Matched Mismatch Not in MapM
327 words: 317 matched, 10 mismatch, 0 missing
1 וַיִּסְפֹּ֨ר שְׁלֹמֹ֜ה שִׁבְעִ֥ים אֶ֙לֶף֙ אִ֣ישׁ סַבָּ֔ל וּשְׁמוֹנִ֥ים אֶ֛לֶף אִ֖ישׁ חֹצֵ֣ב בָּהָ֑ר וּמְנַצְּחִ֣ים עֲלֵיהֶ֔ם שְׁלֹ֥שֶׁת אֲלָפִ֖ים וּשְׁלֹשׁ מֵאוֹת 2 וַיִּשְׁלַ֣ח שְׁלֹמֹ֔ה אֶל חוּרָ֥ם מֶלֶךְ צֹ֖ר לֵאמֹ֑ר כַּאֲשֶׁ֤ר עָשִׂ֙יתָ֙ עִם דָּוִ֣יד אָבִ֔י וַתִּשְׁלַח ל֣וֹ אֲרָזִ֔ים לִבְנוֹת ל֥וֹ בַ֖יִת לָשֶׁ֥בֶת בּוֹ 3 הִנֵּה֩ אֲנִ֨י בוֹנֶה בַּ֜יִת לְשֵׁ֣ם יְהֹוַה אֱלֹהָ֗י לְהַקְדִּ֣ישׁ ל֡וֹ לְהַקְטִ֣יר לְפָנָ֣יו קְטֹרֶת סַמִּים֩ וּמַעֲרֶ֨כֶת תָּמִ֤יד וְעֹלוֹת֙ לַבֹּ֣קֶר וְלָעֶ֔רֶב לַשַּׁבָּתוֹת֙ וְלֶ֣חֳדָשִׁ֔ים וּלְמוֹעֲדֵי֖ יְהֹוַה אֱלֹהֵ֑ינוּ לְעוֹלָ֖ם זֹ֥את עַל יִשְׂרָאֵל 4 וְהַבַּ֛יִת אֲשֶׁר אֲנִ֥י בוֹנֶ֖ה גָּד֑וֹל כִּי גָד֥וֹל אֱלֹהֵ֖ינוּ מִכָּל הָאֱלֹהִים 5 וּמִ֤י יַעֲצָר כֹּ֙חַ֙ לִבְנוֹת ל֣וֹ בַ֔יִת כִּ֧י הַשָּׁמַ֛יִם וּשְׁמֵ֥י הַשָּׁמַ֖יִם לֹ֣א יְכַלְכְּלֻ֑הוּ וּמִ֤י אֲנִי֙ אֲשֶׁ֣ר אֶבְנֶה לּ֣וֹ בַ֔יִת כִּ֖י אִם לְהַקְטִ֥יר לְפָנָיו 6 וְעַתָּ֡ה שְׁלַח לִ֣י אִישׁ חָכָ֡ם לַעֲשׂוֹת֩ בַּזָּהָ֨ב וּבַכֶּ֜סֶף וּבַנְּחֹ֣שֶׁת וּבַבַּרְזֶ֗ל וּבָאַרְגְּוָן וְכַרְמִ֣יל וּתְכֵ֔לֶת וְיֹדֵ֖עַ לְפַתֵּ֣חַ פִּתּוּחִ֑ים עִם הַחֲכָמִ֗ים אֲשֶׁ֤ר עִמִּי֙ בִּיהוּדָ֣ה וּבִירוּשָׁלֵם אֲשֶׁ֥ר הֵכִ֖ין דָּוִ֥יד אָבִי 7 וּשְׁלַח לִי֩ עֲצֵ֨י אֲרָזִ֜ים בְּרוֹשִׁ֣ים וְאַלְגּוּמִּים֮ מֵהַלְּבָנוֹן כִּ֚י אֲנִ֣י יָדַ֔עְתִּי אֲשֶׁ֤ר עֲבָדֶ֙יךָ֙ יוֹדְעִי֔ם לִכְר֖וֹת עֲצֵ֣י לְבָנ֑וֹן וְהִנֵּ֥ה עֲבָדַ֖י עִם עֲבָדֶיךָ 8 וּלְהָכִ֥ין לִ֛י עֵצִ֖ים לָרֹ֑ב כִּ֥י הַבַּ֛יִת אֲשֶׁר אֲנִ֥י בוֹנֶ֖ה גָּד֥וֹל וְהַפְלֵא 9 וְהִנֵּ֣ה לַחֹטְבִי֣ם לְכֹרְתֵי֣ הָעֵצִ֡ים נָתַ֩תִּי֩ חִטִּ֨ים מַכּוֹלֶת לַעֲבָדֶ֗יךָ כֹּרִים֙ עֶשְׂרִ֣ים אֶ֔לֶף וּשְׂעֹרִ֕ים כֹּרִ֖ים עֶשְׂרִ֣ים אָ֑לֶף וְיַ֗יִן בַּתִּים֙ עֶשְׂרִ֣ים אֶ֔לֶף וְשֶׁ֕מֶן בַּתִּ֖ים עֶשְׂרִ֥ים אָלֶף 10 וַיֹּ֨אמֶר חוּרָ֤ם מֶלֶךְ צֹר֙ בִּכְתָ֔ב וַיִּשְׁלַ֖ח אֶל שְׁלֹמֹ֑ה בְּאַהֲבַ֤ת יְהֹוַה אֶת עַמּ֔וֹ נְתָנְךָ֥ עֲלֵיהֶ֖ם לְמֶלֶךְ 11 וַיֹּ֘אמֶר֮ חוּרָם֒ בָּר֤וּךְ יְהֹוַה אֱלֹהֵ֣י יִשְׂרָאֵ֔ל אֲשֶׁ֣ר עָשָׂ֔ה אֶת הַשָּׁמַ֖יִם וְאֶת הָאָ֑רֶץ אֲשֶׁ֣ר נָתַן֩ לְדָוִ֨יד הַמֶּ֜לֶךְ בֵּ֣ן חָכָ֗ם יוֹדֵ֙עַ֙ שֵׂ֣כֶל וּבִינָ֔ה אֲשֶׁ֤ר יִבְנֶה בַּ֙יִת֙ לַיהֹוַה וּבַ֖יִת לְמַלְכוּתוֹ 12 וְעַתָּ֗ה שָׁלַ֧חְתִּי אִישׁ חָכָ֛ם יוֹדֵ֥עַ בִּינָ֖ה לְחוּרָ֥ם אָבִי 13 בֶּן אִשָּׁ֞ה מִן בְּנ֣וֹת דָּ֗ן וְאָבִ֣יו אִישׁ צֹרִ֡י יוֹדֵ֡עַ לַעֲשׂ֣וֹת בַּזָּהָב וּ֠בַכֶּ֠סֶף בַּנְּחֹ֨שֶׁת בַּבַּרְזֶ֜ל בָּאֲבָנִ֣ים וּבָעֵצִ֗ים בָּאַרְגָּמָ֤ן בַּתְּכֵ֙לֶת֙ וּבַבּ֣וּץ וּבַכַּרְמִ֔יל וּלְפַתֵּ֙חַ֙ כָּל פִּתּ֔וּחַ וְלַחְשֹׁ֖ב כָּל מַחֲשָׁבֶ֑ת אֲשֶׁ֤ר יִנָּתֶן לוֹ֙ עִם חֲכָמֶ֔יךָ וְחַכְמֵי֔ אֲדֹנִ֖י דָּוִ֥יד אָבִיךָ 14 וְ֠עַתָּ֠ה הַחִטִּ֨ים וְהַשְּׂעֹרִ֜ים הַשֶּׁ֤מֶן וְהַיַּ֙יִן֙ אֲשֶׁ֣ר אָמַ֣ר אֲדֹנִ֔י יִשְׁלַ֖ח לַעֲבָדָיו 15 וַ֠אֲנַ֠חְנוּ נִכְרֹ֨ת עֵצִ֤ים מִן הַלְּבָנוֹן֙ כְּכָל צָרְכֶּ֔ךָ וּנְבִיאֵ֥ם לְךָ֛ רַפְסֹד֖וֹת עַל יָ֣ם יָפ֑וֹ וְאַתָּ֛ה תַּעֲלֶ֥ה אֹתָ֖ם יְרוּשָׁלֵם 16 וַיִּסְפֹּ֣ר שְׁלֹמֹ֗ה כָּל הָאֲנָשִׁ֤ים הַגֵּירִים֙ אֲשֶׁר֙ בְּאֶ֣רֶץ יִשְׂרָאֵ֔ל אַחֲרֵ֣י הַסְּפָ֔ר אֲשֶׁ֥ר סְפָרָ֖ם דָּוִ֣יד אָבִ֑יו וַיִּמָּצְאוּ֗ מֵאָ֤ה וַחֲמִשִּׁים֙ אֶ֔לֶף וּשְׁלֹ֥שֶׁת אֲלָפִ֖ים וְשֵׁ֥שׁ מֵאוֹת 17 וַיַּ֨עַשׂ מֵהֶ֜ם שִׁבְעִ֥ים אֶ֙לֶף֙ סַבָּ֔ל וּשְׁמֹנִ֥ים אֶ֖לֶף חֹצֵ֣ב בָּהָ֑ר וּשְׁלֹ֤שֶׁת אֲלָפִים֙ וְשֵׁ֣שׁ מֵא֔וֹת מְנַצְּחִ֖ים לְהַעֲבִ֥יד אֶת הָעָם