Matched Mismatch Not in MapM
296 words: 282 matched, 14 mismatch, 0 missing
1 וַיַּ֥עַן אֱלִיה֗וּא וַיֹּאמַר 2 שִׁמְע֣וּ חֲכָמִ֣ים מִלָּ֑י וְ֝יֹדְעִי֗ם הַאֲזִי֥נוּ לִי 3 כִּי אֹ֭זֶן מִלִּ֣ין תִּבְחָ֑ן וְ֝חֵ֗ךְ יִטְעַ֥ם לֶאֱכֹל 4 מִשְׁפָּ֥ט נִבְחֲרָה לָּ֑נוּ נֵדְעָ֖ה בֵינֵ֣ינוּ מַה טּוֹב 5 כִּי אָמַ֣ר אִיּ֣וֹב צָדַ֑קְתִּי וְ֝אֵ֗ל הֵסִ֥יר מִשְׁפָּטִי 6 עַל מִשְׁפָּטִ֥י אֲכַזֵּ֑ב אָנ֖וּשׁ חִצִּ֣י בְלִי פָשַׁע 7 מִי גֶ֥בֶר כְּאִיּ֑וֹב יִשְׁתֶּה לַּ֥עַג כַּמָּיִם 8 וְאָרַ֣ח לְ֭חֶבְרָה עִם פֹּ֣עֲלֵי אָ֑וֶן וְ֝לָלֶ֗כֶת עִם אַנְשֵׁי רֶשַׁע 9 כִּי אָ֭מַר לֹ֣א יִסְכָּן גָּ֑בֶר בִּ֝רְצֹת֗וֹ עִם אֱלֹהִים 10 לָכֵ֤ן אַנֲשֵׁי לֵבָ֗ב שִׁמְע֫וּ לִ֥י חָלִ֖לָה לָאֵ֥ל מִרְשֹׁעַ וְשַׁדַּ֥י מֵעֲוֺל 11 כִּ֤י פֹ֣עַל אָ֭דָם יְשַׁלֶּם ל֑וֹ וּכְאֹרַ֥ח אִ֝֗ישׁ יַמְצִאֶנּוּ 12 אַף אָמְנָ֗ם אֵ֥ל לֹא יַרְשִׁ֑יעַ וְ֝שַׁדַּ֗י לֹא יְעַוֵּ֥ת מִשְׁפָּט 13 מִי פָקַ֣ד עָלָ֣יו אָ֑רְצָה וּמִ֥י שָׂ֝֗ם תֵּבֵ֥ל כֻּלָּהּ 14 אִם יָשִׂ֣ים אֵלָ֣יו רוּחוֹ וְנִשְׁמָתוֹ אֵלָיו יֶאֱסֹף 15 יִגְוַ֣ע כָּל בָּשָׂ֣ר יָ֑חַד וְ֝אָדָ֗ם עַל עָפָ֥ר יָשׁוּב 16 וְאִם בִּינֹתָ שִׁמְעָה זֹּ֑את הַ֝אֲזִ֗ינָה לְק֣וֹל מִלָּי 17 הַאַ֬ף שׂוֹנֵ֣א מִשְׁפָּ֣ט יַחֲב֑וֹשׁ וְאִם צַדִּ֖יק כַּבִּ֣יר תַּרְשִׁיעַ 18 הָאֹמֵר לְמֶ֣לֶךְ בְּלִיָּ֑עַל רָ֝שָׁ֗ע אֶל נְדִיבִים 19 אֲשֶׁ֤ר לֹא נָשָׂ֨א פְּנֵ֥י שָׂרִ֗ים וְלֹ֣א נִכַּר שׁ֭וֹעַ לִפְנֵי דָ֑ל כִּי מַעֲשֵׂ֖ה יָדָ֣יו כֻּלָּם 20 רֶ֤גַע יָמֻתוּ֮ וַחֲצ֢וֹת לָ֥֫יְלָה יְגֹעֲשׁ֣וּ עָ֣ם וְיַעֲבֹ֑רוּ וְיָסִ֥ירוּ אַ֝בִּ֗יר לֹ֣א בְיָד 21 כִּי עֵ֭ינָיו עַל דַּרְכֵי אִ֑ישׁ וְכָל צְעָדָ֥יו יִרְאֶה 22 אֵין חֹ֭שֶׁךְ וְאֵ֣ין צַלְמָ֑וֶת לְהִסָּ֥תֶר שָׁ֝֗ם פֹּ֣עֲלֵי אָוֶן 23 כִּ֤י לֹ֣א עַל אִ֭ישׁ יָשִׂ֣ים ע֑וֹד לַהֲלֹ֥ךְ אֶל אֵ֝֗ל בַּמִּשְׁפָּט 24 יָרֹ֣עַ כַּבִּירִ֣ים לֹא חֵ֑קֶר וַיַּעֲמֵ֖ד אֲחֵרִ֣ים תַּחְתָּם 25 לָכֵ֗ן יַ֭כִּיר מַעְבָּדֵיהֶ֑ם וְהָ֥פַךְ לַ֝֗יְלָה וְיִדַּכָּאוּ 26 יָחֵת רְשָׁעִ֥ים סְפָקָ֗ם בִּמְק֥וֹם רֹאִים 27 אֲשֶׁ֣ר עַל כֵּ֭ן סָ֣רוּ מֵאַחֲרָ֑יו וְכָל דְּ֝רָכָ֗יו לֹ֣א הִשְׂכִּילוּ 28 לְהָבִ֣יא עָ֭לָיו צַעֲקַת דָּ֑ל וְצַעֲקַ֖ת עֲנִיִּ֣ים יִשְׁמָע 29 וְה֤וּא יַשְׁקִ֨ט וּמִ֥י יַרְשִׁ֗עַ וְיַסְתֵּ֣ר פָּ֭נִים וּמִ֣י יְשׁוּרֶ֑נּוּ וְעַל גּ֖וֹי וְעַל אָדָ֣ם יָחַד 30 מִ֭מְּלֹךְ אָדָ֥ם חָנֵ֗ף מִמֹּ֥קְשֵׁי עָם 31 כִּי אֶל אֵ֭ל הֶאָמַ֥ר נָשָׂ֗אתִי לֹ֣א אֶחְבֹּל 32 בִּלְעֲדֵ֣י אֶ֭חֱזֶה אַתָּ֣ה הֹרֵ֑נִי אִם עָ֥וֶל פָּ֝עַ֗לְתִּי לֹ֣א אֹסִיף 33 הַמֵעִמְּךָ יְשַׁלְּמֶ֨נָּה כִּי מָאַ֗סְתָּ כִּי אַתָּ֣ה תִבְחַ֣ר וְלֹא אָ֑נִי וּמַה יָּדַ֥עְתָּ דַבֵּר 34 אַנְשֵׁ֣י לֵ֭בָב יֹ֣אמְרוּ לִ֑י וְגֶ֥בֶר חָ֝כָ֗ם שֹׁמֵ֥עַ לִי 35 אִ֭יּוֹב לֹא בְדַ֣עַת יְדַבֵּ֑ר וּ֝דְבָרָ֗יו לֹ֣א בְהַשְׂכֵּיל 36 אֲבָל יִבָּחֵ֣ן אִיּ֣וֹב עַד נֶ֑צַח עַל תְּ֝שֻׁבֹ֗ת כְּאַנְשֵׁי אָוֶן 37 כִּ֥י יֹ֘סִ֤יף עַל חַטָּאת֣וֹ פֶ֭שַׁע בֵּינֵ֣ינוּ יִסְפּוֹק וְיֶ֖רֶב אֲמָרָ֣יו לָאֵל