Matched Mismatch Not in MapM
432 words: 404 matched, 27 mismatch, 1 missing
1 וַיְהִי בַּיָּמִ֣ים הָהֵ֔ם וַיִּקְבְּצ֨וּ פְלִשְׁתִּ֤ים אֶת מַחֲנֵיהֶם לַצָּבָ֔א לְהִלָּחֵ֖ם בְּיִשְׂרָאֵ֑ל וַיֹּ֤אמֶר אָכִישׁ֙ אֶל דָּוִ֔ד יָדֹ֣עַ תֵּדַ֗ע כִּ֤י אִתִּי֙ תֵּצֵ֣א בַמַּחֲנֶה֔ אַתָּ֖ה וַאֲנָשֶׁיךָ 2 וַיֹּ֤אמֶר דָּוִד֙ אֶל אָכִ֔ישׁ לָכֵן֙ עַתָּה תֵדַ֔ע אֵ֥ת אֲשֶׁר יַעֲשֶׂ֖ה עַבְדֶּ֑ךָ וַיֹּ֤אמֶר אָכִישׁ֙ אֶל דָּוִ֔ד לָכֵ֗ן שֹׁמֵ֧ר לְרֹאשִׁ֛י אֲשִׂימְךָ כָּל הַיָּמִים 3 וּשְׁמוּאֵ֣ל מֵ֔ת וַיִּסְפְּדוּ לוֹ֙ כָּל יִשְׂרָאֵ֔ל וַיִּקְבְּרֻ֥הוּ בָרָמָ֖ה בְּעִירוֹ וְשָׁא֗וּל הֵסִ֛יר הָאֹב֥וֹת וְאֶת הַיִּדְּעֹנִ֖ים מֵהָאָרֶץ 4 וַיִּקָּבְצ֣וּ פְלִשְׁתִּ֔ים וַיָּבֹ֖אוּ וַיַּחֲנ֣וּ בְשׁוּנֵ֑ם וַיִּקְבֹּ֤ץ שָׁאוּל֙ אֶת כָּל יִשְׂרָאֵ֔ל וַיַּחֲנוּ֖ בַּגִּלְבֹּעַ 5 וַיַּ֥רְא שָׁא֖וּל אֶת מַחֲנֵ֣ה פְלִשְׁתִּ֑ים וַיִּרָ֕א וַיֶּחֱרַ֥ד לִבּ֖וֹ מְאֹד 6 וַיִּשְׁאַ֤ל שָׁאוּל֙ בְּיַהְוֶה וְלֹ֥א עָנָ֖הוּ יַהְוֶה גַּ֧ם בַּחֲלֹמ֛וֹת גַּ֥ם בָּאוּרִ֖ים גַּ֥ם בַּנְּבִיאִם 7 וַיֹּ֨אמֶר שָׁא֜וּל לַעֲבָדָ֗יו בַּקְּשׁוּ לִי֙ אֵ֣שֶׁת בַּעֲלַת א֔וֹב וְאֵלְכָ֥ה אֵלֶ֖יהָ וְאֶדְרְשָׁה בָּ֑הּ וַיֹּאמְר֤וּ עֲבָדָיו֙ אֵלָ֔יו הִנֵּ֛ה אֵ֥שֶׁת בַּעֲלַת א֖וֹב בְּעֵ֥ין דּוֹר 8 וַיִּתְחַפֵּ֣שׂ שָׁא֗וּל וַיִּלְבַּשׁ֙ בְּגָדִ֣ים אֲחֵרִ֔ים וַיֵּ֣לֶךְ ה֗וּא וּשְׁנֵ֤י אֲנָשִׁים֙ עִמּ֔וֹ וַיָּבֹ֥אוּ אֶל הָאִשָּׁ֖ה לָ֑יְלָה וַיֹּ֗אמֶר קָסוֹמִי נָא לִי בָּאוֹב וְהַעֲלִי לִי אֵת