלֹמֹ֥ה בְנ֖וֹ עַל יִשְׂרָאֵל 2 וַיֶּאֱסֹף אֶת כָּל שָׂרֵ֣י יִשְׂרָאֵ֔ל וְהַכֹּהֲנִ֖ים וְהַלְוִיִּם 3 וַיִּסָּפְרוּ הַלְוִיִּ֔ם מִבֶּ֛ן שְׁלֹשִׁ֥ים שָׁנָ֖ה וָמָ֑עְלָה וַיְהִ֨י מִסְפָּרָ֤ם לְגֻלְגְּלֹתָם֙ לִגְבָרִ֔ים שְׁלֹשִׁ֥ים וּשְׁמוֹנָ֖ה אָלֶף 4 מֵאֵ֗לֶּה לְנַצֵּ֙חַ֙ עַל מְלֶ֣אכֶת בֵּית יְהֹוַה עֶשְׂרִ֥ים וְאַרְבָּעָ֖ה אָ֑לֶף וְשֹׁטְרִ֥ים וְשֹׁפְטִ֖ים שֵׁ֥שֶׁת אֲלָפִים 5 וְאַרְבַּ֥עַת אֲלָפִ֖ים שֹׁעֲרִ֑ים וְאַרְבַּ֤עַת אֲלָפִים֙ מְהַלְלִי֣ם לַיהֹוַה בַּכֵּלִ֕ים אֲשֶׁ֥ר עָשִׂ֖יתִי לְהַלֵּל לַיהֹוַה 6 וַיֶּחָלְקֵ֥ם דָּוִ֖יד מַחְלְק֑וֹת לִבְנֵ֣י לֵוִ֔י לְגֵרְשׁ֖וֹן קְהָ֥ת וּמְרָרִי 7 לַגֵּרְשֻׁנִּ֖י לַעְדָּ֥ן וְשִׁמְעִי 8 בְּנֵ֣י לַעְדָּ֗ן הָרֹ֧אשׁ יְחִיאֵ֛ל וְזֵתָ֥ם וְיוֹאֵ֖ל שְׁלֹשָׁה 9 בְּנֵ֣י שִׁמְעִ֗י שְׁלֹמוֹת וַחֲזִיאֵל וְהָרָן שְׁלֹשָׁה אֵלֶּה רָאשֵׁי הָאָבוֹת לְלַעְדָּן 10 וּבְנֵ֣י שִׁמְעִ֔י יַ֣חַת זִיזָא וִיע֖וּשׁ וּבְרִיעָ֑ה אֵ֥לֶּה בְנֵי שִׁמְעִ֖י אַרְבָּעָה 11 וַיְהִי יַ֣חַת הָרֹ֔אשׁ וְזִיזָ֖ה הַשֵּׁנִ֑י וִיע֤וּשׁ וּבְרִיעָה֙ לֹא הִרְבּ֣וּ בָנִ֔ים וַיִּהְיוּ לְבֵ֣ית אָ֔ב לִפְקֻדָּ֖ה אֶחָת 12 בְּנֵ֣י קְהָ֗ת עַמְרָ֥ם יִצְהָ֛ר חֶבְר֥וֹן וְעֻזִּיאֵ֖ל אַרְבָּעָה 13 בְּנֵ֥י עַמְרָ֖ם אַהֲרֹ֣ן וּמֹשֶׁ֑ה וַיִּבָּדֵ֣ל אַהֲרֹ֡ן לְהַקְדִּישׁוֹ קֹ֨דֶשׁ קָדָשִׁ֤ים הוּא וּבָנָיו֙ עַד עוֹלָ֔ם לְהַקְטִיר֩ לִפְנֵ֨י יְהֹוַה לְשָׁרְת֛וֹ וּלְבָרֵ֥ךְ בִּשְׁמ֖וֹ עַד עוֹלָם 14 וּמֹשֶׁ֖ה אִ֣ישׁ הָאֱלֹהִ֑ים בָּנָ֕יו יִקָּרְא֖וּ עַל שֵׁ֥בֶט הַלֵּוִי 15 בְּנֵ֣י מֹשֶׁ֔ה גֵּרְשׁ֖וֹם וֶאֱלִיעֶזֶר 16 בְּנֵ֥י גֵרְשׁ֖וֹם שׁוּבָאֵל הָרֹאשׁ 17 וַיִּהְי֥וּ בְנֵי אֱלִיעֶ֖זֶר רְחַבְיָ֣ה הָרֹ֑אשׁ וְלֹא הָיָ֤ה לֶאֱלִיעֶזֶ֙ר בָּנִ֣ים אֲחֵרִ֔ים וּבְנֵ֥י רְחַבְיָ֖ה רָב֥וּ לְמָעְלָה 18 בְּנֵ֥י יִצְהָ֖ר שְׁלֹמוֹת הָרֹאשׁ 