Matched Mismatch Not in MapM
112 words: 102 matched, 10 mismatch, 0 missing
1 מִזְמ֥וֹר שִׁ֗יר לְי֣וֹם הַשַּׁבָּת 2 ט֗וֹב לְהֹד֥וֹת לְיַהְוֶה וּלְזַמֵּ֖ר לְשִׁמְךָ֣ עֶלְיוֹן 3 לְהַגִּ֣יד בַּבֹּ֣קֶר חַסְדֶּ֑ךָ וֶ֝אֱמ֥וּנָתְךָ֗ בַּלֵּילוֹת 4 עֲלֵי עָ֭שׂוֹר וַעֲלֵי נָ֑בֶל עֲלֵ֖י הִגָּי֣וֹן בְּכִנּוֹר 5 כִּ֤י שִׂמַּחְתַּ֣נִי יַהְוֶה בְּפָעֳלֶ֑ךָ בְּמַעֲשֵׂי֖ יָדֶ֣יךָ אֲרַנֵּן 6 מַה גָּדְל֣וּ מַעֲשֶׂ֣יךָ יַהְוֶה מְ֝אֹ֗ד עָמְק֥וּ מַחְשְׁבֹתֶיךָ 7 אִישׁ בַּ֭עַר לֹ֣א יֵדָ֑ע וּ֝כְסִ֗יל לֹא יָבִ֥ין אֶת זֹאת 8 בִּפְרֹ֤חַ רְשָׁעִ֨ים כְּמ֥וֹ עֵ֗שֶׂב וַ֭יָּצִיצוּ כָּל פֹּ֣עֲלֵי אָ֑וֶן לְהִשָּׁמְדָ֥ם עֲדֵי עַד 9 וְאַתָּ֥ה מָר֗וֹם לְעֹלָ֥ם יַהְוֶה 10 כִּ֤י הִנֵּ֪ה אֹיְבֶ֡יךָ יַהְוֶה כִּי הִנֵּ֣ה אֹיְבֶ֣יךָ יֹאבֵ֑דוּ יִ֝תְפָּרְד֗וּ כָּל פֹּ֥עֲלֵי אָוֶן 11 וַתָּ֣רֶם כִּרְאֵ֣ים קַרְנִ֑י בַּ֝לֹּתִ֗י בְּשֶׁ֣מֶן רַעֲנָן 12 וַתַּבֵּ֥ט עֵינִ֗י בְּשׁוֹרְרָי בַּקָּמִ֖ים עָלַ֥י מְרֵעִ֗ים תִּשְׁמַ֥עְנָה אָזְנָי 13 צַ֭דִּיק כַּתָּמָ֣ר יִפְרָ֑ח כְּאֶ֖רֶז בַּלְּבָנ֣וֹן יִשְׂגֶּה 14 שְׁ֭תוּלִים בְּבֵ֣ית יַהְוֶה בְּחַצְר֖וֹת אֱלֹהֵ֣ינוּ יַפְרִיחוּ 15 ע֭וֹד יְנוּב֣וּן בְּשֵׂיבָ֑ה דְּשֵׁנִ֖ים וְרַעֲנַנִּי֣ם יִהְיוּ 16 לְ֭הַגִּיד כִּי יָשָׁ֣ר יַהְוֶה צ֝וּרִ֗י וְלֹא עֹלָתָה בּוֹ