Matched Mismatch Not in MapM
96 words: 90 matched, 6 mismatch, 0 missing
1 לְדָוִ֡ד אֵ֘לֶ֤יךָ יַהְוֶה אֶקְרָ֗א צוּרִי֮ אַל תֶּחֱרַ֢שׁ מִ֫מֶּ֥נִּי פֶּן תֶּחֱשֶׁ֥ה מִמֶּ֑נִּי וְ֝נִמְשַׁ֗לְתִּי עִם י֥וֹרְדֵי בוֹר 2 שְׁמַ֤ע ק֣וֹל תַּ֭חֲנוּנַי בְּשַׁוְּעִ֣י אֵלֶ֑יךָ בְּנָשְׂאִ֥י יָ֝דַ֗י אֶל דְּבִ֥יר קָדְשֶׁךָ 3 אַל תִּמְשְׁכֵ֣נִי עִם רְשָׁעִים֮ וְעִם פֹּ֢עֲלֵ֫י אָ֥וֶן דֹּבְרֵ֣י שָׁ֭לוֹם עִם רֵעֵיהֶ֑ם וְ֝רָעָ֗ה בִּלְבָבָם 4 תֶּן לָהֶ֣ם כְּפָעֳלָם֮ וּכְרֹ֢עַ מַעַלְלֵ֫יהֶ֥ם כְּמַעֲשֵׂ֣ה יְ֭דֵיהֶם תֵּ֣ן לָהֶ֑ם הָשֵׁ֖ב גְּמוּלָ֣ם לָהֶם 5 כִּ֤י לֹ֪א יָבִ֡ינוּ אֶל פְּעֻלֹּ֣ת יַהְוֶה וְאֶל מַעֲשֵׂ֣ה יָדָ֑יו יֶ֝הֶרְסֵ֗ם וְלֹ֣א יִבְנֵם 6 בָּר֥וּךְ יַהְוֶה כִּי שָׁ֝מַ֗ע ק֣וֹל תַּחֲנוּנָי 7 יַהְוֶה עֻזִּ֥י וּמָגִנִּי֮ בּ֤וֹ בָטַ֥ח לִבִּ֗י וְנֶעֱ֫זָרְ֥תִּי וַיַּעֲלֹ֥ז לִבִּ֑י וּמִשִּׁירִי֥ אֲהוֹדֶנּוּ 8 יַהְוֶה עֹז לְעַמּוֹ וּמָ֘ע֤וֹז יְשׁוּע֖וֹת מְשִׁיח֣וֹ הוּא 9 הוֹשִׁ֤יעָה אֶת עַמֶּ֗ךָ וּבָרֵ֥ךְ אֶת נַחֲלָתֶ֑ךָ וּרְעֵם֥ וְ֝נַשְּׂאֵ֗ם עַד הָעוֹלָם