Matched Mismatch Not in MapM
258 words: 218 matched, 40 mismatch, 0 missing
1 בְּ֭נִי תּוֹרָתִ֣י אַל תִּשְׁכָּ֑ח וּ֝מִצְוֺתַ֗י יִצֹּ֥ר לִבֶּךָ 2 כִּ֤י אֹ֣רֶךְ יָ֭מִים וּשְׁנ֣וֹת חַיִּ֑ים וְ֝שָׁל֗וֹם יוֹסִ֥יפוּ לָךְ 3 חֶ֥סֶד וֶאֱמֶ֗ת אַל יַ֫עַזְבֻ֥ךָ קָשְׁרֵ֥ם עַל גַּרְגְּרוֹתֶ֑יךָ כָּ֝תְבֵ֗ם עַל ל֥וּחַ לִבֶּךָ 4 וּמְצָא חֵ֥ן וְשֵׂכֶל ט֑וֹב בְּעֵינֵ֖י אֱלֹהִ֣ים וְאָדָם 5 בְּטַ֣ח אֶל יַהְוֶה בְּכָל לִבֶּ֑ךָ וְאֶל בִּ֥֝ינָתְךָ֗ אַל תִּשָּׁעֵן 6 בְּכָל דְּרָכֶ֥יךָ דָעֵ֑הוּ וְ֝ה֗וּא יְיַשֵּׁ֥ר אֹרְחֹתֶיךָ 7 אַל תְּהִ֣י חָכָ֣ם בְּעֵינֶ֑יךָ יְרָ֥א אֶת יַהְוֶה וְס֣וּר מֵרָע 8 רִ֭פְאוּת תְּהִ֣י לְשֵׁרֶךָ וְ֝שִׁקּ֗וּי לְעַצְמוֹתֶיךָ 9 כַּבֵּ֣ד אֶת יַהְוֶה מֵהוֹנֶ֑ךָ וּ֝מֵרֵאשִׁ֗ית כָּל תְּבוּאָתֶךָ 10 וְיִמָּלְא֣וּ אֲסָמֶ֣יךָ שָׂבָ֑ע וְ֝תִיר֗וֹשׁ יְקָבֶ֥יךָ יִפְרֹצוּ 11 מוּסַ֣ר יַהְוֶה בְּנִ֣י אַל תִּמְאָ֑ס וְאַל תָּ֝קֹ֗ץ בְּתוֹכַחְתּוֹ 12 כִּ֤י אֵת אֲשֶׁ֣ר יֶאֱהַ֣ב יַהְוֶה יוֹכִ֑יחַ וְכֵאֵב אֶת בֵּ֥ן יִרְצֶה 13 אַשְׁרֵ֣י אָ֭דָם מָצָ֣א חָכְמָ֑ה וְ֝אָדָ֗ם יָפִ֥יק תְּבוּנָה 14 כִּ֤י ט֣וֹב סַ֭חְרָהּ מִסְּחַר כָּ֑סֶף וּ֝מֵחָר֗וּץ תְּבוּאָתָהּ 15 יְקָ֣רָה הִ֭יא מִפְּנִינִים וְכָל חֲפָצִים לֹא יִשְׁווּ בָהּ 16 אֹ֣רֶךְ יָ֭מִים בִּימִינָהּ֑ בִּ֝שְׂמֹאולָ֗הּ עֹ֣שֶׁר וְכָבוֹד 17 דְּרָכֶ֥יהָ דַרְכֵי נֹ֑עַם וְכָל נְתִ֖יבוֹתֶ֣יהָ שָׁלוֹם 18 עֵץ חַיִּ֣ים הִ֭יא לַמַּחֲזִיקִ֣ים בָּ֑הּ וְתֹמְכֶי֥הָ מְאֻשָּׁר 19 יַהְוֶה בְּחָכְמָ֥ה יָסַד אָ֑רֶץ כּוֹנֵ֥ן שָׁ֝מַ֗יִם בִּתְבוּנָה 20 בְּ֭דַעְתּוֹ תְּהוֹמ֣וֹת נִבְקָ֑עוּ וּ֝שְׁחָקִ֗ים יִרְעֲפוּ טָל 21 בְּ֭נִי אַל יָלֻ֣זוּ מֵעֵינֶ֑יךָ נְצֹ֥ר תֻּ֝שִׁיָּ֗ה וּמְזִמָּה 22 וְיִהְיוּ֣ חַיִּ֣ים לְנַפְשֶׁ֑ךָ וְ֝חֵ֗ן לְגַרְגְּרֹתֶיךָ 23 אָ֤ז תֵּלֵ֣ךְ לָבֶ֣טַח דַּרְכֶּ֑ךָ וְ֝רַגְלְךָ֗ לֹ֣א תִגּוֹף 24 אִם תֵּשֵׁב לֹא תִפְחָ֑ד וְ֝שָׁכַבְתָּ֗ וְעָרְבָה֥ שְׁנָתֶךָ 25 אַל תִּ֭ירָא מִפַּ֣חַד פִּתְאֹ֑ם וּמִשֹּׁאַ֥ת רְ֝שָׁעִ֗ים כִּ֣י תָבֹא 26 כִּי יַהְוֶה יִהְיֶה֣ בְכִסְלֶ֑ךָ וְשָׁמַ֖ר רַגְלְךָ֣ מִלָּכֶד 27 אַל תִּמְנַע ט֥וֹב מִבְּעָלָ֑יו בִּהְיוֹ֨ת לְאֵ֖ל יָדְךָ לַעֲשׂוֹת 28 אַל תֹּ֘אמַ֤ר לְרֵעֲךָ לֵךְ וָשׁוּב וּמָחָר אֶתֵּן וְיֵשׁ אִתָּךְ 29 אַל תַּחֲרֹ֣שׁ עַל רֵעֲךָ֣ רָעָ֑ה וְהוּא יוֹשֵׁ֖ב לָבֶ֣טַח אִתָּךְ 30 אַל תָּרוֹב עִם אָדָם חִנָּם אִם לֹא גְמָלְךָ רָעָה 31 אַל תְּ֭קַנֵּא בְּאִ֣ישׁ חָמָ֑ס וְאַל תִּ֝בְחַ֗ר בְּכָל דְּרָכָיו 32 כִּ֤י תוֹעֲבַ֣ת יַהְוֶה נָל֑וֹז וְאֶת יְשָׁרִ֥ים סוֹדוֹ 33 מְאֵרַ֣ת יַהְוֶה בְּבֵ֣ית רָשָׁ֑ע וּנְוֵ֖ה צַדִּיקִ֣ים יְבָרֵךְ 34 אִם לַלֵּצִ֥ים הוּא יָלִ֑יץ וְלַעֲנִיִּים יִתֶּן חֵן 35 כָּ֭בוֹד חֲכָמִ֣ים יִנְחָ֑לוּ וּ֝כְסִילִ֗ים מְרִימִים קָלוֹן