Matched Mismatch Not in MapM
113 words: 110 matched, 3 mismatch, 0 missing
1 לַ֭מְנַצֵּחַ עַל שׁוּשַׁ֣ן עֵד֑וּת מִכְתָּ֖ם לְדָוִ֣ד לְלַמֵּד 2 בְּהַצּוֹת֨וֹ אֵת אֲרַ֣ם נַהֲרַיִם֮ וְאֶת אֲרַ֢ם צ֫וֹבָ֥ה וַיָּ֤שָׁב יוֹאָ֗ב וַיַּ֣ךְ אֶת אֱד֣וֹם בְּגֵיא מֶ֑לַח שְׁנֵ֖ים עָשָׂ֣ר אָלֶף 3 אֱ֭לֹהִים זְנַחְתָּ֣נוּ פְרַצְתָּ֑נוּ אָ֝נַ֗פְתָּ תְּשׁ֣וֹבֵב לָנוּ 4 הִרְעַ֣שְׁתָּה אֶ֣רֶץ פְּצַמְתָּ֑הּ רְפָ֖ה שְׁבָרֶ֣יהָ כִי מָטָה 5 הִרְאִ֣יתָ עַמְּךָ֣ קָשָׁ֑ה הִ֝שְׁקִיתָ֗נוּ יַ֣יִן תַּרְעֵלָה 6 נָ֘תַ֤תָּה לִּירֵאֶ֣יךָ נֵּ֭ס לְהִתְנוֹסֵ֑ס מִ֝פְּנֵ֗י קֹ֣שֶׁט סֶלָה 7 לְ֭מַעַן יֵחָלְצ֣וּן יְדִידֶ֑יךָ הוֹשִׁ֖יעָה יְמִינְךָ֣ וַעֲנֵנוּ 8 אֱלֹהִ֤ים דִּבֶּ֥ר בְּקָדְשׁ֗וֹ אֶ֫עְלֹ֥זָה אֲחַלְּקָ֥ה שְׁכֶ֑ם וְעֵ֖מֶק סֻכּ֣וֹת אֲמַדֵּד 9 לִ֤י גִלְעָ֨ד וְלִ֬י מְנַשֶּׁ֗ה וְ֭אֶפְרַיִם מָע֣וֹז רֹאשִׁ֑י יְ֝הוּדָ֗ה מְחֹקְקִי 10 מוֹאָ֤ב סִ֬יר רַחְצִ֗י עַל אֱ֭דוֹם אַשְׁלִ֣יךְ נַעֲלִ֑י עָ֝לַ֗י פְּלֶ֣שֶׁת הִתְרוֹעָעִי 11 מִ֣י יֹ֭בִלֵנִי עִ֣יר מָצ֑וֹר מִ֖י יַנְחֵנִי עַד אֱדוֹם 12 הֲלֹא אַתָּ֣ה אֱלֹהִ֣ים זְנַחְתָּ֑נוּ וְלֹא תֵצֵ֥א אֱ֝לֹהִ֗ים בְּצִבְאוֹתֵינוּ 13 הָבָה לָּ֣נוּ עֶזְרָ֣ת מִצָּ֑ר וְ֝שָׁ֗וְא תְּשׁוּעַ֥ת אָדָם 14 בֵּאלֹהִ֥ים נַעֲשֶׂה חָ֑יִל וְ֝ה֗וּא יָב֥וּס צָרֵינוּ