Matched Mismatch Not in MapM
213 words: 208 matched, 5 mismatch, 0 missing
1 וַיַּ֥עַן אִיּ֗וֹב וַיֹּאמַר 2 עַד אָ֭נָה תּוֹגְי֣וּן נַפְשִׁ֑י וּתְדַכְּאוּנַנִי בְמִלִּים 3 זֶ֤ה עֶ֣שֶׂר פְּ֭עָמִים תַּכְלִימ֑וּנִי לֹא תֵ֝בֹ֗שׁוּ תַּחְכְּרוּ לִי 4 וְאַף אָמְנָ֥ם שָׁגִ֑יתִי אִ֝תִּ֗י תָּלִ֥ין מְשׁוּגָתִי 5 אִם אָ֭מְנָם עָלַ֣י תַּגְדִּ֑ילוּ וְתוֹכִ֥יחוּ עָ֝לַ֗י חֶרְפָּתִי 6 דְּעוּ אֵ֭פוֹ כִּי אֱל֣וֹהַּ עִוְּתָ֑נִי וּ֝מְצוּד֗וֹ עָלַ֥י הִקִּיף 7 הֵ֤ן אֶצְעַ֣ק חָ֭מָס וְלֹ֣א אֵעָנֶ֑ה אֲ֝שַׁוַּ֗ע וְאֵ֣ין מִשְׁפָּט 8 אָרְחִ֣י גָ֭דַר וְלֹ֣א אֶעֱב֑וֹר וְעַ֥ל נְ֝תִיבוֹתַ֗י חֹ֣שֶׁךְ יָשִׂים 9 כְּ֭בוֹדִי מֵעָלַ֣י הִפְשִׁ֑יט וַ֝יָּ֗סַר עֲטֶ֣רֶת רֹאשִׁי 10 יִתְּצֵ֣נִי סָ֭בִיב וָאֵלַ֑ךְ וַיַּסַּ֥ע כָּ֝עֵ֗ץ תִּקְוָתִי 11 וַיַּ֣חַר עָלַ֣י אַפּ֑וֹ וַיַּחְשְׁבֵ֖נִי ל֣וֹ כְצָרָיו 12 יַ֤חַד יָ֘בֹ֤אוּ גְדוּדָ֗יו וַיָּסֹ֣לּוּ עָלַ֣י דַּרְכָּ֑ם וַיַּחֲנ֖וּ סָבִ֣יב לְאָהֳלִי 13 אַ֭חַי מֵעָלַ֣י הִרְחִיקוּ וְ֝יֹדְעַ֗י אַךְ זָ֥רוּ מִמֶּנִּי 14 חָדְל֥וּ קְרוֹבָ֑י וּמְיֻדָּעַי֥ שְׁכֵחוּנִי 15 גָּ֘רֵ֤י בֵיתִ֣י וְ֭אַמְהֹתַי לְזָ֣ר תַּחְשְׁבֻ֑נִי נָ֝כְרִ֗י הָיִ֥יתִי בְעֵינֵיהֶם 16 לְעַבְדִּ֣י קָ֭רָאתִי וְלֹ֣א יַעֲנֶ֑ה בְּמוֹ פִ֝֗י אֶתְחַנֶּן לוֹ 17 ר֭וּחִי זָ֣רָה לְאִשְׁתִּ֑י וְ֝חַנֹּתִ֗י לִבְנֵ֥י בִטְנִי 18 גַּם עֲ֭וִילִים מָ֣אֲסוּ בִ֑י אָ֝ק֗וּמָה וַיְדַבְּרוּ בִי 19 תִּ֭עֲבוּנִי כָּל מְתֵ֣י סוֹדִ֑י וְזֶה אָ֝הַ֗בְתִּי נֶהְפְּכוּ בִי 20 בְּעוֹרִ֣י וּ֭בִבְשָׂרִי דָּבְקָ֣ה עַצְמִ֑י וָ֝אֶתְמַלְּטָ֗ה בְּע֣וֹר שִׁנָּי 21 חָנֻּ֬נִי חָנֻּ֣נִי אַתֶּ֣ם רֵעָ֑י כִּ֥י יַד אֱ֝ל֗וֹהַּ נָ֣גְעָה בִּי 22 לָ֭מָּה תִּרְדְּפֻ֣נִי כְמוֹ אֵ֑ל וּ֝מִבְּשָׂרִ֗י לֹ֣א תִשְׂבָּעוּ 23 מִי יִתֵּ֣ן אֵ֭פוֹ וְיִכָּתְב֣וּן מִלָּ֑י מִי יִתֵּ֖ן בַּסֵּ֣פֶר וְיֻחָקוּ 24 בְּעֵט בַּרְזֶ֥ל וְעֹפָ֑רֶת לָ֝עַ֗ד בַּצּ֥וּר יֵחָצְבוּן 25 וַאֲנִ֣י יָ֭דַעְתִּי גֹּ֣אֲלִי חָ֑י וְ֝אַחֲר֗וֹן עַל עָפָ֥ר יָקוּם 26 וְאַחַ֣ר ע֭וֹרִי נִקְּפוּ זֹ֑את וּ֝מִבְּשָׂרִ֗י אֶחֱזֶ֥ה אֱלוֹהַּ 27 אֲשֶׁ֤ר אֲנִ֨י אֶחֱזֶה לִּ֗י וְעֵינַ֣י רָא֣וּ וְלֹא זָ֑ר כָּל֖וּ כִלְיֹתַ֣י בְּחֵקִי 28 כִּ֣י תֹ֭אמְרוּ מַה נִּרְדָּף ל֑וֹ וְשֹׁ֥רֶשׁ דָּ֝בָ֗ר נִמְצָא בוֹ 29 גּ֤וּרוּ לָכֶ֨ם מִפְּנֵי חֶ֗רֶב כִּי חֵ֭מָה עֲוֺנ֣וֹת חָ֑רֶב לְמַ֖עַן תֵּדְע֣וּן שַׁדָּי