Matched Mismatch Not in MapM
489 words: 447 matched, 40 mismatch, 2 missing
1 וַיְהִ֞י בְּבֹ֨א דָוִ֧ד וַאֲנָשָׁ֛יו צִקְלַג֖ בַּיּ֣וֹם הַשְּׁלִישִׁ֑י וַעֲמָלֵק פָשְׁטוּ֗ אֶל נֶ֙גֶב֙ וְאֶל צִ֣קְלַ֔ג וַיַּכּוּ֙ אֶת צִ֣קְלַ֔ג וַיִּשְׂרְפ֥וּ אֹתָ֖הּ בָּאֵשׁ 2 וַיִּשְׁבּ֨וּ אֶת הַנָּשִׁ֤ים אֲשֶׁר בָּהּ֙ מִקָּטֹ֣ן וְעַד גָּד֔וֹל לֹ֥א הֵמִ֖יתוּ אִ֑ישׁ וַיִּנְהֲגוּ֔ וַיֵּלְכ֖וּ לְדַרְכָּם 3 וַיָּבֹ֨א דָוִ֤ד וַאֲנָשָׁיו אֶל הָעִ֔יר וְהִנֵּ֥ה שְׂרוּפָ֖ה בָּאֵ֑שׁ וּנְשֵׁיהֶ֛ם וּבְנֵיהֶ֥ם וּבְנֹתֵיהֶ֖ם נִשְׁבּוּ 4 וַיִּשָּׂ֨א דָוִ֜ד וְהָעָ֧ם אֲשֶׁר אִתּ֛וֹ אֶת קוֹלָ֖ם וַיִּבְכּ֑וּ עַ֣ד אֲשֶׁ֧ר אֵין בָּהֶ֛ם כֹּ֖חַ לִבְכּוֹת 5 וּשְׁתֵּ֥י נְשֵׁי דָוִ֖ד נִשְׁבּ֑וּ אֲחִינֹ֙עַם֙ הַיִּזְרְעֵלִ֔ית וַאֲבִיגַיִ֕ל אֵ֖שֶׁת נָבָ֥ל הַכַּרְמְלִי 6 וַתֵּ֨צֶר לְדָוִ֜ד מְאֹ֗ד כִּי אָמְר֤וּ הָעָם֙ לְסָקְל֔וֹ כִּי מָ֙רָה֙ נֶ֣פֶשׁ כָּל הָעָ֔ם אִ֖ישׁ עַל בָּנָ֣ו וְעַל בְּנֹתָ֑יו וַיִּתְחַזֵּ֣ק דָּוִ֔ד בְּיַהְוֶה אֱלֹהָיו 7 וַיֹּ֣אמֶר דָּוִ֗ד אֶל אֶבְיָתָ֤ר הַכֹּהֵן֙ בֶּן אֲחִימֶ֔לֶךְ הַגִּישָׁה נָּ֥א לִ֖י הָאֵפ֑וֹד וַיַּגֵּ֧שׁ אֶבְיָתָ֛ר אֶת הָאֵפ֖וֹד אֶל דָּוִד 8 וַיִּשְׁאַ֨ל דָּוִ֤ד בְּיַהְוֶה לֵאמֹ֔ר אֶרְדֹּ֛ף אַחֲרֵ֥י הַגְּדוּד הַזֶּ֖ה הַאַשִּׂגֶ֑נּוּ וַיֹּ֤אמֶר לוֹ֙ רְדֹ֔ף כִּי הַשֵּׂ֥ג תַּשִּׂ֖יג וְהַצֵּ֥ל תַּצִּיל 9 וַיֵּ֣לֶךְ דָּוִ֗ד ה֚וּא וְשֵׁשׁ מֵא֥וֹת אִישׁ֙ אֲשֶׁ֣ר אִתּ֔וֹ וַיָּבֹ֖אוּ עַד נַ֣חַל הַבְּשׂ֑וֹר וְהַנּוֹתָרִ֖ים עָמָדוּ 10 וַיִּרְדֹּ֣ף דָּוִ֔ד ה֖וּא וְאַרְבַּע מֵא֣וֹת אִ֑ישׁ וַיַּעַמְדוּ מָאתַ֣יִם אִ֔ישׁ אֲשֶׁ֣ר פִּגְּר֔וּ מֵעֲבֹ֖ר אֶת נַ֥חַל הַבְּשׂוֹר 11 וַיִּמְצְאוּ֤ אִישׁ מִצְרִי֙ בַּשָּׂדֶ֔ה