Matched Mismatch Not in MapM
143 words: 135 matched, 7 mismatch, 1 missing
1 וַ֭יַּעַן בִּלְדַּ֥ד הַשֻּׁחִ֗י וַיֹּאמַר 2 עַד אָ֤נָה לֹא תָּשִׂים קִנְצֵי לְמִלִּין חֲדַל וְאַחַר נְדַבֵּר 3 מַ֭דּוּעַ נֶחְשַׁ֣בְנוּ כַבְּהֵמָ֑ה נִ֝טְמִ֗ינוּ בְּעֵינֵיכֶם 4 טֹרֵ֥ף נַפְשׁ֗וֹ בְּאַ֫פּ֥וֹ הַלְ֭מַעַנְךָ תֵּעָ֣זַב אָ֑רֶץ וְיֶעְתַּק צ֝֗וּר מִמְּקֹמוֹ 5 גַּ֤ם א֣וֹר רְשָׁעִ֣ים יִדְעָ֑ךְ וְלֹא יִ֝גַּ֗הּ שְׁבִ֣יב אִשּׁוֹ 6 א֭וֹר חָשַׁ֣ךְ בְּאָהֳל֑וֹ וְ֝נֵר֗וֹ עָלָ֥יו יִדְעָךְ 7 יֵ֭צְרוּ צַעֲדֵ֣י אוֹנ֑וֹ וְתַשְׁלִיכֵה֥וּ עֲצָתוֹ 8 כִּי שֻׁלַּ֣ח בְּרֶ֣שֶׁת בְּרַגְלָ֑יו וְעַל שְׂ֝בָכָ֗ה יִתְהַלָּךְ 9 יֹאחֵ֣ז בְּעָקֵ֣ב פָּ֑ח יַחֲזֵ֖ק עָלָ֣יו צַמִּים 10 טָמ֣וּן בָּאָ֣רֶץ חַבְל֑וֹ וּ֝מַלְכֻּדְתּ֗וֹ עֲלֵ֣י נָתִיב 11 סָ֭בִיב בִּעֲתֻ֣הוּ בַלָּה֑וֹת וֶהֱפִיצֻ֥הוּ לְרַגְלָיו 12 יְהִי רָעֵ֥ב אֹנ֑וֹ וְ֝אֵ֗יד נָכ֥וֹן לְצַלְעוֹ 13 יֹ֭אכַל בַּדֵּ֣י עוֹר֑וֹ יֹאכַ֥ל בַּ֝דָּ֗יו בְּכ֣וֹר מָוֶת 14 יִנָּתֵ֣ק מֵ֭אָהֳלוֹ מִבְטַח֑וֹ וְ֝תַצְעִדֵ֗הוּ לְמֶ֣לֶךְ בַּלָּהוֹת 15 תִּשְׁכּ֣וֹן בְּ֭אָהֳלוֹ בְּלִילִית יְזֹרֶ֖ה עַל נָוֵ֣הוּ גָפְרִית 16 מִ֭תַּחַת שָׁרָשָׁ֣יו יִבָ֑שׁוּ וּ֝מִמַּ֗עַל יִמַּ֥ל קְצִירוֹ 17 זִכְרוֹ אָ֭בַד מִנִּי אָ֑רֶץ וְלֹא שֵׁ֥ם ל֝֗וֹ עַל פְּנֵי חוּץ 18 יֶ֭הְדְּפֻהוּ מֵא֣וֹר אֶל חֹ֑שֶׁךְ וּמִתֵּבֵל֥ יְנִדֻּהוּ 19 לֹ֘א נִ֤ין ל֣וֹ וְלֹא נֶ֣כֶד בְּעַמּ֑וֹ וְאֵ֥ין שָׂ֝רִ֗יד בִּמְגוּרָיו 20 עַל י֭וֹמוֹ נָשַׁ֣מּוּ אַחֲרֹנִ֑ים וְ֝קַדְמֹנִ֗ים אָ֣חֲזוּ שָׂעַר 21 אַךְ אֵ֭לֶּה מִשְׁכְּנ֣וֹת עַוָּ֑ל וְ֝זֶ֗ה מְק֣וֹם לֹא יָדַע אֵל