Matched Mismatch Not in MapM
307 words: 268 matched, 36 mismatch, 3 missing
1 וְהַנַּ֧עַר שְׁמוּאֵ֛ל מְשָׁרֵ֥ת אֶת יַהְוֶה לִפְנֵ֣י עֵלִ֑י וּדְבַר יַהְוֶה הָיָ֤ה יָקָר֙ בַּיָּמִ֣ים הָהֵ֔ם אֵ֥ין חָז֖וֹן נִפְרָץ 2 וַיְהִי בַּיּ֣וֹם הַה֔וּא וְעֵלִ֖י שֹׁכֵ֣ב בִּמְקוֹמ֑וֹ וְעֵינָו֙ הֵחֵ֣לּוּ כֵה֔וֹת לֹ֥א יוּכַ֖ל לִרְאוֹת 3 וְנֵ֤ר אֱלֹהִים֙ טֶ֣רֶם יִכְבֶּ֔ה וּשְׁמוּאֵ֖ל שֹׁכֵ֑ב בְּהֵיכַ֣ל יַהְוֶה אֲשֶׁר שָׁ֖ם אֲר֥וֹן אֱלֹהִים 4 וַיִּקְרָ֧א יַהְוֶה אֶל שְׁמוּאֵ֖ל וַיֹּ֥אמֶר הִנֵּנִי 5 וַיָּ֣רָץ אֶל עֵלִ֗י וַיֹּ֤אמֶר הִנְנִי֙ כִּי קָרָ֣אתָ לִּ֔י וַיֹּ֥אמֶר לֹא קָרָ֖אתִי שׁ֣וּב שְׁכָ֑ב וַיֵּ֖לֶךְ וַיִּשְׁכָּב 6 וַיֹּ֣סֶף יַהְוֶה קְרֹ֣א עוֹד֮ שְׁמוּאֵל֒ וַיָּ֤קָם שְׁמוּאֵל֙ וַיֵּ֣לֶךְ אֶל עֵלִ֔י וַיֹּ֣אמֶר הִנְנִ֔י כִּ֥י קָרָ֖אתָ לִ֑י וַיֹּ֛אמֶר לֹא קָרָ֥אתִי בְנִ֖י שׁ֥וּב שְׁכָב 7 וּשְׁמוּאֵ֕ל טֶ֖רֶם יָדַ֣ע אֶת יַהְוֶה וְטֶ֛רֶם יִגָּלֶ֥ה אֵלָ֖יו דְּבַר יַהְוֶה 8 וַיֹּ֨סֶף יַהְוֶה קְרֹא שְׁמוּאֵל֮ בַּשְּׁלִישִׁת֒ וַיָּ֙קָם֙ וַיֵּ֣לֶךְ אֶל עֵלִ֔י וַיֹּ֣אמֶר הִנְנִ֔י כִּ֥י קָרָ֖אתָ לִ֑י וַיָּ֣בֶן עֵלִ֔י כִּ֥י יַהְוֶה קֹרֵ֥א לַנָּעַר 9 וַיֹּ֨אמֶר עֵלִ֣י לִשְׁמוּאֵל֮ לֵ֣ךְ שְׁכָב֒ וְהָיָה֙ אִם יִקְרָ֣א אֵלֶ֔יךָ וְאָמַרְתָּ דַּבֵּ֣ר יַהְוֶה כִּ֥י שֹׁמֵ֖עַ עַבְדֶּ֑ךָ וַיֵּ֣לֶךְ שְׁמוּאֵ֔ל וַיִּשְׁכַּ֖ב בִּמְקוֹמוֹ 10 וַיָּבֹ֤א יַהְוֶה וַיִּתְיַצַּ֔ב וַיִּקְרָ֥א כְפַעַם בְּפַ֖עַם שְׁמוּאֵ֣ל שְׁמוּאֵ֑ל וַיֹּ֤אמֶר שְׁמוּאֵל֙ דַּבֵּ֔ר כִּ֥י שֹׁמֵ֖עַ עַבְדֶּךָ 11 וַיֹּ֤אמֶר