וַיִּקְח֥וּ אֹת֖וֹ אֶל דָּוִ֑ד וַיִּתְּנוּ ל֥וֹ לֶ֙חֶם֙ וַיֹּ֔אכַל וַיַּשְׁקֻ֖הוּ מָיִם 12 וַיִּתְּנוּ לוֹ֩ פֶ֨לַח דְּבֵלָ֜ה וּשְׁנֵ֤י צִמֻּקִים֙ וַיֹּ֔אכַל וַתָּ֥שָׁב רוּח֖וֹ אֵלָ֑יו כִּ֠י לֹא אָ֤כַל לֶ֙חֶם֙ וְלֹא שָׁ֣תָה מַ֔יִם שְׁלֹשָׁ֥ה יָמִ֖ים וּשְׁלֹשָׁ֥ה לֵילוֹת 13 וַיֹּ֨אמֶר ל֤וֹ דָוִד֙ לְמִי אַ֔תָּה וְאֵ֥י מִזֶּ֖ה אָ֑תָּה וַיֹּ֜אמֶר נַ֧עַר מִצְרִ֣י אָנֹ֗כִי עֶ֚בֶד לְאִ֣ישׁ עֲמָלֵקִ֔י וַיַּעַזְבֵ֧נִי אֲדֹנִ֛י כִּ֥י חָלִ֖יתִי הַיּ֥וֹם שְׁלֹשָׁה 14 אֲנַ֡חְנוּ פָּשַׁ֜טְנוּ עַל נֶגֶב הַכְּרֵתִי וְעַל אֲשֶׁר לִיהוּדָה וְעַל נֶגֶב כָּלֵב וְאֶת צִקְלַג שָׂרַפְנוּ בָאֵשׁ 15 וַיֹּ֤אמֶר אֵלָיו֙ דָּוִ֔ד הֲתוֹרִדֵ֖נִי אֶל הַגְּד֣וּד הַזֶּ֑ה וַיֹּ֡אמֶר הִשָּׁ֩בְעָה֩ לִּ֨י בֵאלֹהִ֜ים אִם תְּמִיתֵ֗נִי וְאִם תַּסְגִּרֵ֙נִי֙ בְּיַד אֲדֹנִ֔י וְאוֹרִדְךָ אֶל הַגְּד֥וּד הַזֶּה 16 וַיֹּ֣רִדֵ֔הוּ וְהִנֵּ֥ה נְטֻשִׁ֖ים עַל פְּנֵ֣י כָל הָאָ֑רֶץ אֹכְלִ֤ים וְשֹׁתִים֙ וְחֹ֣גְגִ֔ים בְּכֹל֙ הַשָּׁלָ֣ל הַגָּד֔וֹל אֲשֶׁ֥ר לָקְח֛וּ מֵאֶ֥רֶץ פְּלִשְׁתִּ֖ים וּמֵאֶ֥רֶץ יְהוּדָה 17 וַיַּכֵּ֥ם דָּוִ֛ד מֵהַנֶּ֥שֶׁף וְעַד הָעֶ֖רֶב לַמָּחֳרָת לְהַחֲרִימָם וְלֹא נִמְלַט מֵהֶם אִישׁ כִּי אִם אַרְבַּע מֵאוֹת אִישׁ נַעַר אֲשֶׁר רָכְבוּ עַל הַגְּמַלִּים וַיָּנֻסוּ 18 וַיַּצֵּ֣ל דָּוִ֔ד אֵ֛ת כָּל אֲשֶׁ֥ר לָקְחוּ֖ עֲמָלֵ֑ק וְאֶת שְׁתֵּ֥י נָשָׁ֖יו הִצִּ֥יל דָּוִד 19 וְלֹ֣א נֶעְדַּר לָ֠הֶ֠ם מִן הַקָּטֹ֨ן וְעַד הַגָּד֜וֹל וְעַד בָּנִ֤ים וּבָנוֹת֙ וּמִשָּׁלָ֔ל וְעַ֛ד כָּל אֲשֶׁ֥ר לָקְח֖וּ לָהֶ֑ם הַכֹּ֖ל הֵשִׁ֥יב דָּוִד 20 וַיִּקַּ֣ח דָּוִ֔ד אֶת כָּל הַצֹּ֖אן וְהַבָּקָ֑ר נָהֲג֗וּ לִפְנֵי֙ הַמִּקְנֶ֣ה הַה֔וּא וַיֹּ֣אמְר֔וּ זֶ֖ה שְׁלַ֥ל