Matched Mismatch Not in MapM
209 words: 197 matched, 12 mismatch, 0 missing
1 וַיְהִ֣י הַיּ֔וֹם וַיָּבֹ֙אוּ֙ בְּנֵ֣י הָאֱלֹהִ֔ים לְהִתְיַצֵּ֖ב עַל יַהְוֶה וַיָּב֤וֹא גַם הַשָּׂטָן֙ בְּתֹכָ֔ם לְהִתְיַצֵּ֖ב עַל יַהְוֶה 2 וַיֹּ֤אמֶר יַהְוֶה אֶל הַשָּׂטָ֔ן אֵ֥י מִזֶּ֖ה תָּבֹ֑א וַיַּ֨עַן הַשָּׂטָ֤ן אֶת יַהְוֶה וַיֹּאמַ֔ר מִשֻּׁ֣ט בָּאָ֔רֶץ וּמֵהִתְהַלֵּךְ֖ בָּהּ 3 וַיֹּ֨אמֶר יַהְוֶה אֶל הַשָּׂטָ֗ן הֲשַׂ֣מְתָּ לִבְּךָ֮ אֶל עַבְדִּ֣י אִיּוֹב֒ כִּי֩ אֵ֨ין כָּמֹ֜הוּ בָּאָ֗רֶץ אִ֣ישׁ תָּ֧ם וְיָשָׁ֛ר יְרֵ֥א אֱלֹהִ֖ים וְסָ֣ר מֵרָ֑ע וְעֹדֶ֙נּוּ֙ מַחֲזִ֣יק בְּתֻמָּת֔וֹ וַתְּסִיתֵ֥נִי ב֖וֹ לְבַלְּע֥וֹ חִנָּם 4 וַיַּ֧עַן הַשָּׂטָ֛ן אֶת יַהְוֶה וַיֹּאמַ֑ר ע֣וֹר בְּעַד ע֗וֹר וְכֹל֙ אֲשֶׁ֣ר לָאִ֔ישׁ יִתֵּ֖ן בְּעַ֥ד נַפְשׁוֹ 5 אוּלָם֙ שְׁלַח נָ֣א יָדְךָ וְגַ֥ע אֶל עַצְמ֖וֹ וְאֶל בְּשָׂר֑וֹ אִם לֹ֥א אֶל פָּנֶ֖יךָ יְבָרֲכֶךָּ 6 וַיֹּ֧אמֶר יַהְוֶה אֶל הַשָּׂטָ֖ן הִנּ֣וֹ בְיָדֶ֑ךָ אַ֖ךְ אֶת נַפְשׁ֥וֹ שְׁמֹר 7 וַיֵּצֵא֙ הַשָּׂטָ֔ן מֵאֵ֖ת פְּנֵ֣י יַהְוֶה וַיַּ֤ךְ אֶת אִיּוֹב֙ בִּשְׁחִ֣ין רָ֔ע מִכַּ֥ף רַגְל֖וֹ עַד קָדְקֳדוֹ 8 וַיִּקַּח ל֣וֹ חֶ֔רֶשׂ לְהִתְגָּרֵ֖ד בּ֑וֹ וְה֖וּא יֹשֵׁ֥ב בְּתוֹךְ הָאַשְׁפֹּת 9 וַתֹּ֤אמֶר לוֹ֙ אִשְׁתּ֔וֹ עֹדְךָ֖ מַחֲזִ֣יק בְּתֻמָּתֶ֑ךָ בָּרֵ֥ךְ אֱלֹהִ֖ים וָמֻת 10 וַיֹּ֣אמֶר אֵלֶ֗יהָ כְּדַבֵּ֞ר אַחַ֤ת הַנְּבָלוֹת֙ תְּדַבֵּ֔רִי גַּ֣ם אֶת הַטּ֗וֹב נְקַבֵּל֙ מֵאֵ֣ת הָאֱלֹהִ֔ים וְאֶת הָרָ֖ע לֹ֣א נְקַבֵּ֑ל בְּכָל זֹ֛את לֹא חָטָ֥א אִיּ֖וֹב בִּשְׂפָתָיו 11 וַיִּשְׁמְעוּ֞ שְׁלֹ֣שֶׁת רֵעֵ֣י אִיּ֗וֹב אֵ֣ת כָּל הָרָעָ֣ה הַזֹּאת֮ הַבָּ֣אָה עָלָיו֒ וַיָּבֹ֙אוּ֙ אִ֣ישׁ מִמְּקֹמ֔וֹ אֱלִיפַ֤ז הַתֵּימָנִי וּבִלְדַּ֣ד הַשּׁוּחִ֔י וְצוֹפַ֖ר הַנַּעֲמָתִי֑ וַיִּוָּעֲד֣וּ יַחְדָּ֔ו לָב֥וֹא לָנוּד ל֖וֹ וּלְנַחֲמוֹ 12 וַיִּשְׂא֨וּ אֶת עֵינֵיהֶ֤ם מֵרָחוֹק וְלֹ֣א הִכִּירֻ֔הוּ וַיִּשְׂא֥וּ קוֹלָ֖ם וַיִּבְכּ֑וּ וַיִּקְרְעוּ אִ֣ישׁ מְעִל֔וֹ וַיִּזְרְק֥וּ עָפָ֛ר עַל רָאשֵׁיהֶ֖ם הַשָּׁמָיְמָה 13 וַיֵּשְׁבוּ֤ אִתּוֹ֙ לָאָ֔רֶץ שִׁבְעַ֥ת יָמִ֖ים וְשִׁבְעַ֣ת לֵיל֑וֹת וְאֵין דֹּבֵ֤ר אֵלָיו֙ דָּבָ֔ר כִּ֣י רָא֔וּ כִּי גָדַ֥ל הַכְּאֵ֖ב מְאֹד