Matched Mismatch Not in MapM
218 words: 195 matched, 22 mismatch, 1 missing
1 וּפְלִשְׁתִּים֙ לָקְחוּ֔ אֵ֖ת אֲר֣וֹן הָאֱלֹהִ֑ים וַיְבִאֻ֛הוּ מֵאֶ֥בֶן הָעֵ֖זֶר אַשְׁדּוֹדָה 2 וַיִּקְח֤וּ פְלִשְׁתִּים֙ אֶת אֲר֣וֹן הָאֱלֹהִ֔ים וַיָּבִ֥אוּ אֹת֖וֹ בֵּ֣ית דָּג֑וֹן וַיַּצִּ֥יגוּ אֹת֖וֹ אֵ֥צֶל דָּגוֹן 3 וַיַּשְׁכִּ֤מוּ אַשְׁדּוֹדִים֙ מִמָּחֳרָת֔ וְהִנֵּ֣ה דָג֗וֹן נֹפֵ֤ל לְפָנָיו֙ אַ֔רְצָה לִפְנֵ֖י אֲר֣וֹן יַהְוֶה וַיִּקְחוּ֙ אֶת דָּג֔וֹן וַיָּשִׁ֥בוּ אֹת֖וֹ לִמְקוֹמוֹ 4 וַיַּשְׁכִּ֣מוּ בַבֹּ֘קֶר֮ מִמָּחֳרָת וְהִנֵּ֣ה דָג֗וֹן נֹפֵ֤ל לְפָנָיו֙ אַ֔רְצָה לִפְנֵ֖י אֲר֣וֹן יַהְוֶה וְרֹ֨אשׁ דָּג֜וֹן וּשְׁתֵּ֣י כַּפּ֣וֹת יָדָ֗יו כְּרֻתוֹת֙ אֶל הַמִּפְתָּ֔ן רַ֥ק גֵּו דָּגוֹן נִשְׁאַר עָלָיו 5 עַל כֵּ֡ן לֹא יִדְרְכוּ֩ כֹהֲנֵ֨י דָג֜וֹן וְכָל הַבָּאִ֧ים בֵּית דָּג֛וֹן עַל מִפְתַּ֥ן דָּג֖וֹן בְּאַשְׁדּ֑וֹד עַ֖ד הַיּ֥וֹם הַזֶּה 6 וַתִּכְבַּ֧ד יַד יַהְוֶה אֶל הָאַשְׁדּוֹדִ֖ים וַיְשִׁמֵּ֑ם וַיַּ֤ךְ אֹתָם֙ בָּעֳפָלִים אֶת אַשְׁדּוֹד וְאֶת גְּבוּלֶיהָ 7 וַיִּרְא֥וּ אַנְשֵׁי אַשְׁדּ֖וֹד כִּי כֵ֑ן וְאָמְר֗וּ לֹא יֵשֵׁ֞ב אֲר֨וֹן אֱלֹהֵ֤י יִשְׂרָאֵל֙ עִמָּ֔נוּ כִּי קָשְׁתָ֤ה יָדוֹ֙ עָלֵ֔ינוּ וְעַ֖ל דָּג֥וֹן אֱלֹהֵינוּ 8 וַיִּשְׁלְח֡וּ וַיַּאַסְפוּ֩ אֶת כָּל סַרְנֵ֨י פְלִשְׁתִּ֜ים אֲלֵיהֶ֗ם וַיֹּאמְרוּ מַה נַּעֲשֶׂ֗ה לַאֲרוֹן אֱלֹהֵ֣י יִשְׂרָאֵ֔ל וַיֹּ֣אמְר֔וּ גַּ֣ת יִסֹּ֔ב אֲר֖וֹן אֱלֹהֵ֣י יִשְׂרָאֵ֑ל וַיַּסֵּ֕בּוּ אֶת אֲר֖וֹן אֱלֹהֵ֥י יִשְׂרָאֵל 9 וַיְהִ֞י אַחֲרֵ֣י הֵסַ֣בּוּ אֹת֗וֹ וַתְּהִ֨י יַד יַהְוֶה בָּעִיר֙ מְהוּמָה֙ גְּדוֹלָ֣ה מְאֹ֔ד וַיַּךְ֙ אֶת אַנְשֵׁ֣י הָעִ֔יר מִקָּטֹ֖ן וְעַד גָּד֑וֹל וַיִּשָּׂתְר֥וּ לָהֶ֖ם עֳפָלִים 10 וַיְשַׁלְּחוּ֛ אֶת אֲר֥וֹן הָאֱלֹהִ֖ים עֶקְר֑וֹן וַיְהִ֗י כְּב֨וֹא אֲר֤וֹן הָאֱלֹהִים֙ עֶקְר֔וֹן וַיִּזְעֲק֨וּ הָעֶקְרֹנִ֜ים לֵאמֹ֗ר הֵסַ֤בּוּ אֵלַי֙ אֶת אֲרוֹן֙ אֱלֹהֵ֣י יִשְׂרָאֵ֔ל לַהֲמִיתֵ֖נִי וְאֶת עַמִּי 11 וַיִּשְׁלְח֨וּ וַיַּאַסְפ֜וּ אֶת כָּל סַרְנֵ֣י פְלִשְׁתִּ֗ים וַיֹּאמְרוּ שַׁלְּח֞וּ אֶת אֲר֨וֹן אֱלֹהֵ֤י יִשְׂרָאֵל֙ וְיָשֹׁ֣ב לִמְקוֹמ֔וֹ וְלֹא יָמִ֥ית אֹתִ֖י וְאֶת עַמִּ֑י כִּי הָיְתָ֤ה מְהוּמַת מָ֙וֶת֙ בְּכָל הָעִ֔יר כְּבוֹא אֲרוֹן הָאֱלֹהִים שָׁם 12 וְהָאֲנָשִׁים אֲשֶׁ֣ר לֹא מֵ֔תוּ הֻכּ֖וּ בָּעֳפָלִים וַתַּעַל שַׁוְעַת הָעִיר הַשָּׁמָיִם