Matched Mismatch Not in MapM
129 words: 123 matched, 6 mismatch, 0 missing
1 לַמְנַצֵּ֥חַ לִידִיתוּן מִזְמוֹר לְדָוִד 2 אָמַ֗רְתִּי אֶ֥שְׁמְרָ֣ה דְרָכַי֮ מֵחֲט֢וֹא בִלְשׁ֫וֹנִ֥י אֶשְׁמְרָ֥ה לְפִ֥י מַחְס֑וֹם בַּעֲמֹד רָשָׁ֣ע לְנֶגְדִּי 3 נֶאֱלַ֣מְתִּי ד֭וּמִיָּה הֶחֱשֵׁ֣יתִי מִטּ֑וֹב וּכְאֵבִ֥י נֶעְכָּר 4 חַם לִבִּ֨י בְּקִרְבִּ֗י בַּהֲגִיגִ֥י תִבְעַר אֵ֑שׁ דִּ֝בַּ֗רְתִּי בִּלְשׁוֹנִי 5 הוֹדִ֘יעֵ֤נִי יַהְוֶה קִצִּ֗י וּמִדַּ֣ת יָמַ֣י מַה הִ֑יא אֵ֝דְעָ֗ה מֶה חָדֵ֥ל אָנִי 6 הִנֵּ֤ה טְפָח֨וֹת נָ֘תַ֤תָּה יָמַ֗י וְחֶלְדִּ֣י כְאַ֣יִן נֶגְדֶּ֑ךָ אַ֥ךְ כָּל הֶ֥בֶל כָּל אָ֝דָ֗ם נִצָּ֥ב סֶלָה 7 אַךְ בְּצֶ֤לֶם יִתְהַלֶּךְ אִ֗ישׁ אַךְ הֶ֥בֶל יֶהֱמָי֑וּן יִ֝צְבֹּ֗ר וְלֹא יֵדַ֥ע מִי אֹסְפָם 8 וְעַתָּ֣ה מַה קִּוִּ֣יתִי אֲדֹנָ֑י תּ֝וֹחַלְתִּ֗י לְךָ֣ הִיא 9 מִכָּל פְּשָׁעַ֥י הַצִּילֵ֑נִי חֶרְפַּ֥ת נָ֝בָ֗ל אַל תְּשִׂימֵנִי 10 נֶ֭אֱלַמְתִּי לֹ֣א אֶפְתַּח פִּ֑י כִּ֖י אַתָּ֣ה עָשִׂיתָ 11 הָסֵ֣ר מֵעָלַ֣י נִגְעֶ֑ךָ מִתִּגְרַ֥ת יָ֝דְךָ֗ אֲנִ֣י כָלִיתִי 12 בְּתוֹכָח֘וֹ֤ת עַל עָוֺ֨ן יִסַּ֬רְתָּ אִ֗ישׁ וַתֶּ֣מֶס כָּעָ֣שׁ חֲמוּד֑וֹ אַ֤ךְ הֶ֖בֶל כָּל אָדָ֣ם סֶלָה 13 שִׁ֥מְעָה תְפִלָּתִ֨י יַהְוֶה וְשַׁוְעָתִ֨י הַאֲזִינָה֮ אֶל דִּמְעָתִ֗י אַל תֶּ֫חֱרַ֥שׁ כִּ֤י גֵ֣ר אָנֹכִ֣י עִמָּ֑ךְ תּ֝וֹשָׁ֗ב כְּכָל אֲבוֹתָי 14 הָשַׁ֣ע מִמֶּ֣נִּי וְאַבְלִ֑יגָה בְּטֶ֖רֶם אֵלֵ֣ךְ וְאֵינֶנִּי