אֲשֶׁר אֹמַר אֵלָיִךְ 9 וַתֹּ֨אמֶר הָאִשָּׁ֜ה אֵלָ֗יו הִנֵּ֨ה אַתָּ֤ה יָדַ֙עְתָּ֙ אֵ֣ת אֲשֶׁר עָשָׂ֣ה שָׁא֔וּל אֲשֶׁ֥ר הִכְרִ֛ית אֶת הָאֹב֥וֹת וְאֶת הַיִּדְּעֹנִים מִן הָאָ֑רֶץ וְלָמָ֥ה אַתָּ֛ה מִתְנַקֵּ֥שׁ בְּנַפְשִׁ֖י לַהֲמִיתֵנִי 10 וַיִּשָּׁ֤בַע לָהּ֙ שָׁא֔וּל בְּיַהְוֶה לֵאמֹ֑ר חַי יַהְוֶה אִם יִקְּרֵ֥ךְ עָוֺ֖ן בַּדָּבָ֥ר הַזֶּה 11 וַתֹּ֙אמֶר֙ הָאִשָּׁ֔ה אֶת מִ֖י אַעֲלֶה לָּ֑ךְ וַיֹּ֕אמֶר אֶת שְׁמוּאֵ֖ל הַעֲלִי לִי 12 וַתֵּ֤רֶא הָאִשָּׁה֙ אֶת שְׁמוּאֵ֔ל וַתִּזְעַ֖ק בְּק֣וֹל גָּד֑וֹל וַתֹּ֩אמֶר֩ הָאִשָּׁ֨ה אֶל שָׁא֧וּל לֵאמֹ֛ר לָ֥מָּה רִמִּיתָ֖נִי וְאַתָּ֥ה שָׁאוּל 13 וַיֹּ֨אמֶר לָ֥הּ הַמֶּ֛לֶךְ אַל תִּירְאִי֖ כִּ֣י מָ֣ה רָאִ֑ית וַתֹּ֤אמֶר הָאִשָּׁה֙ אֶל שָׁא֔וּל אֱלֹהִ֥ים רָאִ֖יתִי עֹלִ֥ים מִן הָאָרֶץ 14 וַיֹּ֤אמֶר לָהּ֙ מַה תָּאֳר֔וֹ וַתֹּ֗אמֶר אִ֤ישׁ זֹקֵף עֹלֶ֔ה וְה֥וּא עֹטֶ֖ה מְעִ֑יל וַיֵּ֤דַע שָׁאוּל֙ כִּי שְׁמוּאֵ֣ל ה֔וּא וַיִּקֹּ֥ד אַפַּ֛יִם אַ֖רְצָה וַיִּשְׁתָּחוּ 15 וַיֹּ֤אמֶר שְׁמוּאֵל֙ אֶל שָׁא֔וּל לָ֥מָּה הִרְגַּזְתַּ֖נִי לְהַעֲל֣וֹת אֹתִ֑י וַיֹּ֣אמֶר שָׁ֠א֠וּל צַר לִ֨י מְאֹ֜ד וּפְלִשְׁתִּ֣ים נִלְחָמִ֣ים בִּ֗י וֵאלֹהִ֞ים סָ֤ר מֵעָלַי וְלֹא עָנָ֣נִי ע֗וֹד גַּ֤ם בְּיַד הַנְּבִיאִים֙ גַּם בַּ֣חֲלֹמ֔וֹת וָאֶקְרָאֶ֣ה לְךָ֔ לְהוֹדִיעֵ֖נִי מָ֥ה אֶעֱשֶׂה 16 וַיֹּ֣אמֶר שְׁמוּאֵ֔ל וְלָ֖מָּה תִּשְׁאָלֵ֑נִי וְיַהְוֶה סָ֥ר מֵעָלֶ֖יךָ וַיְהִ֥י עִם רֵעֲךָ 17 וַיַּ֤עַשׂ יַהְוֶה ל֔וֹ כַּאֲשֶׁ֖ר דִּבֶּ֣ר בְּיָדִ֑י וַיִּקְרַ֨ע