Matched Mismatch Not in MapM
98 words: 95 matched, 3 mismatch, 0 missing
1 שִׁ֖יר מִזְמ֣וֹר לְדָוִד 2 נָכ֣וֹן לִבִּ֣י אֱלֹהִ֑ים אָשִׁ֥ירָה וַ֝אֲזַמְּרָ֗ה אַף כְּבוֹדִי 3 ע֭וּרָה הַנֵּ֥בֶל וְכִנּ֗וֹר אָעִ֥ירָה שָּׁחַר 4 אוֹדְךָ֖ בָעַמִּ֥ים יַהְוֶה וַ֝אֲזַמֶּרְךָ֗ בַּלְּאֻמִּים 5 כִּי גָד֣וֹל מֵעַל שָׁמַ֣יִם חַסְדֶּ֑ךָ וְעַד שְׁחָקִ֥ים אֲמִתֶּךָ 6 ר֣וּמָה עַל שָׁמַ֣יִם אֱלֹהִ֑ים וְעַ֖ל כָּל הָאָ֣רֶץ כְּבוֹדֶךָ 7 לְ֭מַעַן יֵחָלְצ֣וּן יְדִידֶ֑יךָ הוֹשִׁ֖יעָה יְמִינְךָ וַעֲנֵנִי 8 אֱלֹהִ֤ים דִּבֶּ֥ר בְּקָדְשׁ֗וֹ אֶ֫עְלֹ֥זָה אֲחַלְּקָ֥ה שְׁכֶ֑ם וְעֵ֖מֶק סֻכּ֣וֹת אֲמַדֵּד 9 לִ֤י גִלְעָ֨ד לִ֤י מְנַשֶּׁ֗ה וְ֭אֶפְרַיִם מָע֣וֹז רֹאשִׁ֑י יְ֝הוּדָ֗ה מְחֹקְקִי 10 מוֹאָ֤ב סִ֬יר רַחְצִ֗י עַל אֱ֭דוֹם אַשְׁלִ֣יךְ נַעֲלִ֑י עֲלֵי פְ֝לֶ֗שֶׁת אֶתְרוֹעָע 11 מִ֣י יֹ֭בִלֵנִי עִ֣יר מָצֹר מִ֖י נָחַ֣נִי עַד אֱדוֹם 12 הֲלֹא אֱלֹהִ֥ים זְנַחְתָּ֑נוּ וְלֹא תֵצֵ֥א אֱ֝לֹהִ֗ים בְּצִבְאֹתֵינוּ 13 הָבָה לָּ֣נוּ עֶזְרָ֣ת מִצָּ֑ר וְ֝שָׁ֗וְא תְּשׁוּעַ֥ת אָדָם 14 בֵּאלֹהִ֥ים נַעֲשֶׂה חָ֑יִל וְ֝ה֗וּא יָב֥וּס צָרֵינוּ