Matched Mismatch Not in MapM
125 words: 123 matched, 2 mismatch, 0 missing
1 לַמְנַצֵּ֬חַ עַל הַגִּתִּ֬ית לְאָסָף 2 הַ֭רְנִינוּ לֵאלֹהִ֣ים עוּזֵּ֑נוּ הָ֝רִ֗יעוּ לֵאלֹהֵ֥י יַעֲקֹב 3 שְׂאוּ זִ֭מְרָה וּתְנוּ תֹ֑ף כִּנּ֖וֹר נָעִ֣ים עִם נָבֶל 4 תִּקְע֣וּ בַחֹ֣דֶשׁ שׁוֹפָ֑ר בַּ֝כֵּ֗סֶה לְי֣וֹם חַגֵּנוּ 5 כִּ֤י חֹ֣ק לְיִשְׂרָאֵ֣ל ה֑וּא מִ֝שְׁפָּ֗ט לֵאלֹהֵ֥י יַעֲקֹב 6 עֵד֤וּת בִּיה֘וֹסֵ֤ף שָׂמ֗וֹ בְּ֭צֵאתוֹ עַל אֶ֣רֶץ מִצְרָ֑יִם שְׂפַ֖ת לֹא יָדַ֣עְתִּי אֶשְׁמָע 7 הֲסִיר֣וֹתִי מִסֵּ֣בֶל שִׁכְמ֑וֹ כַּ֝פָּ֗יו מִדּ֥וּד תַּעֲבֹרְנָה 8 בַּצָּרָ֥ה קָרָ֗אתָ וָאֲחַ֫לְּצֶ֥ךָּ אֶ֭עֶנְךָ בְּסֵ֣תֶר רַ֑עַם אֶבְחָנְךָ֨ עַל מֵ֖י מְרִיבָ֣ה סֶלָה 9 שְׁמַ֣ע עַ֭מִּי וְאָעִ֣ידָה בָּ֑ךְ יִ֝שְׂרָאֵ֗ל אִם תִּשְׁמַע לִי 10 לֹא יִהְיֶ֣ה בְ֭ךָ אֵ֣ל זָ֑ר וְלֹ֥א תִ֝שְׁתַּחֲוֶ֗ה לְאֵ֣ל נֵכָר 11 אָנֹכִי֨ יַהְוֶה אֱלֹהֶ֗יךָ הַמַּ֭עַלְךָ מֵאֶ֣רֶץ מִצְרָ֑יִם הַרְחֶב פִּ֝֗יךָ וַאֲמַלְאֵהוּ 12 וְלֹא שָׁמַ֣ע עַמִּ֣י לְקוֹלִ֑י וְ֝יִשְׂרָאֵ֗ל לֹא אָ֥בָה לִי 13 וָ֭אֲשַׁלְּחֵהוּ בִּשְׁרִיר֣וּת לִבָּ֑ם יֵ֝לְכ֗וּ בְּמוֹעֲצוֹ֖תֵיהֶם 14 ל֗וּ עַ֭מִּי שֹׁמֵ֣עַ לִ֑י יִ֝שְׂרָאֵ֗ל בִּדְרָכַ֥י יְהַלֵּכוּ 15 כִּ֭מְעַט אוֹיְבֵיהֶ֣ם אַכְנִ֑יעַ וְעַ֥ל צָ֝רֵיהֶ֗ם אָשִׁ֥יב יָדִי 16 מְשַׂנְאֵ֣י יַהְוֶה יְכַחֲשׁוּ ל֑וֹ וִיהִ֖י עִתָּ֣ם לְעוֹלָם 17 וַיַּ֭אֲכִילֵהוּ מֵחֵ֣לֶב חִטָּ֑ה וּ֝מִצּ֗וּר דְּבַ֣שׁ אַשְׂבִּיעֶךָ