Matched Mismatch Not in MapM
95 words: 88 matched, 7 mismatch, 0 missing
1 יַהְוֶה מָ֭לָךְ תָּגֵ֣ל הָאָ֑רֶץ יִ֝שְׂמְח֗וּ אִיִּ֥ים רַבִּים 2 עָנָ֣ן וַעֲרָפֶ֣ל סְבִיבָ֑יו צֶ֥דֶק וּ֝מִשְׁפָּ֗ט מְכ֣וֹן כִּסְאוֹ 3 אֵ֭שׁ לְפָנָ֣יו תֵּלֵ֑ךְ וּתְלַהֵ֖ט סָבִ֣יב צָרָיו 4 הֵאִ֣ירוּ בְרָקָ֣יו תֵּבֵ֑ל רָאֲתָ֖ה וַתָּחֵ֣ל הָאָרֶץ 5 הָרִ֗ים כַּדּוֹנַ֗ג נָ֭מַסּוּ מִלִּפְנֵ֣י יַהְוֶה מִ֝לִּפְנֵ֗י אֲד֣וֹן כָּל הָאָרֶץ 6 הִגִּ֣ידוּ הַשָּׁמַ֣יִם צִדְק֑וֹ וְרָא֖וּ כָל הָעַמִּ֣ים כְּבוֹדוֹ 7 יֵבֹ֤שׁוּ כָּל עֹ֬בְדֵי פֶ֗סֶל הַמִּתְהַלְלִי֥ם בָּאֱלִילִ֑ים הִשְׁתַּחֲווּ ל֝֗וֹ כָּל אֱלֹהִים 8 שָׁמְעָ֬ה וַתִּשְׂמַ֨ח צִיּ֗וֹן וַ֭תָּגֵלְנָה בְּנ֣וֹת יְהוּדָ֑ה לְמַ֖עַן מִשְׁפָּטֶ֣יךָ יַהְוֶה 9 כִּי אַתָּ֤ה יַהְוֶה עֶלְי֥וֹן עַל כָּל הָאָ֑רֶץ מְאֹ֥ד נַ֝עֲלֵ֗יתָ עַל כָּל אֱלֹהִים 10 אֹהֲבֵי֥ יַהְוֶה שִׂנְא֫וּ רָ֥ע שֹׁ֭מֵר נַפְשׁ֣וֹת חֲסִידָ֑יו מִיַּ֥ד רְ֝שָׁעִ֗ים יַצִּילֵם 11 א֭וֹר זָרַח לַצַּדִּ֑יק וּלְיִשְׁרֵי לֵ֥ב שִׂמְחָה 12 שִׂמְח֣וּ צַ֭דִּיקִים בְּיַהְוֶה וְ֝הוֹד֗וּ לְזֵ֣כֶר קָדְשׁוֹ