Matched Mismatch Not in MapM
118 words: 115 matched, 3 mismatch, 0 missing
1 וַיַּ֥עַן אִיּ֗וֹב וַיֹּאמַר 2 גַּם הַ֭יּוֹם מְרִ֣י שִׂחִ֑י יָ֝דִ֗י כָּבְדָ֥ה עַל אַנְחָתִי 3 מִי יִתֵּ֣ן יָ֭דַעְתִּי וְאֶמְצָאֵ֑הוּ אָ֝ב֗וֹא עַד תְּכוּנָתוֹ 4 אֶעֶרְכָ֣ה לְפָנָ֣יו מִשְׁפָּ֑ט וּ֝פִ֗י אֲמַלֵּ֥א תוֹכָחוֹת 5 אֵ֭דְעָה מִלִּ֣ים יַעֲנֵ֑נִי וְ֝אָבִ֗ינָה מַה יֹּ֥אמַר לִי 6 הַבְּרָב כֹּ֭חַ יָרִ֣יב עִמָּדִ֑י לֹ֥א אַךְ ה֝֗וּא יָשִׂ֥ם בִּי 7 שָׁ֗ם יָ֭שָׁר נוֹכָ֣ח עִמּ֑וֹ וַאֲפַלְּטָ֥ה לָ֝נֶ֗צַח מִשֹּׁפְטִי 8 הֵ֤ן קֶ֣דֶם אֶהֱלֹ֣ךְ וְאֵינֶ֑נּוּ וְ֝אָח֗וֹר וְלֹא אָבִ֥ין לוֹ 9 שְׂמֹ֣אול בַּעֲשֹׂת֣וֹ וְלֹא אָ֑חַז יַעְטֹ֥ף יָ֝מִ֗ין וְלֹ֣א אֶרְאֶה 10 כִּי יָ֭דַע דֶּ֣רֶךְ עִמָּדִ֑י בְּ֝חָנַ֗נִי כַּזָּהָ֥ב אֵצֵא 11 בַּ֭אֲשֻׁרוֹ אָחֲזָ֣ה רַגְלִ֑י דַּרְכּ֖וֹ שָׁמַ֣רְתִּי וְלֹא אָט 12 מִצְוַ֣ת שְׂ֭פָתָיו וְלֹ֣א אָמִ֑ישׁ בְּחֵקִי צָפַ֥נְתִּי אִמְרֵי פִיו 13 וְה֣וּא בָאחַר וּמִ֣י יְשִׁיבֶ֑נּוּ וְנַפְשׁ֖וֹ אִוְּתָ֣ה וַיָּעַשׂ 14 כִּ֭י יַשְׁלִ֣ים חֻקִּ֑י וְכָהֵ֖נָּה רַבּ֣וֹת עִמּוֹ 15 עַל כֵּ֭ן מִפָּנָ֣יו אֶבָּהֵ֑ל אֶ֝תְבּוֹנֵ֗ן וְאֶפְחַ֥ד מִמֶּנּוּ 16 וְ֭אֵל הֵרַ֣ךְ לִבִּ֑י וְ֝שַׁדַּ֗י הִבְהִילָנִי 17 כִּי לָא נִ֭צְמַתִּי מִפְּנֵי חֹ֑שֶׁךְ וּ֝מִפָּנַ֗י כִּסָּה אֹפֶל