19 בְּנֵ֖י חֶבְר֑וֹן יְרִיָּ֤הוּ הָרֹאשׁ֙ אֲמַרְיָ֣ה הַשֵּׁנִ֔י יַחֲזִיאֵל הַשְּׁלִישִׁ֔י וִיקַמְעָם֖ הָרְבִיעִי 20 בְּנֵ֖י עֻזִּיאֵ֑ל מִיכָ֣ה הָרֹ֔אשׁ וְיִשִּׁיָּ֖ה הַשֵּׁנִי 21 בְּנֵ֤י מְרָרִי֙ מַחְלִ֣י וּמוּשִׁ֔י בְּנֵ֥י מַחְלִ֖י אֶלְעָזָ֥ר וְקִישׁ 22 וַיָּ֙מָת֙ אֶלְעָזָ֔ר וְלֹא הָ֥יוּ ל֛וֹ בָּנִ֖ים כִּ֣י אִם בָּנ֑וֹת וַיִּשָּׂא֥וּם בְּנֵי קִ֖ישׁ אֲחֵיהֶם 23 בְּנֵ֣י מוּשִׁ֗י מַחְלִ֥י וְעֵ֛דֶר וִירֵמ֖וֹת שְׁלוֹשָׁה 24 אֵ֣לֶּה בְנֵי לֵוִי֩ לְבֵ֨ית אֲבוֹתֵיהֶ֜ם רָאשֵׁ֧י הָאָב֣וֹת לִפְקוּדֵיהֶ֗ם בְּמִסְפַּ֤ר שֵׁמוֹת֙ לְגֻלְגְּלֹתָ֔ם עֹשֵׂי הַמְּלָאכָ֔ה לַעֲבֹדַ֖ת בֵּ֣ית יְהֹוַה מִבֶּ֛ן עֶשְׂרִ֥ים שָׁנָ֖ה וָמָעְלָה 25 כִּ֚י אָמַ֣ר דָּוִ֔יד הֵנִ֛יחַ יְהֹוַה אֱלֹהֵי יִשְׂרָאֵ֖ל לְעַמּ֑וֹ וַיִּשְׁכֹּ֥ן בִּירוּשָׁלֵם עַד לְעוֹלָם 26 וְגַ֖ם לַלְוִיִּ֑ם אֵין לָשֵׂ֧את אֶת הַמִּשְׁכָּ֛ן וְאֶת כָּל כֵּלָ֖יו לַעֲבֹדָתוֹ 27 כִּ֣י בְדִבְרֵ֤י דָוִיד֙ הָאַ֣חֲרוֹנִ֔ים הֵ֖מָּה מִסְפַּ֣ר בְּנֵי לֵוִ֑י מִבֶּ֛ן עֶשְׂרִ֥ים שָׁנָ֖ה וּלְמָעְלָה 28 כִּ֣י מַעֲמָדָ֞ם לְיַד בְּנֵ֣י אַהֲרֹ֗ן לַעֲבֹדַת בֵּ֣ית יְהֹוַה עַל הַחֲצֵרוֹת וְעַל הַלְּשָׁכ֔וֹת וְעַל טָהֳרַ֖ת לְכָל קֹ֑דֶשׁ וּמַעֲשֵׂה֔ עֲבֹדַ֖ת בֵּ֥ית הָאֱלֹהִים 29 וּלְלֶ֨חֶם הַמַּעֲרֶכֶ֜ת וּלְסֹ֤לֶת לְמִנְחָה֙ וְלִרְקִיקֵ֣י הַמַּצּ֔וֹת וְלַמַּחֲבַת֖ וְלַמֻּרְבָּ֑כֶת וּלְכָל מְשׂוּרָ֖ה וּמִדָּה 30 וְלַעֲמֹד בַּבֹּ֣קֶר בַּבֹּ֔קֶר לְהֹד֥וֹת וּלְהַלֵּ֖ל לַיהֹוַה וְכֵ֖ן לָעָרֶב 31 וּלְכֹ֨ל הַעֲל֤וֹת עֹלוֹת֙ לַיהֹוַה לַשַּׁ֨בָּת֔וֹת לֶחֳדָשִׁ֖ים וְלַמֹּעֲדִ֑ים בְּמִסְפָּ֨ר כְּמִשְׁפָּ֧ט עֲלֵיהֶ֛ם תָּמִ֖יד לִפְנֵ֥י יְהֹוָה 32 וְשָׁמְר֞וּ אֶת מִשְׁמֶ֣רֶת אֹהֶל מוֹעֵ֗ד וְאֵת֙ מִשְׁמֶ֣רֶת הַקֹּ֔דֶשׁ וּמִשְׁמֶ֕רֶת בְּנֵ֥י אַהֲרֹ֖ן אֲחֵיהֶ֑ם לַעֲבֹדַ֖ת בֵּ֥ית יְהֹוָה