יַהְוֶה אֶת הַמַּמְלָכָה֙ מִיָּדֶ֔ךָ וַיִּתְּנָהּ֖ לְרֵעֲךָ֥ לְדָוִד 18 כַּאֲשֶׁ֤ר לֹא שָׁמַ֙עְתָּ֙ בְּק֣וֹל יַהְוֶה וְלֹא עָשִׂ֥יתָ חֲרוֹן אַפּ֖וֹ בַּעֲמָלֵ֑ק עַל כֵּן֙ הַדָּבָ֣ר הַזֶּ֔ה עָשָׂה לְךָ֥ יַהְוֶה הַיּ֥וֹם הַזֶּה 19 וְיִתֵּ֣ן יַהְוֶה גַּ֣ם אֶת יִשְׂרָאֵ֤ל עִמְּךָ֙ בְּיַד פְּלִשְׁתִּ֔ים וּמָחָ֕ר אַתָּ֥ה וּבָנֶ֖יךָ עִמִּ֑י גַּ֚ם אֶת מַחֲנֵ֣ה יִשְׂרָאֵ֔ל יִתֵּ֥ן יַהְוֶה בְּיַד פְּלִשְׁתִּים 20 וַיְמַהֵ֣ר שָׁא֗וּל וַיִּפֹּ֤ל מְלֹא קוֹמָתוֹ אַ֔רְצָה וַיִּרָ֥א מְאֹ֖ד מִדִּבְרֵ֣י שְׁמוּאֵ֑ל גַּם כֹּ֙חַ֙ לֹא הָ֣יָה ב֔וֹ כִּ֣י לֹ֤א אָכַל֙ לֶ֔חֶם כָּל הַיּ֖וֹם וְכָל הַלָּיְלָה 21 וַתָּב֤וֹא הָאִשָּׁה אֶל שָׁא֔וּל וַתֵּ֖רֶא כִּי נִבְהַ֣ל מְאֹ֑ד וַתֹּ֣אמֶר אֵלָ֗יו הִנֵּ֨ה שָׁמְעָה֤ שִׁפְחָתְךָ בְּקוֹלֶ֔ךָ וָאָשִׂ֤ים נַפְשִׁי֙ בְּכַפִּ֔י וָאֶשְׁמַע אֶת דְּבָרֶ֔יךָ אֲשֶׁ֥ר דִּבַּ֖רְתָּ אֵלָי 22 וְעַתָּ֗ה שְׁמַע נָ֤א גַם אַתָּה֙ בְּק֣וֹל שִׁפְחָתֶ֔ךָ וְאָשִׂ֧מָה לְפָנֶ֛יךָ פַּת לֶ֖חֶם וֶאֱכ֑וֹל וִיהִ֤י בְךָ֙ כֹּ֔חַ כִּ֥י תֵלֵ֖ךְ בַּדָּרֶךְ 23 וַיְמָאֵ֗ן וַיֹּ֙אמֶר֙ לֹ֣א אֹכַ֔ל וַיִּפְצְרוּ ב֤וֹ עֲבָדָיו֙ וְגַם הָ֣אִשָּׁ֔ה וַיִּשְׁמַ֖ע לְקֹלָ֑ם וַיָּ֙קָם֙ מֵהָאָרֶ֔ץ וַיֵּ֖שֶׁב אֶל הַמִּטָּה 24 וְלָאִשָּׁ֤ה עֵגֶל מַרְבֵּק֙ בַּבַּ֔יִת וַתְּמַהֵ֖ר וַתִּזְבָּחֵ֑הוּ וַתִּקַּח קֶ֣מַח וַתָּ֔לָשׁ וַתֹּפֵ֖הוּ מַצּוֹת 25 וַתַּגֵּ֧שׁ לִפְנֵי שָׁא֛וּל וְלִפְנֵ֥י עֲבָדָ֖יו וַיֹּאכֵ֑לוּ וַיָּקֻ֥מוּ וַיֵּלְכ֖וּ בַּלַּ֥יְלָה הַהוּא