דָּוִד 21 וַיָּבֹ֣א דָוִ֗ד אֶל מָאתַ֨יִם הָאֲנָשִׁ֜ים אֲשֶׁר פִּגְּר֣וּ מִלֶּ֣כֶת אַחֲרֵ֣י דָוִ֗ד וַיֹּשִׁיבֵם בְּנַ֣חַל הַבְּשׂ֔וֹר וַיֵּצְאוּ לִקְרַ֣את דָּוִ֔ד וְלִקְרַ֖את הָעָ֣ם אֲשֶׁר אִתּ֑וֹ וַיִּגַּ֤שׁ דָּוִד֙ עַד הָעָ֔ם וַיִּשְׁאַ֥ל לָהֶ֖ם לְשָׁלוֹם 22 וַיַּ֜עַן כָּל אִישׁ רָ֣ע וּבְלִיַּ֗עַל מֵהָאֲנָשִׁים֮ אֲשֶׁ֣ר הָלְכ֣וּ עִם דָּוִד֒ וַיֹּאמְר֗וּ יַ֚עַן אֲשֶׁ֣ר לֹא הָלְכ֣וּ עִמָּנוּ לֹא נִתֵּ֣ן לָהֶ֔ם מֵהַשָּׁלָ֖ל אֲשֶׁ֣ר הִצַּ֑לְנוּ כִּי אִם אִ֤ישׁ אֶת אִשְׁתּוֹ֙ וְאֶת בָּנָ֔יו וְיִנְהֲג֖וּ וְיֵלֵכוּ 23 וַיֹּ֣אמֶר דָּוִ֔ד לֹא תַעֲשׂ֥וּ כֵ֖ן אַחֲרֵי אֵ֠ת אֲשֶׁר נָתַ֨ן יַהְוֶה לָ֙נוּ֙ וַיִּשְׁמֹ֣ר אֹתָ֔נוּ וַיִּתֵּ֗ן אֶת הַגְּד֛וּד הַבָּ֥א עָלֵ֖ינוּ בְּיָדֵנוּ 24 וּמִי֙ יִשְׁמַ֣ע לָכֶ֔ם לַדָּבָ֖ר הַזֶּ֑ה כִּ֞י כְּחֵ֣לֶק הַיֹּרֵ֣ד בַּמִּלְחָמָ֗ה וּכְחֵלֶ֛ק הַיֹּשֵׁ֥ב עַל הַכֵּלִ֖ים יַחְדָּ֥ו יַחֲלֹקוּ 25 וַיְהִ֕י מֵהַיּ֥וֹם הַה֖וּא וָמָ֑עְלָה וַיְשִׂמֶ֜הָ לְחֹ֤ק וּלְמִשְׁפָּט֙ לְיִשְׂרָאֵ֔ל עַ֖ד הַיּ֥וֹם הַזֶּה 26 וַיָּבֹ֤א דָוִד֙ אֶל צִ֣קְלַ֔ג וַיְשַׁלַּ֧ח מֵהַשָּׁלָ֛ל לְזִקְנֵ֥י יְהוּדָ֖ה לְרֵעֵ֣הוּ לֵאמֹ֑ר הִנֵּ֤ה לָכֶם֙ בְּרָכָ֔ה מִשְּׁלַ֖ל אֹיְבֵ֥י יַהְוֶה 27 לַאֲשֶׁ֧ר בְּבֵית אֵ֛ל וְלַאֲשֶׁ֥ר בְּרָמוֹת נֶ֖גֶב וְלַאֲשֶׁ֥ר בְּיַתִּר 28 וְלַאֲשֶׁ֧ר בַּעֲרֹעֵר֛ וְלַאֲשֶׁ֥ר בְּשִׂפְמוֹ֖ת וְלַאֲשֶׁ֥ר בְּאֶשְׁתְּמֹעַ 29 וְלַאֲשֶׁ֣ר בְּכַרְמֶל וְלַאֲשֶׁר֙ בְּעָרֵ֣י הַיְּרַחְמְאֵלִ֔י וְלַאֲשֶׁ֖ר בְּעָרֵ֥י הַקֵּינִי 30 וְלַאֲשֶׁ֧ר בְּחָרְמָ֛ה וְלַאֲשֶׁ֥ר בִּבְאֵר שֶׁבַע וְלַאֲשֶׁ֥ר בַּעֲתָךְ 31 וְלַאֲשֶׁ֖ר בְּחֶבְר֑וֹן וּלְכָל הַמְּקֹמ֛וֹת אֲשֶׁר הִתְהַלֶּךְ שָׁ֥ם דָּוִ֖ד ה֥וּא וַאֲנָשָׁיו