Matched Mismatch Not in MapM
201 words: 182 matched, 19 mismatch, 0 missing
1 הֶן כֹּ֭ל רָאֲתָ֣ה עֵינִ֑י שָׁמְעָה֥ אָ֝זְנִ֗י וַתָּ֥בֶן לָהּ 2 כְּדַ֭עְתְּכֶם יָדַ֣עְתִּי גַם אָ֑נִי לֹא נֹפֵ֖ל אָנֹכִ֣י מִכֶּם 3 אוּלָ֗ם אֲ֭נִי אֶל שַׁדַּ֣י אֲדַבֵּ֑ר וְהוֹכֵ֖חַ אֶל אֵ֣ל אֶחְפָּץ 4 וְאוּלָם֗ אַתֶּ֥ם טֹפְלֵי שָׁ֑קֶר רֹפְאֵ֖י אֱלִ֣ל כֻּלְּכֶם 5 מִי יִ֭תֵּן הַחֲרֵ֣שׁ תַּחֲרִישׁ֑וּן וּתְהִ֖י לָכֶ֣ם לְחָכְמָה 6 שִׁמְעוּ נָ֥א תוֹכַחְתִּ֑י וְרִב֖וֹת שְׂפָתַ֣י הַקְשִׁיבוּ 7 הַ֭לְאֵל תְּדַבְּר֣וּ עַוְלָ֑ה וְ֝ל֗וֹ תְּדַבְּרוּ֥ רְמִיָּה 8 הֲפָנָ֥יו תִּשָּׂא֑וּן אִם לָאֵ֥ל תְּרִיבוּן 9 הֲ֭טוֹב כִּי יַחְקֹ֣ר אֶתְכֶ֑ם אִם כְּהָתֵ֥ל בֶּ֝אֱנ֗וֹשׁ תְּהָתֵ֥לּוּ בוֹ 10 הוֹכֵ֣חַ יוֹכִ֣יחַ אֶתְכֶ֑ם אִם בַּ֝סֵּ֗תֶר פָּנִ֥ים תִּשָּׂאוּן 11 הֲלֹ֣א שְׂ֭אֵתוֹ תְּבַעֵ֣ת אֶתְכֶ֑ם וּ֝פַחְדּ֗וֹ יִפֹּ֥ל עֲלֵיכֶם 12 זִכְ֭רֹנֵיכֶם מִשְׁלֵי אֵ֑פֶר לַגַּבֵּי חֹ֝֗מֶר גַּבֵּיכֶם 13 הַחֲרִ֣ישׁוּ מִ֭מֶּנִּי וַאֲדַבְּרָה אָ֑נִי וְיַעֲבֹ֖ר עָלַ֣י מָה 14 אֶשָּׂא בְשָׂרִי בְשִׁנָּי וְנַפְשִׁי אָשִׂים בְּכַפִּי 15 הֵ֣ן יִ֭קְטְלֵנִי לָא אֲיַחֵל אַךְ דְּרָכַי אֶל פָּנָיו אוֹכִיחַ 16 גַּם הוּא לִ֥י לִישׁוּעָ֑ה כִּי לֹ֥א לְ֝פָנָ֗יו חָנֵ֥ף יָבוֹא 17 שִׁמְע֣וּ שָׁ֭מוֹעַ מִלָּתִ֑י וְ֝אַחֲוָתִ֗י בְּאָזְנֵיכֶם 18 הִנֵּה נָ֭א עָרַ֣כְתִּי מִשְׁפָּ֑ט יָ֝דַ֗עְתִּי כִּי אֲנִ֥י אֶצְדָּק 19 מִי ה֭וּא יָרִ֣יב עִמָּדִ֑י כִּי עַתָּ֖ה אַחֲרִ֣ישׁ וְאֶגְוָע 20 אַךְ שְׁ֭תַּיִם אֵל תַּ֣עַשׂ עִמָּדִ֑י אָ֥ז מִ֝פָּנֶ֗יךָ לֹ֣א אֶסָּתֵר 21 כַּ֭פְּךָ מֵעָלַ֣י הַרְחַ֑ק וְ֝אֵ֥מָתְךָ֗ אַל תְּבַעֲתַנִּי 22 וּ֭קְרָא וְאָנֹכִ֣י אֶעֱנֶ֑ה אוֹ אֲ֝דַבֵּ֗ר וַהֲשִׁיבֵנִי 23 כַּמָּ֣ה לִ֭י עֲוֺנ֣וֹת וְחַטָּא֑וֹת פִּשְׁעִי֥ וְ֝חַטָּאתִ֗י הֹדִיעֵנִי 24 לָמָּה פָנֶ֥יךָ תַסְתִּ֑יר וְתַחְשְׁבֵ֖נִי לְאֹיֵב לָךְ 25 הֶעָלֶ֣ה נִדָּ֣ף תַּעֲר֑וֹץ וְאֶת קַ֖שׁ יָבֵ֣שׁ תִּרְדֹּף 26 כִּי תִכְתֹּ֣ב עָלַ֣י מְרֹר֑וֹת וְ֝תוֹרִישֵׁ֗נִי עֲוֺנֹת נְעוּרָי 27 וְתָ֘שֵׂ֤ם בַּסַּ֨ד רַגְלַ֗י וְתִשְׁמ֥וֹר כָּל אָרְחֹתָי עַל שָׁרְשֵׁ֥י רַ֝גְלַ֗י תִּתְחַקֶּה 28 וְ֭הוּא כְּרֹקֵב יִבְלֶ֑ה כְּ֝בֶ֗גֶד אֲכָ֣לוֹ עָשׁ