Matched Mismatch Not in MapM
299 words: 284 matched, 15 mismatch, 0 missing
1 וַיַּעַן יַהְוֶה אֶת אִ֭יּוֹב מִן הַסְּעָרָה וַיֹּאמַר 2 מִ֤י זֶ֨ה מַחְשִׁ֖יךְ עֵצָ֥ה בְמִלִּ֗ין בְּלִי דָעַת 3 אֱזָר נָ֣א כְגֶ֣בֶר חֲלָצֶ֑יךָ וְ֝אֶשְׁאָלְךָ֗ וְהוֹדִיעֵנִי 4 אֵיפֹ֣ה הָ֭יִיתָ בְּיָסְדִי אָ֑רֶץ הַ֝גֵּ֗ד אִם יָדַ֥עְתָּ בִינָה 5 מִי שָׂ֣ם מְ֭מַדֶּיהָ כִּ֣י תֵדָ֑ע א֤וֹ מִי נָטָ֖ה עָלֶ֣יהָ קָּו 6 עַל מָ֭ה אֲדָנֶ֣יהָ הָטְבָּ֑עוּ א֥וֹ מִי יָ֝רָ֗ה אֶ֣בֶן פִּנָּתָהּ 7 בְּרָן יַ֭חַד כּ֣וֹכְבֵי בֹ֑קֶר וַ֝יָּרִ֗יעוּ כָּל בְּנֵ֥י אֱלֹהִים 8 וַיֻּסַךְ בִּדְלָתַ֣יִם יָ֑ם בְּ֝גִיח֗וֹ מֵרֶ֥חֶם יֵצֵא 9 בְּשׂוּמִ֣י עָנָ֣ן לְבֻשׁ֑וֹ וַ֝עֲרָפֶ֗ל חֲתֻלָּתוֹ 10 וָאָשִׂם עָלָ֣יו חֻקִּ֑י וָ֝אָשִׂ֗ים בְּרִ֣יחַ וּדְלָתָיִם 11 וָאֹמַ֗ר עַד פֹּ֣ה תָ֭בוֹא וְלֹ֣א תֹסִ֑יף וּפֹא יִשָּׁבֵר גְּאוֹן גַּלֶּיךָ 12 הֲמִ֭יָּמֶיךָ צִוִּ֣יתָ בֹּ֑קֶר יִדַּעְתָּה שַׁחַר מְקֹמוֹ 13 לֶ֭אֱחֹז בְּכַנְפ֣וֹת הָאָ֑רֶץ וְיִנָּעֲר֖וּ רְשָׁעִ֣ים מִמֶּנָּה 14 תִּ֭תְהַפֵּךְ כְּחֹ֣מֶר חוֹתָ֑ם וְ֝יִתְיַצְּבוּ֗ כְּמ֣וֹ לְבוּשׁ 15 וְיִמָּנַ֣ע מֵרְשָׁעִ֣ים אוֹר וּזְר֥וֹעַ רָ֝מָ֗ה תִּשָּׁבֵר 16 הֲ֭בָאתָ עַד נַבְכֵי יָ֑ם וּבְחֵ֥קֶר תְּ֝ה֗וֹם הִתְהַלָּכְתָּ 17 הֲנִגְל֣וּ לְ֭ךָ שַׁעֲרֵי מָ֑וֶת וְשַׁעֲרֵ֖י צַלְמָ֣וֶת תִּרְאֶה 18 הִ֭תְבֹּנַנְתָּ עַד רַחֲבֵי אָ֑רֶץ הַ֝גֵּ֗ד אִם יָדַ֥עְתָּ כֻלָּהּ 19 אֵי זֶ֣ה הַ֭דֶּרֶךְ יִשְׁכָּן א֑וֹר וְ֝חֹ֗שֶׁךְ אֵי זֶ֥ה מְקֹמוֹ 20 כִּ֣י תִ֭קָּחֶנּוּ אֶל גְּבוּל֑וֹ וְכִי תָ֝בִ֗ין נְתִיב֥וֹת בֵּיתוֹ 21 