Matched Mismatch Not in MapM
223 words: 217 matched, 6 mismatch, 0 missing
1 מֹאזְנֵ֣י מִ֭רְמָה תּוֹעֲבַ֣ת יַהְוֶה וְאֶ֖בֶן שְׁלֵמָ֣ה רְצוֹנוֹ 2 בָּא זָ֭דוֹן וַיָּבֹ֣א קָל֑וֹן וְאֶת צְנוּעִ֥ים חָכְמָה 3 תֻּמַּ֣ת יְשָׁרִ֣ים תַּנְחֵ֑ם וְסֶ֖לֶף בֹּגְדִ֣ים יְשָׁדֵּם 4 לֹא יוֹעִ֣יל ה֭וֹן בְּי֣וֹם עֶבְרָ֑ה וּ֝צְדָקָ֗ה תַּצִּ֥יל מִמָּוֶת 5 צִדְקַ֣ת תָּ֭מִים תְּיַשֵּׁ֣ר דַּרְכּ֑וֹ וּ֝בְרִשְׁעָת֗וֹ יִפֹּ֥ל רָשָׁע 6 צִדְקַ֣ת יְ֭שָׁרִים תַּצִּילֵ֑ם וּבְהַוָּתָם בֹּגְדִ֥ים יִלָּכֵדוּ 7 בְּמ֤וֹת אָדָ֣ם רָ֭שָׁע תֹּאבַ֣ד תִּקְוָ֑ה וְתוֹחֶ֖לֶת אוֹנִ֣ים אָבָדָה 8 צַ֭דִּיק מִצָּרָ֣ה נֶחֱלָ֑ץ וַיָּבֹ֖א רָשָׁ֣ע תַּחְתָּיו 9 בְּפֶ֗ה חָ֭נֵף יַשְׁחִ֣ת רֵעֵ֑הוּ וּ֝בְדַ֗עַת צַדִּיקִ֥ים יֵחָלֵצוּ 10 בְּט֣וּב צַ֭דִּיקִים תַּעֲלֹ֣ץ קִרְיָ֑ה וּבַאֲבֹ֖ד רְשָׁעִ֣ים רִנָּה 11 בְּבִרְכַּ֣ת יְ֭שָׁרִים תָּר֣וּם קָ֑רֶת וּבְפִ֥י רְ֝שָׁעִ֗ים תֵּהָרֵס 12 בָּז לְרֵעֵ֥הוּ חֲסַר לֵ֑ב וְאִ֖ישׁ תְּבוּנ֣וֹת יַחֲרִישׁ 13 הוֹלֵ֣ךְ רָ֭כִיל מְגַלֶּה סּ֑וֹד וְנֶאֱמַן ר֝֗וּחַ מְכַסֶּ֥ה דָבָר 14 בְּאֵ֣ין תַּ֭חְבֻּלוֹת יִפָּל עָ֑ם וּ֝תְשׁוּעָ֗ה בְּרֹ֣ב יוֹעֵץ 15 רַע יֵ֭רוֹעַ כִּי עָ֣רַב זָ֑ר וְשֹׂנֵ֖א תֹקְעִ֣ים בּוֹטֵחַ 16 אֵשֶׁת חֵ֭ן תִּתְמֹ֣ךְ כָּב֑וֹד וְ֝עָרִיצִ֗ים יִתְמְכוּ עֹשֶׁר 17 גֹּמֵ֣ל נַ֭פְשׁוֹ אִ֣ישׁ חָ֑סֶד וְעֹכֵ֥ר שְׁ֝אֵר֗וֹ אַכְזָרִי 18 רָשָׁ֗ע עֹשֶׂ֥ה פְעֻלַּת שָׁ֑קֶר וְזֹרֵ֥עַ צְ֝דָקָ֗ה שֶׂ֣כֶר אֱמֶת 19 כֵּן צְדָקָ֥ה לְחַיִּ֑ים וּמְרַדֵּ֖ף רָעָ֣ה לְמוֹתוֹ 20 תּוֹעֲבַ֣ת יַהְוֶה עִקְּשֵׁי לֵ֑ב וּ֝רְצוֹנ֗וֹ תְּמִ֣ימֵי דָרֶךְ 21 יָ֣ד לְ֭יָד לֹא יִנָּ֣קֶה רָּ֑ע וְזֶ֖רַע צַדִּיקִ֣ים נִמְלָט 22 נֶ֣זֶם זָ֭הָב בְּאַ֣ף חֲזִ֑יר אִשָּׁ֥ה יָ֝פָ֗ה וְסָ֣רַת טָעַם 23 תַּאֲוַ֣ת צַדִּיקִ֣ים אַךְ ט֑וֹב תִּקְוַ֖ת רְשָׁעִ֣ים עֶבְרָה 24 יֵ֣שׁ מְ֭פַזֵּר וְנוֹסָ֥ף ע֑וֹד וְחֹשֵׂ֥ךְ מִ֝יֹּ֗שֶׁר אַךְ לְמַחְסוֹר 25 נֶפֶשׁ בְּרָכָ֥ה תְדֻשָּׁ֑ן וּ֝מַרְוֶ֗ה גַּם ה֥וּא יוֹרֶא 26 מֹ֣נֵעַ בָּ֭ר יִקְּבֻ֣הוּ לְא֑וֹם וּ֝בְרָכָ֗ה לְרֹ֣אשׁ מַשְׁבִּיר 27 שֹׁ֣חֵר ט֭וֹב יְבַקֵּ֣שׁ רָצ֑וֹן וְדֹרֵ֖שׁ רָעָ֣ה תְבוֹאֶנּוּ 28 בּוֹטֵ֣חַ בְּ֭עָשְׁרוֹ ה֣וּא יִפּ֑וֹל וְ֝כֶעָלֶ֗ה צַדִּיקִ֥ים יִפְרָחוּ 29 עֹכֵ֣ר בֵּ֭יתוֹ יִנְחַל ר֑וּחַ וְיַעֲבֹד אֱ֝וִ֗יל לַחֲכַם לֵב 30 פְּרִי צַ֭דִּיק עֵ֣ץ חַיִּ֑ים וְלֹקֵ֖חַ נְפָשׁ֣וֹת חָמָס 31 הֵ֣ן צַ֭דִּיק בָּאָ֣רֶץ יְשֻׁלָּ֑ם אַ֝֗ף כִּי רָשָׁ֥ע וְחוֹטֵא