Matched Mismatch Not in MapM
117 words: 110 matched, 7 mismatch, 0 missing
1 לַמְנַצֵּ֥חַ עַל יְדִיתוּן מִזְמ֥וֹר לְדָוִד 2 אַ֣ךְ אֶל אֱ֭לֹהִים דּוּמִיָּה֣ נַפְשִׁ֑י מִ֝מֶּ֗נּוּ יְשׁוּעָתִי 3 אַךְ ה֣וּא צ֭וּרִי וִישׁוּעָתִ֑י מִ֝שְׂגַּבִּ֗י לֹא אֶמּ֥וֹט רַבָּה 4 עַד אָ֤נָה תְּה֥וֹתְת֣וּ עַל אִישׁ֮ תְּרַצְּחוּ כֻ֫לְּכֶ֥ם כְּקִ֥יר נָט֑וּי גְּדֵרָה דְּחוּיָה 5 אַ֤ךְ מִשְּׂאֵת֨וֹ יָ֥עֲצ֣וּ לְהַדִּיחַ֮ יִרְצ֢וּ בְכָזָב בְּפִימוֹ יְבָרֵ֑כוּ וּ֝בְקִרְבָּ֗ם יְקַלְלוּ סֶלָה 6 אַ֣ךְ לֵ֭אלֹהִים דּ֣וֹמִּי נַפְשִׁ֑י כִּי מִ֝מֶּ֗נּוּ תִּקְוָתִי 7 אַךְ ה֣וּא צ֭וּרִי וִישׁוּעָתִ֑י מִ֝שְׂגַּבִּ֗י לֹ֣א אֶמּוֹט 8 עַל אֱ֭לֹהִים יִשְׁעִ֣י וּכְבוֹדִ֑י צוּר עֻזִּ֥י מַ֝חְסִ֗י בֵּאלֹהִים 9 בִּטְח֘וּ ב֤וֹ בְכָל עֵ֨ת עָ֗ם שִׁפְכוּ לְפָנָ֥יו לְבַבְכֶ֑ם אֱלֹהִ֖ים מַחֲסֶה לָּ֣נוּ סֶלָה 10 אַ֤ךְ הֶ֥בֶל בְּנֵי אָדָם֮ כָּזָ֢ב בְּנֵ֫י אִ֥ישׁ בְּמֹאזְנַ֥יִם לַעֲל֑וֹת הֵ֝֗מָּה מֵהֶ֥בֶל יָחַד 11 אַל תִּבְטְח֣וּ בְעֹשֶׁק֮ וּבְגָזֵ֢ל אַל תֶּ֫הְבָּ֥לוּ חַ֤יִל כִּי יָנ֑וּב אַל תָּשִׁ֥יתוּ לֵב 12 אַחַ֤ת דִּבֶּ֬ר אֱלֹהִ֗ים שְׁתַּיִם ז֥וּ שָׁמָ֑עְתִּי כִּ֥י עֹ֝֗ז לֵאלֹהִים 13 וּלְךָ אֲדֹנַי חָ֑סֶד כִּי אַתָּ֨ה תְשַׁלֵּ֖ם לְאִ֣ישׁ כְּמַעֲשֵׂהוּ