Matched Mismatch Not in MapM
239 words: 228 matched, 11 mismatch, 0 missing
1 וַיַּ֥עַן אִיּ֗וֹב וַיֹּאמַר 2 שִׁמְע֣וּ שָׁ֭מוֹעַ מִלָּתִ֑י וּתְהִי זֹ֝֗את תַּנְח֥וּמֹתֵיכֶם 3 שָׂ֭אוּנִי וְאָנֹכִ֣י אֲדַבֵּ֑ר וְאַחַ֖ר דַּבְּרִ֣י תַלְעִיגוּ 4 הֶ֭אָנֹכִי לְאָדָ֣ם שִׂיחִ֑י וְאִם מַ֝דּ֗וּעַ לֹא תִקְצַ֥ר רוּחִי 5 פְּנוּ אֵלַ֥י וְהָשַׁ֑מּוּ וְשִׂ֖ימוּ יָ֣ד עַל פֶּה 6 וְאִם זָכַ֥רְתִּי וְנִבְהָ֑לְתִּי וְאָחַ֥ז בְּ֝שָׂרִ֗י פַּלָּצוּת 7 מַ֭דּוּעַ רְשָׁעִ֣ים יִחְיוּ֑ עָ֝תְק֗וּ גַּם גָּ֥בְרוּ חָיִל 8 זַרְעָ֤ם נָכ֣וֹן לִפְנֵיהֶ֣ם וְצֶאֱצָאֵיהֶם לְעֵינֵיהֶם 9 בָּתֵּיהֶ֣ם שָׁל֣וֹם מִפָּ֑חַד וְלֹ֤א שֵׁ֖בֶט אֱל֣וֹהַּ עֲלֵיהֶם 10 שׁוֹר֣וֹ עִ֭בַּר וְלֹ֣א יַגְעִ֑ל תְּפַלֵּ֥ט פָּ֝רָת֗וֹ וְלֹ֣א תְשַׁכֵּל 11 יְשַׁלְּח֣וּ כַ֭צֹּאן עֲוִילֵיהֶ֑ם וְ֝יַלְדֵיהֶ֗ם יְרַקֵּדוּן 12 יִ֭שְׂאוּ בְּתֹף וְכִנּ֑וֹר וְ֝יִשְׂמְח֗וּ לְק֣וֹל עוּגָב 13 יְבַלּוּ בַטּוֹב יְמֵיהֶם וּבְרֶגַע שְׁאוֹל יֵחַתּוּ 14 וַיֹּאמְר֣וּ לָ֭אֵל ס֣וּר מִמֶּ֑נּוּ וְדַ֥עַת דְּ֝רָכֶ֗יךָ לֹ֣א חָפָצְנוּ 15 מַה שַּׁדַּ֥י כִּי נַעַבְדֶ֑נּוּ וּמַה נּ֝וֹעִ֗יל כִּ֣י נִפְגַּע בּוֹ 16 הֵ֤ן לֹ֣א בְיָדָ֣ם טוּבָ֑ם עֲצַ֥ת רְ֝שָׁעִ֗ים רָ֣חֲקָה מֶנִּי 17 כַּמָּ֤ה נֵר רְשָׁ֘עִ֤ים יִדְעָ֗ךְ וְיָבֹ֣א עָלֵ֣ימוֹ אֵידָ֑ם חֲ֝בָלִ֗ים יְחַלֵּ֥ק בְּאַפּוֹ 18 יִהְיוּ֗ כְּתֶ֥בֶן לִפְנֵי ר֑וּחַ וּ֝כְמֹ֗ץ גְּנָבַ֥תּוּ סוּפָה 19 אֱל֗וֹהַּ יִצְפֹּן לְבָנָ֥יו אוֹנ֑וֹ יְשַׁלֵּ֖ם אֵלָ֣יו וְיֵדָע 20 יִרְא֣וּ עֵינָ֣ו כִּיד֑וֹ וּמֵחֲמַ֖ת שַׁדַּ֣י יִשְׁתֶּה 21 כִּ֤י מַה חֶפְצ֣וֹ בְּבֵית֣וֹ אַחֲרָ֑יו וּמִסְפַּ֖ר חֳדָשָׁ֣יו חֻצָּצוּ 22 הַלְאֵ֥ל יְלַמֶּד דָּ֑עַת וְ֝ה֗וּא רָמִ֥ים יִשְׁפּוֹט 23 זֶ֗ה יָ֭מוּת בְּעֶ֣צֶם תֻּמּ֑וֹ כֻּ֝לּ֗וֹ שַׁלְאֲנַ֥ן וְשָׁלֵיו 24 עֲ֭טִינָיו מָלְא֣וּ חֵלֶב וּמֹ֖חַ עַצְמוֹתָ֣יו יְשֻׁקֶּה 25 וְזֶ֗ה יָ֭מוּת בְּנֶ֣פֶשׁ מָרָ֑ה וְלֹא אָ֝כַ֗ל בַּטּוֹבָה 26 יַ֭חַד עַל עָפָ֣ר יִשְׁכָּ֑בוּ וְ֝רִמָּ֗ה תְּכַסֶּ֥ה עֲלֵיהֶם 27 הֵ֣ן יָ֭דַעְתִּי מַחְשְׁבוֹתֵיכֶם֑ וּ֝מְזִמּ֗וֹת עָלַ֥י תַּחְמֹסוּ 28 כִּ֤י תֹאמְר֗וּ אַיֵּ֥ה בֵית נָדִ֑יב וְ֝אַיֵּ֗ה אֹ֤הֶל מִשְׁכְּנ֬וֹת רְשָׁעִים 29 הֲלֹ֣א שְׁ֭אֶלְתֶּם ע֣וֹבְרֵי דָ֑רֶךְ וְ֝אֹתֹתָ֗ם לֹ֣א תְנַכֵּרוּ 30 כִּ֤י לְי֣וֹם אֵ֭יד יֵחָ֣שֶׂךְ רָ֑ע לְי֖וֹם עֲבָר֣וֹת יוּבָלוּ 31 מִי יַגִּ֣יד עַל פָּנָ֣יו דַּרְכּ֑וֹ וְהוּא עָ֝שָׂ֗ה מִ֣י יְשַׁלֶּם לוֹ 32 וְ֭הוּא לִקְבָר֣וֹת יוּבָ֑ל וְעַל גָּדִ֥ישׁ יִשְׁקוֹד 33 מָתְקוּ ל֗וֹ רִגְבֵ֫י נָ֥חַל וְ֭אַחֲרָיו כָּל אָדָ֣ם יִמְשׁ֑וֹךְ וּ֝לְפָנָ֗יו אֵ֣ין מִסְפָּר 34 וְ֭אֵיךְ תְּנַחֲמ֣וּנִי הָ֑בֶל וּ֝תְשׁ֥וּבֹתֵיכֶ֗ם נִשְׁאַר מָעַל