יָ֭דַעְתָּ כִּי אָ֣ז תִּוָּלֵ֑ד וּמִסְפַּ֖ר יָמֶ֣יךָ רַבִּים 22 הֲ֭בָאתָ אֶל אֹצְר֣וֹת שָׁ֑לֶג וְאֹצְרוֹת בָּרָ֣ד תִּרְאֶה 23 אֲשֶׁר חָשַׂ֥כְתִּי לְעֶת צָ֑ר לְי֥וֹם קְ֝רָ֗ב וּמִלְחָמָה 24 אֵי זֶ֣ה הַ֭דֶּרֶךְ יֵחָ֣לֶק א֑וֹר יָפֵ֖ץ קָדִ֣ים עֲלֵי אָרֶץ 25 מִי פִלַּ֣ג לַשֶּׁ֣טֶף תְּעָלָ֑ה וְ֝דֶ֗רֶךְ לַחֲזִ֥יז קֹלוֹת 26 לְ֭הַמְטִיר עַל אֶ֣רֶץ לֹא אִ֑ישׁ מִ֝דְבָּ֗ר לֹא אָדָ֥ם בּוֹ 27 לְהַשְׂבִּ֣יעַ שֹׁ֭אָה וּמְשֹׁאָ֑ה וּ֝לְהַצְמִ֗יחַ מֹ֣צָא דֶשֶׁא 28 הֲיֵשׁ לַמָּטָ֥ר אָ֑ב א֥וֹ מִי ה֝וֹלִ֗יד אֶגְלֵי טָל 29 מִבֶּ֣טֶן מִ֭י יָצָ֣א הַקָּ֑רַח וּכְפֹ֥ר שָׁ֝מַ֗יִם מִ֣י יְלָדוֹ 30 כָּ֭אֶבֶן מַ֣יִם יִתְחַבָּ֑אוּ וּפְנֵ֥י תְ֝ה֗וֹם יִתְלַכָּדוּ 31 הַתְ֭קַשֵּׁר מַעֲדַנּ֣וֹת כִּימָ֑ה אוֹ מֹשְׁכ֖וֹת כְּסִ֣יל תְּפַתֵּחַ 32 הֲתֹצִ֣יא מַזָּר֣וֹת בְּעִתּ֑וֹ וְ֝עַ֗יִשׁ עַל בָּנֶ֥יהָ תַנְחֵם 33 הֲיִדַּעְתָּ חֻקּ֣וֹת שָׁמָ֑יִם אִם תָּשִׂ֖ים מִשְׁטָר֣וֹ בָאָרֶץ 34 הֲתָרִ֣ים לָעָ֣ב קוֹלֶ֑ךָ וְשִׁפְעַת מַ֥יִם תְּכַסֶּךָּ 35 הַתְשַׁלַּח֣ בְּרָקִ֣ים וְיֵלֵ֑כוּ וְיֹאמְרוּ֖ לְךָ֣ הִנֵּנוּ 36 מִי שָׁ֭ת בַּטֻּח֣וֹת חָכְמָ֑ה א֤וֹ מִי נָתַ֖ן לַשֶּׂ֣כְוִי בִינָה 37 מִי יְסַפֵּ֣ר שְׁחָקִ֣ים בְּחָכְמָ֑ה וְנִבְלֵ֥י שָׁ֝מַ֗יִם מִ֣י יַשְׁכִּיב 38 בְּצֶ֣קֶת עָ֭פָר לַמּוּצָ֑ק וּרְגָבִ֥ים יְדֻבָּקוּ 39 הֲתָצ֣וּד לְלָבִ֣יא טָ֑רֶף וְחַיַּ֖ת כְּפִירִ֣ים תְּמַלֵּא 40 כִּי יָשֹׁ֥חוּ בַמְּעוֹנ֑וֹת יֵשְׁבוּ֖ בַסֻּכָּ֣ה לְמוֹ אָרֶב 41 מִ֤י יָכִ֥ין לָעֹרֵ֗ב צֵ֫יד֥וֹ כִּי יְ֭לָדָו אֶל אֵ֣ל יְשַׁוֵּ֑עוּ יִ֝תְע֗וּ לִבְלִי אֹכֶל