יַהְוֶה אֶל שְׁמוּאֵ֔ל הִנֵּ֧ה אָנֹכִ֛י עֹשֶׂ֥ה דָבָ֖ר בְּיִשְׂרָאֵ֑ל אֲשֶׁר֙ כָּל שֹׁ֣מְע֔וֹ תְּצִלֶּ֖ינָה שְׁתֵּ֥י אָזְנָיו 12 בַּיּ֤וֹם הַהוּא֙ אָקִ֣ים אֶל עֵלִ֔י אֵ֛ת כָּל אֲשֶׁ֥ר דִּבַּ֖רְתִּי אֶל בֵּית֑וֹ הָחֵ֖ל וְכַלֵּה 13 וְהִגַּ֣דְתִּי ל֔וֹ כִּי שֹׁפֵ֥ט אֲנִ֛י אֶת בֵּית֖וֹ עַד עוֹלָ֑ם בַּעֲוֺ֣ן אֲשֶׁר יָדַ֗ע כִּי מְקַלְלִ֤ים אֶת אֱלֹהִים בָּנָיו וְלֹא כִהָה בָּם 14 וְלָכֵ֥ן נִשְׁבַּ֖עְתִּי לְבֵ֣ית עֵלִ֑י אִם יִתְכַּפֵּ֞ר עֲוֺ֧ן בֵּית עֵלִ֛י בְּזֶ֥בַח וּבְמִנְחָ֖ה עַד עוֹלָם 15 וַיִּשְׁכַּ֤ב שְׁמוּאֵל֙ עַד הַבֹּ֔קֶר וַיַּשְׁכֵּם בַּבֹּקֶר וַיִּפְתַּח אֶת דַּלְתוֹת בֵּית יַהְוֶה וּשְׁמוּאֵל יָרֵא מֵהַגִּיד אֶת הַמַּרְאָה אֶל עֵלִי 16 וַיִּקְרָ֤א עֵלִי֙ אֶל שְׁמוּאֵ֔ל וַיֹּ֖אמֶר שְׁמוּאֵ֣ל בְּנִ֑י וַיֹּ֖אמֶר הִנֵּנִי 17 וַיֹּ֗אמֶר מָ֤ה הַדָּבָר֙ אֲשֶׁ֣ר דִּבֶּ֣ר אֵלֶ֔יךָ אַל נָ֥א תְכַחֵ֖ד מִמֶּ֑נִּי כֹּ֣ה יַעֲשֶׂה לְּךָ֤ אֱלֹהִים֙ וְכֹ֣ה יוֹסִ֔יף אִם תְּכַחֵ֤ד מִמֶּ֙נִּי֙ דָּבָ֔ר מִכָּל הַדָּבָ֖ר אֲשֶׁר דִּבֶּ֥ר אֵלֶיךָ 18 וַיַּגֶּד ל֤וֹ שְׁמוּאֵל֙ אֶת כָּל הַדְּבָרִ֔ים וְלֹ֥א כִחֵ֖ד מִמֶּ֑נּוּ וַיֹּאמַ֕ר יַהְוֶה ה֔וּא הַטּ֥וֹב בְּעֵינָ֖ו יַעֲשֶׂה 19 וַיִּגְדַּ֖ל שְׁמוּאֵ֑ל וְיַהְוֶה הָיָ֣ה עִמּ֔וֹ וְלֹא הִפִּ֥יל מִכָּל דְּבָרָ֖יו אָרְצָה 20 וַיֵּ֙דַע֙ כָּל יִשְׂרָאֵ֔ל מִדָּ֖ן וְעַד בְּאֵ֣ר שָׁ֑בַע כִּ֚י נֶאֱמָ֣ן שְׁמוּאֵ֔ל לְנָבִ֖יא לְיַהְוֶה 21 וַיֹּ֥סֶף יַהְוֶה לְהֵרָאֹ֣ה בְשִׁלֹ֑ה כִּי נִגְלָ֨ה יַהְוֶה אֶל שְׁמוּאֵ֛ל בְּשִׁל֖וֹ בִּדְבַ֥ר יַהְוֶה