Matched Mismatch Not in MapM
202 words: 194 matched, 7 mismatch, 1 missing
1 וּפְלִשְׁתִּ֖ים נִלְחָמִ֣ים בְּיִשְׂרָאֵ֑ל וַיָּנֻ֜סוּ אַנְשֵׁ֤י יִשְׂרָאֵל֙ מִפְּנֵ֣י פְלִשְׁתִּ֔ים וַיִּפְּל֥וּ חֲלָלִ֖ים בְּהַ֥ר הַגִּלְבֹּעַ 2 וַיַּדְבְּק֣וּ פְלִשְׁתִּ֔ים אֶת שָׁא֖וּל וְאֶת בָּנָ֑יו וַיַּכּ֣וּ פְלִשְׁתִּ֗ים אֶת יְהוֹנָתָ֧ן וְאֶת אֲבִינָדָ֛ב וְאֶת מַלְכִּי שׁוּעַ בְּנֵי שָׁאוּל 3 וַתִּכְבַּ֤ד הַמִּלְחָמָה֙ אֶל שָׁא֔וּל וַיִּמְצָאֻ֥הוּ הַמּוֹרִ֖ים אֲנָשִׁ֣ים בַּקָּ֑שֶׁת וַיָּ֥חֶל מְאֹ֖ד מֵהַמּוֹרִים 4 וַיֹּ֣אמֶר שָׁאוּל֩ לְנֹשֵׂ֨א כֵלָ֜יו שְׁלֹ֥ף חַרְבְּךָ֣ וְדָקְרֵ֣נִי בָ֗הּ פֶּן יָבֹאוּ הָעֲרֵלִ֨ים הָאֵ֤לֶּה וּדְקָרֻ֙נִי֙ וְהִתְעַלְּלוּ בִ֔י וְלֹ֤א אָבָה֙ נֹשֵׂ֣א כֵלָ֔יו כִּ֥י יָרֵ֖א מְאֹ֑ד וַיִּקַּ֤ח שָׁאוּל֙ אֶת הַחֶ֔רֶב וַיִּפֹּ֖ל עָלֶיהָ 5 וַיַּ֥רְא נֹשֵׂא כֵלָ֖יו כִּ֣י מֵ֣ת שָׁא֑וּל וַיִּפֹּ֥ל גַּם ה֛וּא עַל חַרְבּ֖וֹ וַיָּ֥מָת עִמּוֹ 6 וַיָּ֣מָת שָׁא֡וּל וּשְׁלֹ֣שֶׁת בָּנָיו֩ וְנֹשֵׂ֨א כֵלָ֜יו גַּ֧ם כָּל אֲנָשָׁ֛יו בַּיּ֥וֹם הַה֖וּא יַחְדָּו 7 וַיִּרְא֣וּ אַנְשֵׁי יִ֠שְׂרָאֵ֠ל אֲשֶׁר בְּעֵ֨בֶר הָעֵ֜מֶק וַאֲשֶׁ֣ר בְּעֵ֣בֶר הַיַּרְדֵּ֗ן כִּי נָ֙סוּ֙ אַנְשֵׁ֣י יִשְׂרָאֵ֔ל וְכִי מֵ֖תוּ שָׁא֣וּל וּבָנָ֑יו וַיַּעַזְב֤וּ אֶת עָרֵיהֶם וַיָּנֻ֔סוּ וַיָּבֹ֣אוּ פְלִשְׁתִּ֔ים וַיֵּשְׁב֖וּ בָּהֶן 8 וַיְהִי מִמָּחֳרָת֔ וַיָּבֹ֣אוּ פְלִשְׁתִּ֔ים לְפַשֵּׁ֖ט אֶת הַחֲלָלִ֑ים וַיִּמְצְאוּ֤ אֶת שָׁאוּל֙ וְאֶת שְׁלֹ֣שֶׁת בָּנָ֔יו נֹפְלִ֖ים בְּהַ֥ר הַגִּלְבֹּעַ 9 וַיִּכְרְתוּ אֶת רֹאשׁ֔וֹ וַיַּפְשִׁ֖טוּ אֶת כֵּלָ֑יו וַיְשַׁלְּח֨וּ בְאֶרֶץ פְּלִשְׁתִּ֜ים סָבִ֗יב לְבַשֵּׂ֛ר בֵּ֥ית עֲצַבֵּיהֶ֖ם וְאֶת הָעָם 10 וַיָּשִׁימוּ אֶת כֵּלָ֔יו בֵּ֖ית עַשְׁתָּר֑וֹת וְאֶת גְּוִיָּתוֹ֙ תָּקְעוּ֔ בְּחוֹמַ֖ת בֵּ֥ית שָׁן 11 וַיִּשְׁמְע֣וּ כֹּל יֹשְׁבֵ֖י יָבֵ֣ישׁ גִּלְעָ֑ד אֵ֛ת אֲשֶׁר עָשׂ֥וּ פְלִשְׁתִּ֖ים לְשָׁאוּל 12 וַיָּק֜וּמוּ כָּל אִ֣ישׁ חַ֘יִל֮ וַיֵּלְכ֣וּ כָל הַלַּ֒יְלָה֒ וַיִּקְח֞וּ אֶת גְּוִיַּ֣ת שָׁא֗וּל וְאֵת֙ גְּוִיֹּ֣ת בָּנָ֔יו מֵחוֹמַ֖ת בֵּ֣ית שָׁ֑ן וַיָּבֹ֣אוּ יָבֵ֔שָׁה וַיִּשְׂרְפ֥וּ אֹתָ֖ם שָׁם 13 וַיִּקְחוּ֙ אֶת עַצְמֹ֣תֵיהֶ֔ם וַיִּקְבְּר֥וּ תַחַת הָאֶ֖שֶׁל בְּיָבֵ֑שָׁה וַיָּצֻ֖מוּ שִׁבְעַ֥ת יָמִים