Matched Mismatch Not in MapM
210 words: 203 matched, 7 mismatch, 0 missing
1 וַ֭יַּעַן אֱלִיפַ֥ז הַתֵּמָנִי֗ וַיֹּאמַר 2 הַלְאֵ֥ל יִסְכָּן גָּ֑בֶר כִּי יִסְכֹּ֖ן עָלֵ֣ימוֹ מַשְׂכִּיל 3 הַחֵ֣פֶץ לְ֭שַׁדַּי כִּ֣י תִצְדָּ֑ק וְאִם בֶּ֝֗צַע כִּי תַתֵּ֥ם דְּרָכֶיךָ 4 הֲמִ֭יִּרְאָתְ֣ךָ יֹכִיחֶ֑ךָ יָב֥וֹא עִ֝מְּךָ֗ בַּמִּשְׁפָּט 5 הֲלֹ֣א רָעָתְךָ רַבָּ֑ה וְאֵין קֵ֝֗ץ לַעֲוֺנֹתֶיךָ 6 כִּי תַחְבֹּ֣ל אַחֶ֣יךָ חִנָּ֑ם וּבִגְדֵ֖י עֲרוּמִּ֣ים תַּפְשִׁיט 7 לָא מַ֭יִם עָיֵ֣ף תַּשְׁקֶ֑ה וּ֝מֵרָעֵ֗ב תִּמְנַע לָחֶם 8 וְאִ֣ישׁ זְ֭רוֹעַ ל֣וֹ הָאָ֑רֶץ וּנְשׂ֥וּא פָ֝נִ֗ים יֵ֣שֶׁב בָּהּ 9 אַ֭לְמָנוֹת שִׁלַּ֣חְתָּ רֵיקָ֑ם וּזְרֹע֖וֹת יְתֹמִ֣ים יְדֻכָּא 10 עַל כֵּ֭ן סְבִיבוֹתֶ֣יךָ פַחִ֑ים וִ֝יבַהֶלְךָ֗ פַּ֣חַד פִּתְאֹם 11 אוֹ חֹ֥שֶׁךְ לֹא תִרְאֶ֑ה וְשִׁפְעַת מַ֥יִם תְּכַסֶּךָּ 12 הֲלֹא אֱ֭לוֹהַּ גֹּ֣בַהּ שָׁמָ֑יִם וְרָאֹה רֹ֖אשׁ כּוֹכָבִ֣ים כִּי רָמּוּ 13 וְאָ֭מַרְתָּ מַה יָּ֣דַע אֵ֑ל הַבְעַ֖ד עֲרָפֶ֣ל יִשְׁפּוֹט 14 עָבִ֣ים סֵתֶר ל֭וֹ וְלֹ֣א יִרְאֶ֑ה וְח֥וּג שָׁ֝מַ֗יִם יִתְהַלָּךְ 15 הַאֹ֣רַח עוֹלָ֣ם תִּשְׁמ֑וֹר אֲשֶׁ֖ר דָּרְכ֣וּ מְתֵי אָוֶן 16 אֲשֶׁר קֻמְּט֥וּ וְלֹא עֵ֑ת נָ֝הָ֗ר יוּצַ֥ק יְסוֹדָם 17 הָאֹמְרִ֣ים לָ֭אֵל ס֣וּר מִמֶּ֑נּוּ וּמַה יִּפְעַ֖ל שַׁדַּ֣י לָנוּ 18 וְה֤וּא מִלֵּ֣א בָתֵּיהֶ֣ם ט֑וֹב וַעֲצַ֥ת רְ֝שָׁעִ֗ים רָ֣חֲקָה מֶנִּי 19 יִרְא֣וּ צַדִּיקִ֣ים וְיִשְׂמָ֑חוּ וְ֝נָקִ֗י יִלְעַג לָמוֹ 20 אִם לֹ֣א נִכְחַ֣ד קִנְיָנָם וְ֝יִתְרָ֗ם אָ֣כְלָה אֵשׁ 21 הַסְכֶּן נָ֣א עִמּ֣וֹ וּשְׁלָ֑ם בָּ֝הֶ֗ם תְּבוּאָתְךָ טוֹבָה 22 קַח נָ֣א מִפִּ֣יו תּוֹרָ֑ה וְשִׂ֥ים אֲ֝מָרָ֗יו בִּלְבָבֶךָ 23 אִם תָּשׁ֣וּב עַד שַׁ֭דַּי תִּבָּנֶ֑ה תַּרְחִ֥יק עַ֝וְלָ֗ה מֵאָהֳלֶךָ 24 וְשִׁית עַל עָפָ֥ר בָּ֑צֶר וּבְצוּר נְחָלִ֣ים אוֹפִיר 25 וְהָיָ֣ה שַׁדַּ֣י בְּצָרֶ֑יךָ וְכֶ֖סֶף תּוֹעָפ֣וֹת לָךְ 26 כִּי אָ֭ז עַל שַׁדַּ֣י תִּתְעַנָּ֑ג וְתִשָּׂ֖א אֶל אֱל֣וֹהַּ פָּנֶיךָ 27 תַּעְתִּ֣יר אֵ֭לָיו וְיִשְׁמָעֶ֑ךָּ וּנְדָרֶ֥יךָ תְשַׁלֵּם 28 וְתִגְזַר אֹ֭מֶר וְיָ֣קָם לָ֑ךְ וְעַל דְּ֝רָכֶ֗יךָ נָ֣גַהּ אוֹר 29 כִּי הִ֭שְׁפִּילוּ וַתֹּ֣אמֶר גֵּוָ֑ה וְשַׁ֖ח עֵינַ֣יִם יוֹשִׁעַ 30 יְמַלֵּ֥ט אֶת נָקִ֑י וְ֝נִמְלַ֗ט בְּבֹ֣ר כַּפֶּיךָ