Matched Mismatch Not in MapM
217 words: 204 matched, 13 mismatch, 0 missing
1 וַיַּ֤עַשׂ אָסָא֙ הַטּ֣וֹב וְהַיָּשָׁ֔ר בְּעֵינֵ֖י יְהֹוַה אֱלֹהָיו 2 וַיָּ֛סַר אֶת מִזְבְּח֥וֹת הַנֵּכָ֖ר וְהַבָּמ֑וֹת וַיְשַׁבֵּר֙ אֶת הַמַּצֵּב֔וֹת וַיְגַדַּ֖ע אֶת הָאֲשֵׁרִים 3 וַיֹּ֙אמֶר֙ לִיהוּדָה֔ לִדְר֕וֹשׁ אֶת יְהֹוַה אֱלֹהֵ֣י אֲבוֹתֵיהֶ֑ם וְלַעֲשׂ֖וֹת הַתּוֹרָ֥ה וְהַמִּצְוָה 4 וַיָּ֙סַר֙ מִכָּל עָרֵ֣י יְהוּדָ֔ה אֶת הַבָּמ֖וֹת וְאֶת הַחַמָּנִ֑ים וַתִּשְׁקֹ֥ט הַמַּמְלָכָ֖ה לְפָנָיו 5 וַיִּ֛בֶן עָרֵ֥י מְצוּרָ֖ה בִּיהוּדָה֑ כִּי שָׁקְטָ֣ה הָאָ֗רֶץ וְאֵין עִמּ֤וֹ מִלְחָמָה֙ בַּשָּׁנִ֣ים הָאֵ֔לֶּה כִּי הֵנִ֥יחַ יְהֹוַה לוֹ 6 וַיֹּ֨אמֶר לִיהוּדָ֜ה נִבְנֶ֣ה אֶת הֶעָרִ֣ים הָאֵ֗לֶּה וְנָסֵ֨ב חוֹמָ֣ה וּמִגְדָּלִים֮ דְּלָתַ֣יִם וּבְרִיחִים֒ עוֹדֶ֨נּוּ הָאָ֜רֶץ לְפָנֵ֗ינוּ כִּ֤י דָרַ֙שְׁנוּ֙ אֶת יְהֹוַה אֱלֹהֵ֔ינוּ דָּרַ֕שְׁנוּ וַיָּ֥נַח לָ֖נוּ מִסָּבִ֑יב וַיִּבְנ֖וּ וַיַּצְלִיחוּ 7 וַיְהִ֣י לְאָסָ֗א חַ֘יִל֮ נֹשֵׂ֣א צִנָּ֣ה וָרֹ֒מַח֒ מִיהוּדָה שְׁלֹ֣שׁ מֵא֣וֹת אֶ֔לֶף וּמִבִּנְיָמִ֗ן נֹשְׂאֵ֤י מָגֵן֙ וְדֹ֣רְכֵי קֶ֔שֶׁת מָאתַ֥יִם וּשְׁמוֹנִ֖ים אָ֑לֶף כָּל אֵ֖לֶּה גִּבּ֥וֹרֵי חָיִל 8 וַיֵּצֵ֨א אֲלֵיהֶ֜ם זֶ֣רַח הַכּוּשִׁ֗י בְּחַ֙יִל֙ אֶ֣לֶף אֲלָפִ֔ים וּמַרְכָּב֖וֹת שְׁלֹ֣שׁ מֵא֑וֹת וַיָּבֹ֖א עַד מָרֵשָׁה 9 וַיֵּצֵ֥א אָסָ֖א לְפָנָ֑יו וַיַּעַרְכוּ מִלְחָמָ֔ה בְּגֵ֥יא צָפוֹנָה לְמָרֵשָׁה 10 וַיִּקְרָ֨א אָסָ֜א אֶל יְהֹוַה אֱלֹהָיו֮ וַיֹּאמַר֒ יְהֹוַה אֵין עִמְּךָ֤ לַעְזֹר֙ בֵּ֥ין רַב֙ לְאֵ֣ין כֹּ֔חַ עָזְרֵ֜נוּ יְהֹוַה אֱלֹהֵ֙ינוּ֙ כִּי עָלֶ֣יךָ נִשְׁעַ֔נּוּ וּבְשִׁמְךָ֣ בָ֔אנוּ עַל הֶהָמ֖וֹן הַזֶּ֑ה יְהֹוַה אֱלֹהֵ֙ינוּ֙ אַ֔תָּה אַל יַעְצֹ֥ר עִמְּךָ֖ אֱנוֹשׁ 11 וַיִּגֹּ֤ף יְהֹוַה אֶת הַכּוּשִׁ֔ים לִפְנֵ֥י אָסָ֖א וְלִפְנֵ֣י יְהוּדָ֑ה וַיָּנֻ֖סוּ הַכּוּשִׁים 12 וַיִּרְדְּפֵ֨ם אָסָ֜א וְהָעָ֣ם אֲשֶׁר עִמּוֹ֮ עַד לִגְרָר֒ וַיִּפֹּ֤ל מִכּוּשִׁים֙ לְאֵ֣ין לָהֶ֣ם מִחְיָה֔ כִּי נִשְׁבְּר֥וּ לִפְנֵי יְהֹוַה וְלִפְנֵ֣י מַחֲנֵ֑הוּ וַיִּשְׂא֥וּ שָׁלָ֖ל הַרְבֵּ֥ה מְאֹד 13 וַיַּכּ֗וּ אֵ֤ת כָּל הֶעָרִים֙ סְבִיב֣וֹת גְּרָ֔ר כִּי הָיָ֥ה פַחַד יְהֹוַה עֲלֵיהֶ֑ם וַיָּבֹ֙זּוּ֙ אֶת כָּל הֶ֣עָרִ֔ים כִּי בִזָּ֥ה רַבָּ֖ה הָיְתָ֥ה בָהֶם 14 וְגַם אָהֳלֵ֥י מִקְנֶ֖ה הִכּ֑וּ וַיִּשְׁבּ֨וּ צֹ֤אן לָרֹב֙ וּגְמַלִּ֔ים וַיָּשֻׁ֖בוּ יְרוּשָׁלֵם