Matched Mismatch Not in MapM
177 words: 170 matched, 7 mismatch, 0 missing
1 אָ֭דָם יְל֣וּד אִשָּׁ֑ה קְצַ֥ר יָ֝מִ֗ים וּשְׂבַע רֹגֶז 2 כְּצִ֣יץ יָ֭צָא וַיִּמָּ֑ל וַיִּבְרַ֥ח כַּ֝צֵּ֗ל וְלֹ֣א יַעֲמוֹד 3 אַף עַל זֶ֭ה פָּקַ֣חְתָּ עֵינֶ֑ךָ וְאֹ֘תִ֤י תָבִ֖יא בְמִשְׁפָּ֣ט עִמָּךְ 4 מִי יִתֵּ֣ן טָ֭הוֹר מִטָּמֵ֗א לֹ֣א אֶחָד 5 אִ֥ם חֲרוּצִ֨ים יָמָ֗יו מִסְפַּר חֳדָשָׁ֥יו אִתָּ֑ךְ חֻקּוֹ עָ֝שִׂ֗יתָ וְלֹ֣א יַעֲבֹר 6 שְׁעֵ֣ה מֵעָלָ֣יו וְיֶחְדָּ֑ל עַד יִ֝רְצֶ֗ה כְּשָׂכִ֥יר יוֹמוֹ 7 כִּ֤י יֵ֥שׁ לָעֵ֗ץ תִּ֫קְוָ֥ה אִם יִ֭כָּרֵת וְע֣וֹד יַחֲלִ֑יף וְ֝יֹנַקְתּ֗וֹ לֹ֣א תֶחְדָּל 8 אִם יַזְקִ֣ין בָּאָ֣רֶץ שָׁרְשׁ֑וֹ וּ֝בֶעָפָ֗ר יָמ֥וּת גִּזְעוֹ 9 מֵרֵ֣יחַ מַ֣יִם יַפְרִ֑חַ וְעָשָׂ֖ה קָצִ֣יר כְּמוֹ נָטַע 10 וְגֶ֣בֶר יָ֭מוּת וַיֶּחֱלָשׁ֑ וַיִּגְוַ֖ע אָדָ֣ם וְאַיּוֹ 11 אָזְלוּ מַ֭יִם מִנִּי יָ֑ם וְ֝נָהָ֗ר יֶחֱרַ֥ב וְיָבֵשׁ 12 וְאִ֥ישׁ שָׁכַ֗ב וְלֹא יָ֫ק֥וּם עַד בִּלְתִּ֣י שָׁ֭מַיִם לֹ֣א יָקִ֑יצוּ וְלֹא יֵ֝עֹ֗רוּ מִשְּׁנָתָם 13 מִ֤י יִתֵּ֨ן בִּשְׁא֬וֹל תַּצְפִּנֵ֗נִי תַּ֭סְתִּירֵנִי עַד שׁ֣וּב אַפֶּ֑ךָ תָּ֤שִׁית לִ֖י חֹ֣ק וְתִזְכְּרֵנִי 14 אִם יָמ֥וּת גֶּ֗בֶר הֲיִחְ֫יֶה֥ כָּל יְמֵ֣י צְבָאִ֣י אֲיַחֵ֑ל עַד בֹּא חֲלִיפָתִי 15 תִּ֭קְרָא וְאָנֹכִ֣י אֶעֱנֶ֑ךָּ לְמַעֲשֵׂה֖ יָדֶ֣יךָ תִכְסֹף 16 כִּי עַ֭תָּה צְעָדַ֣י תִּסְפֹּר לָא תִשְׂמֹר עַל חַטָּאתִי 17 חָתֻ֣ם בִּצְרֹר פִּשְׁעִ֑י וַ֝תִּטְפֹּ֗ל עַל עֲוֺנִי 18 וְאֻלָם הַר נוֹפֵ֣ל יִבּ֑וֹל וְ֝צ֗וּר יֶעְתַּ֥ק מִמְּקֹמוֹ 19 אֲבָנִ֤ים שָׁ֥חֲקוּ מַ֗יִם תִּשְׁטֹף סְפִיחֶ֥יהָ עֲפַר אָ֑רֶץ וְתִקְוַ֖ת אֱנ֣וֹשׁ הֶאֱבַדְתָּ 20 תִּתְקְפֵ֣הוּ לָ֭נֶצַח וַיַּהֲלֹךְ֑ מְשַׁנֶּ֥ה פָ֝נָ֗יו וַתְּשַׁלְּחֵהוּ 21 יִכְבְּד֣וּ בָ֭נָיו וְלֹ֣א יֵדָ֑ע וְ֝יִצְעֲר֗וּ וְלֹא יָבִ֥ין לָמוֹ 22 אַךְ בְּ֭שָׂרוֹ עָלָ֣יו יִכְאָ֑ב וְ֝נַפְשׁ֗וֹ עָלָ֥יו תֶּאֱבָל