Matched Mismatch Not in MapM
257 words: 241 matched, 16 mismatch, 0 missing
1 הֲלֹא חָכְמָ֥ה תִקְרָ֑א וּ֝תְבוּנָ֗ה תִּתֵּ֥ן קוֹלָהּ 2 בְּרֹאשׁ מְרֹמִ֥ים עֲלֵי דָ֑רֶךְ בֵּ֖ית נְתִיב֣וֹת נִצָּבָה 3 לְיַד שְׁעָרִ֥ים לְפִי קָ֑רֶת מְב֖וֹא פְתָחִ֣ים תָּרֹנָּה 4 אֲלֵיכֶ֣ם אִישִׁ֣ים אֶקְרָ֑א וְ֝קוֹלִ֗י אֶל בְּנֵ֥י אָדָם 5 הָבִ֣ינוּ פְתָאיִ֣ם עָרְמָ֑ה וּ֝כְסִילִ֗ים הָכִינוּ לֵב 6 שִׁ֭מְעוּ כִּי נְגִידִ֣ים אֲדַבֵּ֑ר וּמִפְתַּ֥ח שְׂ֝פָתַ֗י מֵישָׁרִים 7 כִּי אֱ֭מֶת יֶהְגֶּ֣ה חִכִּ֑י וְתוֹעֲבַ֖ת שְׂפָתַ֣י רֶשַׁע 8 בְּצֶ֥דֶק כָּל אִמְרֵי פִ֑י אֵ֥ין בָּ֝הֶ֗ם נִפְתָּ֥ל וְעִקֵּשׁ 9 כֻּלָּ֣ם נְ֭כֹחִים לַמֵּבִ֑ין וִ֝ישָׁרִ֗ים לְמֹ֣צְאֵי דָעַת 10 קְחוּ מוּסָרִ֥י וְאַל כָּ֑סֶף וְ֝דַ֗עַת מֵחָר֥וּץ נִבְחָר 11 כִּי טוֹבָ֣ה חָ֭כְמָה מִפְּנִינִ֑ים וְכָל חֲ֝פָצִ֗ים לֹ֣א יִשְׁווּ בָהּ 12 אֲנִי חָ֭כְמָה שָׁכַ֣נְתִּי עָרְמָ֑ה וְדַ֖עַת מְזִמּ֣וֹת אֶמְצָא 13 יִ֥רְאַ֣ת יַהְוֶה שְׂנֹא֫ת רָ֥ע גֵּ֘אָ֤ה וְגָא֨וֹן וְדֶ֣רֶךְ רָ֭ע וּפִ֨י תַהְפֻּכ֬וֹת שָׂנֵאתִי 14 לִי עֵ֭צָה וְתוּשִׁיָּ֑ה אֲנִ֥י בִ֝ינָ֗ה לִ֣י גְבוּרָה 15 בִּ֭י מְלָכִ֣ים יִמְלֹ֑כוּ וְ֝רֹזְנִ֗ים יְחֹ֣קְקוּ צֶדֶק 16 בִּ֭י שָׂרִ֣ים יָשֹׂ֑רוּ וּ֝נְדִיבִ֗ים יִשְׁפְּטוּ אָרֶץ 17 אֲ֭נִי אֹהֲבַי אֵהָב וּמְשַׁחֲרַי יִמְצָאֻנְנִי 18 עֹשֶׁר וְכָב֥וֹד אִתִּ֑י ה֥וֹן עָ֝תֵ֗ק וּצְדָקָה 19 ט֣וֹב פִּ֭רְיִי מֵחָר֣וּץ וּמִפָּ֑ז וּ֝תְבוּאָתִ֗י מִכֶּ֥סֶף נִבְחָר 20 בְּאֹרַח צְדָקָ֥ה אֲהַלֵּ֑ךְ בְּ֝ת֗וֹךְ נְתִיב֥וֹת מִשְׁפָּט 21 לְהַנְחִ֖יל אֹהֲבַ֥י יֵ֑שׁ וְאֹצְרֹ֖תֵיהֶ֣ם אֲמַלֵּא 22 יַהְוֶה קָ֭נָנִי רֵאשִׁ֣ית דַּרְכּ֑וֹ קֶ֖דֶם מִפְעָלָ֣יו מֵאָז 23 מֵ֭עוֹלָם נִסַּ֥כְתִּי מֵרֹ֗אשׁ מִקַּדְמֵי אָרֶץ 24 בְּאֵין תְּהֹמ֥וֹת חוֹלָ֑לְתִּי בְּאֵ֥ין מַ֝עְיָנ֗וֹת נַבְכֵי מָיִם 25 בְּטֶ֣רֶם הָרִ֣ים הָטְבָּ֑עוּ לִפְנֵ֖י גְבָע֣וֹת חוֹלָלְתִּי 26 עַד לֹ֣א עָ֭שָׂה אֶ֣רֶץ וְחוּצ֑וֹת וְ֝רֹ֗אשׁ עָפְרוֹת תֵּבֵל 27 בַּהֲכִינ֣וֹ שָׁ֭מַיִם שָׁ֣ם אָ֑נִי בְּחֻ֥קוֹ ח֝֗וּג עַל פְּנֵ֥י תְהוֹם 28 בְּאַמְּצ֣וֹ שְׁחָקִ֣ים מִמָּ֑עַל בַּ֝עֲז֗וֹז עִינ֥וֹת תְּהוֹם 29 בְּשׂ֘וּמ֤וֹ לַיָּ֨ם חֻקּ֗וֹ וּ֭מַיִם לֹ֣א יַעַבְרוּ פִ֑יו בְּ֝חוּק֗וֹ מ֣וֹסְדֵי אָרֶץ 30 וָאֶהְיֶ֥ה אֶצְל֗וֹ אָ֫מ֥וֹן וָאֶהְיֶ֣ה שַׁ֭עֲשׁוּעִים י֤וֹם י֑וֹם מְשַׂחֶ֖קֶת לְפָנָ֣יו בְּכָל עֵת 31 מְ֭שַׂחֶקֶת בְּתֵבֵ֣ל אַרְצ֑וֹ וְ֝שַׁעֲשֻׁעַ֗י אֶת בְּנֵ֥י אָדָם 32 וְעַתָּ֣ה בָ֭נִים שִׁמְעוּ לִ֑י וְ֝אַשְׁרֵ֗י דְּרָכַ֥י יִשְׁמֹרוּ 33 שִׁמְע֖וּ מוּסָ֥ר וַחֲכָ֗מוּ וְאַל תִּפְרָעוּ 34 אַ֥שְׁרֵי אָדָם֮ שֹׁמֵ֢עַ לִ֥י לִשְׁקֹ֣ד עַל דַּ֭לְתֹתַי י֤וֹם י֑וֹם לִ֝שְׁמֹ֗ר מְזוּזֹ֥ת פְּתָחָי 35 כִּ֣י מֹ֭צְאִי מֹצְאֵי חַיִּים וַיָּפֶק רָצוֹן מִיַּהְוֶה 36 וְחֹ֭טְאִי חֹמֵ֣ס נַפְשׁ֑וֹ כָּל מְ֝שַׂנְאַ֗י אָ֣הֲבוּ מָוֶת